சென்னை: தமிழகத்தில் 15 ஆண்டுகளுக்கு மேல் பழமையான அரசு வாகனங்களை தொடர்ந்து இயக்குவதற்கான கால அவகாசத்தை தமிழக அரசு மேலும் 9 ஆண்டுகளுக்கு நீட்டித்துள்ளது. இதன்படி, அரசு போக்குவரத்துக் கழகங்களின் பஸ்கள் உள்ளிட்ட 40,296 பழைய அரசு வாகனங்களை 2035 செப்டம்பர் 30ம் தேதி வரை இயக்க அனுமதி வழங்கப்பட்டுள்ளது.

மத்திய அரசின் மோட்டார் வாகன விதிகளின்படி, ஒரு அரசு வாகனம் 15 ஆண்டுகளை நிறைவு செய்த பிறகு அதன் பதிவு ரத்து செய்யப்பட்டு, அந்த வாகனம் பயன்பாட்டில் இருந்து அகற்றப்பட வேண்டும். பின்னர் அவை பழைய இரும்பாக விற்பனை செய்யப்பட வேண்டும் என்ற நடைமுறை உள்ளது.

எனினும், அரசு துறைகளின் அன்றாட பணிகள் மற்றும் பொதுமக்களுக்கான அத்தியாவசிய சேவைகள் பாதிக்கப்படுவதை தவிர்க்கும் வகையில், தமிழக அரசு குறிப்பிட்ட காலங்களுக்கு இந்த வாகனங்களை தொடர்ந்து இயக்க அனுமதி அளித்து வருகிறது.

இதையும் படிங்க: 2 நாளில் 5,000 குழந்தைகள்! தாய்மாமன் தங்க மோதிரம் திட்டத்தில் வேகமெடுக்கும் விநியோகம்!

தமிழக அரசு துறைகள், உள்ளாட்சி அமைப்புகள் மற்றும் அரசுப் போக்குவரத்துக் கழகங்களின் கட்டுப்பாட்டில் ஏராளமான பழைய வாகனங்கள் தற்போது பயன்பாட்டில் உள்ளன. அவற்றில் 15 ஆண்டுகளை கடந்த 40,296 வாகனங்கள் இருப்பதாக தமிழக அரசின் அரசாணையில் தெரிவிக்கப்பட்டுள்ளது.

இந்த வாகனங்களை தொடர்ந்து இயக்க வழங்கப்பட்டிருந்த முந்தைய காலக்கெடு செப்டம்பர் 30ம் தேதியுடன் நிறைவடைந்தது. இதையடுத்து, பழைய வாகனங்களின் பயன்பாட்டை மேலும் 9 ஆண்டுகளுக்கு நீட்டிக்கும் வகையில் தமிழக அரசு புதிய அரசாணையை பிறப்பித்துள்ளது.

இதன்படி, 15 ஆண்டுகளுக்கு மேல் பழமையான அரசு வாகனங்கள் 2035 செப்டம்பர் 30ம் தேதி வரை இயக்கப்பட உள்ளன. இந்த உத்தரவில் அரசு போக்குவரத்துக் கழகங்களின் வாகனங்களும் அடங்குவதால், பழைய அரசு பஸ்களின் இயக்கமும் தொடரும் நிலை ஏற்பட்டுள்ளது.

அரசு வாகனங்களின் பயன்பாட்டை நீட்டிப்பதன் மூலம் உடனடியாக புதிய வாகனங்களை வாங்க வேண்டிய செலவு மற்றும் சேவை பாதிப்பு போன்றவற்றை தவிர்க்க முடியும் என்றாலும், நீண்டகாலமாக பயன்படுத்தப்படும் வாகனங்களின் பராமரிப்பு மற்றும் பாதுகாப்பு குறித்த கேள்விகளும் எழுகின்றன.

குறிப்பாக, பொதுமக்கள் அதிகம் பயன்படுத்தும் அரசு பஸ்கள் உள்ளிட்ட வாகனங்கள் தொடர்ந்து இயக்கப்படுவதால், அவற்றின் பராமரிப்பு, தகுதிச் சான்றிதழ் மற்றும் சாலைப் பாதுகாப்பு விதிகள் முறையாக பின்பற்றப்படுகிறதா என்பது முக்கியத்துவம் பெறுகிறது. தமிழக அரசின் புதிய உத்தரவால் 40,296 அரசு வாகனங்களுக்கு தற்போது 2035 வரை இயக்குவதற்கான கால அவகாசம் கிடைத்துள்ளது.

இதையும் படிங்க: வீட்டு உரிமையாளர்களுக்கு ஷாக்? தமிழகத்தில் சொத்து வரி 100% வரை உயர்த்த திட்டம்!