ஆசிய விளையாட்டு கிரிக்கெட் தொடரின் அரையிறுதியில் இலங்கையை 124 ரன்கள் வித்தியாசத்தில் வீழ்த்திய இந்திய அணி, இறுதிப்போட்டிக்கு முன்னேறியுள்ளது. இதன்மூலம் வரும் அக்டோபர் 3-ம் தேதி நடைபெறும் தங்கப் பதக்கத்துக்கான போட்டியில் பாகிஸ்தான் அணியை இந்தியா எதிர்கொள்ள உள்ளது.

ஜப்பானின் நிஷின் நகரில் நடைபெற்ற 2வது அரையிறுதிப் போட்டியில் இந்தியா-இலங்கை அணிகள் மோதின. டாஸ் வென்ற இலங்கை அணி முதலில் பந்துவீச்சை தேர்வு செய்தது. இதையடுத்து களமிறங்கிய இந்திய அணிக்கு தொடக்கத்தில் எதிர்பார்த்த அளவுக்கு ரன்கள் கிடைக்கவில்லை. ஆனால், வைபவ் சூர்யவன்ஷி அதிரடியாக விளையாடி 21 பந்துகளில் 38 ரன்கள் சேர்த்தார்.

மறுமுனையில் பொறுப்புடன் விளையாடிய இஷான் கிஷன், இந்திய அணியின் இன்னிங்ஸை சரிவில் இருந்து மீட்டார். இலங்கை பந்துவீச்சாளர்களை எதிர்த்து சிறப்பாக விளையாடிய அவர், 46 பந்துகளில் 80 ரன்கள் குவித்து ஆட்டமிழக்காமல் இருந்தார். அவரது அதிரடி ஆட்டத்தில் 4 பவுண்டரிகள் மற்றும் 5 சிக்சர்கள் இடம்பெற்றன.

இதையும் படிங்க: ஆசிய விளையாட்டில் வெண்கலம்! ஜோஷ்னா சின்னப்பாவுக்கு ரூ.30 லட்சம் ஊக்கத்தொகை! முதல்வர் விஜய் அறிவிப்பு!

இதன் மூலம் இந்திய அணி 20 ஓவர்கள் முடிவில் 7 விக்கெட்டுகளை இழந்து 169 ரன்கள் எடுத்தது. இலங்கை அணிக்கு 170 ரன்கள் வெற்றி இலக்காக நிர்ணயிக்கப்பட்டது.

பின்னர் இலங்கை அணியின் பேட்டிங் இந்திய பந்துவீச்சுக்கு முன்பு நிலைக்கவில்லை. தொடக்கத்திலேயே விக்கெட்டுகள் அடுத்தடுத்து சரிந்த நிலையில், இலங்கை அணி 9.5 ஓவர்களில் வெறும் 45 ரன்களுக்கு அனைத்து விக்கெட்டுகளையும் இழந்தது. இதனால் இந்திய அணி 124 ரன்கள் வித்தியாசத்தில் அபார வெற்றியை பதிவு செய்தது.

இந்திய அணியின் பந்துவீச்சில் ஜஸ்பிரித் பும்ரா, அக்சர் படேல், அபிஷேக் சர்மா ஆகியோர் தலா 2 விக்கெட்டுகளை கைப்பற்றினர். இந்திய பந்துவீச்சாளர்களின் கட்டுக்கோப்பான செயல்பாடு மற்றும் சிறப்பான பீல்டிங் காரணமாக இலங்கை அணியால் இலக்கை நெருங்கக்கூட முடியவில்லை.

முன்னதாக நடைபெற்ற முதல் அரையிறுதியில் பாகிஸ்தான் அணி வங்கதேசத்தை வீழ்த்தி இறுதிப்போட்டிக்கு தகுதி பெற்றிருந்தது. தற்போது இந்தியாவும் இறுதிச்சுற்றுக்குள் நுழைந்துள்ளதால், ஆசிய விளையாட்டு கிரிக்கெட்டில் தங்கப் பதக்கத்துக்காக இந்தியா-பாகிஸ்தான் அணிகள் மோதும் பரபரப்பான போட்டி அக்டோபர் 3-ம் தேதி நடைபெற உள்ளது.

இதையும் படிங்க: டிவியும் இல்லை, ஸ்மார்ட்போனும் இல்லை! மகள் தங்கம் வென்ற செய்தியை ரேஷன் கடையில் அறிந்த தாய்!