சென்னை: தமிழக அரசின் நடப்பு 2026-27ம் நிதியாண்டின் முதல் ஐந்து மாதங்களுக்கான வருவாய் மற்றும் செலவு தொடர்பான கணக்கு வெளியாகியுள்ளது. ஏப்ரல் முதல் ஆகஸ்ட் வரையிலான காலகட்டத்தில் அரசுக்கு ரூ.1 லட்சத்து 17,791 கோடி வருவாய் கிடைத்துள்ள நிலையில், இதே காலத்தில் ரூ.1 லட்சத்து 38,140 கோடி செலவு செய்யப்பட்டுள்ளது. இதனால் ரூ.20,349 கோடி வருவாய் பற்றாக்குறை ஏற்பட்டுள்ளது.

தமிழக அரசுக்கு மாநில சரக்கு மற்றும் சேவை வரி (எஸ்.ஜி.எஸ்.டி.), முத்திரைத்தாள் மற்றும் பத்திரப்பதிவு கட்டணம், மாநில ஆயத்தீர்வை, வணிக வரிகள் உள்ளிட்ட பல்வேறு வழிகளில் வருவாய் கிடைக்கிறது. இதுதவிர, மத்திய அரசின் வரிப் பங்கு மற்றும் மத்திய அரசின் மானியங்களும் மாநிலத்தின் வருவாயில் முக்கிய பங்கு வகிக்கின்றன.

முதல் ஐந்து மாதங்களில் மாநில சரக்கு மற்றும் சேவை வரி மூலம் ரூ.34,144.06 கோடியும், விற்பனை மற்றும் வர்த்தகம் தொடர்பான வரிகள் மூலம் ரூ.28,164.79 கோடியும் வருவாயாக கிடைத்துள்ளன. முத்திரைத்தாள் மற்றும் பத்திரப்பதிவு கட்டணம் வாயிலாக ரூ.10,493.30 கோடி கிடைத்துள்ளது. மாநில ஆயத்தீர்வை மூலம் ரூ.5,214 கோடியும், மத்திய அரசின் வரிப் பங்காக ரூ.24,188 கோடியும் வந்துள்ளது.

இதையும் படிங்க: டெங்குவை கட்டுப்படுத்த மக்கள் ஒத்துழைப்பு முக்கியம்! அமைச்சர் அருண்ராஜ் விடுத்த முக்கிய வேண்டுகோள்!

இதுதவிர, இதர வரிகள் மற்றும் தீர்வைகள் மூலம் ரூ.6,843 கோடியும், வரி அல்லாத வருவாயாக ரூ.5,149 கோடியும் கிடைத்துள்ளன. மத்திய அரசின் மானியங்கள் வாயிலாக ரூ.3,537 கோடி வருவாய் கிடைத்துள்ளது.

அதேநேரத்தில், அரசின் செலவிலும் சில முக்கிய பிரிவுகள் கணிசமான பங்கை வகிக்கின்றன. கடந்த ஐந்து மாதங்களில் கடன்களுக்கான வட்டி செலுத்த மட்டும் ரூ.25,991 கோடி செலவிடப்பட்டுள்ளது. ஓய்வூதியச் செலவு ரூ.21,008 கோடியாக உள்ளது. அரசு ஊழியர்களின் சம்பளம், ஓய்வூதியம், மானியங்கள் மற்றும் பல்வேறு நலத்திட்டங்களுக்கான செலவுகளும் அரசின் நிதிச்சுமையில் முக்கிய பங்கு வகிக்கின்றன.

இந்த காலகட்டத்தில் தமிழக அரசு ரூ.30,021 கோடி கடன் பெற்றுள்ளதாகவும் கணக்கில் தெரியவந்துள்ளது. குறிப்பாக ஆகஸ்ட் மாதத்தில் புதிய கடன் எதுவும் பெறப்படவில்லை என கூறப்படுகிறது.

வருவாயை விட செலவு அதிகமாக இருப்பதால் ஏற்பட்டுள்ள ரூ.20,349 கோடி பற்றாக்குறை, தமிழக அரசின் நடப்பு நிதியாண்டு நிதிநிலை தொடர்பான முக்கிய புள்ளிவிவரமாக பார்க்கப்படுகிறது. அடுத்தடுத்த மாதங்களில் வருவாய் வசூல் மற்றும் அரசின் செலவினப் போக்கு எவ்வாறு இருக்கும் என்பது நிதிநிலையை தீர்மானிக்கும் முக்கிய அம்சமாக இருக்கும்.

இதையும் படிங்க: முதல்வர் விஜய்க்கு வந்த சர்வதேச அழைப்பு! தமிழக முதலீட்டுக்கு டாவோஸில் காத்திருக்கும் முக்கிய வாய்ப்பு!