சிவகங்கை: சிவகங்கை மாவட்டம் காளையார்கோவில் அருகே நடைபெற்ற இரட்டைக் கொலை சம்பவத்தில் உயிரிழந்த இருவரின் குடும்பத்தினருக்கு தமிழ்நாடு அரசு சார்பில் சுகாதாரத் துறையில் தற்காலிக அரசுப் பணி நியமன ஆணைகள் வழங்கப்பட்டுள்ளன. இதையடுத்து, கடந்த சில நாட்களாக நடைபெற்று வந்த உறவினர்களின் தொடர் போராட்டம் முடிவுக்கு வரும் சூழல் ஏற்பட்டுள்ளது.

சிவகங்கை அருகே பழமலை நகர் பகுதியில் கடந்த செப்டம்பர் 16-ம் தேதி தெய்வேந்திரன் மற்றும் பூப்பாண்டி ஆகிய இரு இளைஞர்கள் மர்ம கும்பலால் வெட்டி படுகொலை செய்யப்பட்டனர். இந்த சம்பவம் அப்பகுதியில் பெரும் பரபரப்பை ஏற்படுத்தியது. இருவரின் உடல்களையும் வாங்க மறுத்த உறவினர்கள், குடும்பத்தினருக்கு உரிய இழப்பீடு வழங்க வேண்டும் என்றும், அரசு வேலை வழங்க வேண்டும் என்றும் கோரிக்கை விடுத்தனர்.

இதனை வலியுறுத்தி, உறவினர்கள் மற்றும் ஆதரவாளர்கள் தொடர்ந்து நான்கு நாட்களாக சாலை மறியல் போராட்டத்தில் ஈடுபட்டனர். இதனால் அந்தப் பகுதியில் போக்குவரத்தும் பாதிக்கப்பட்டது. போராட்டத்தை முடிவுக்கு கொண்டு வர அதிகாரிகள் மற்றும் பாதிக்கப்பட்ட குடும்பத்தினரிடையே பேச்சுவார்த்தை நடைபெற்றது.

இதையும் படிங்க: சிவகங்கை அருகே கோர விபத்து: பள்ளி வேன்–லாரி நேருக்கு நேர் மோதல்; டிரைவர் பலி, 9 மாணவர்கள் காயம்!

பேச்சுவார்த்தையில் பாதிக்கப்பட்ட குடும்பத்தினரின் கோரிக்கைகள் தொடர்பாக ஆலோசிக்கப்பட்ட நிலையில், இன்று செப்டம்பர் 20-ம் தேதி அவர்களுக்கு சுகாதாரத் துறையில் தற்காலிக அரசுப் பணி வழங்குவதற்கான நியமன ஆணைகள் வழங்கப்பட்டன. அரசு தரப்பில் வழங்கப்பட்ட இந்த பணி ஆணையைத் தொடர்ந்து, போராட்டத்தில் ஈடுபட்டவர்கள் தங்களது அடுத்தகட்ட நடவடிக்கை குறித்து முடிவு செய்துள்ளனர்.

இதனிடையே, இரட்டைக் கொலை சம்பவம் தொடர்பாக போலீசார் தீவிர விசாரணை மேற்கொண்டு வருகின்றனர். இந்த வழக்கில் இதுவரை சிறுவன் ஒருவன் உள்பட மொத்தம் 13 பேர் கைது செய்யப்பட்டுள்ளதாக போலீசார் தெரிவித்துள்ளனர். மேலும், கொலைக்கான காரணம் மற்றும் சம்பவத்தில் தொடர்புடையவர்கள் குறித்து விசாரணை நடைபெற்று வருகிறது.

சிவகங்கை மாவட்டத்தில் நடந்த இந்த இரட்டைக் கொலை சம்பவம் தொடர்ந்து கவனம் பெற்ற நிலையில், உயிரிழந்தவர்களின் குடும்பத்தினருக்கு அரசு வேலை வழங்கப்பட்டிருப்பது முக்கிய நடவடிக்கையாக பார்க்கப்படுகிறது. வழக்கின் விசாரணை மற்றும் கைது நடவடிக்கைகள் தொடர்ந்து நடைபெற்று வருகின்றன.

இதையும் படிங்க: டெல்லி நிதியமைச்சர்கள் மாநாடு! நிர்மலா சீதாராமன் முன் மரிய வில்சன் வைத்த முக்கிய கோரிக்கைகள்!