சென்னை: தமிழகத்தில் பொதுமக்களுக்கு சீரான மின்சாரம் வழங்கும் வகையில் மின் வாரியம் பல்வேறு அவசர நடவடிக்கைகளை மேற்கொண்டு வருவதாக தெரிவித்துள்ளது. குறிப்பாக, கூடுதலாக 2,000 மெகாவாட் மின்சாரம் கொள்முதல் செய்வது உள்ளிட்ட நடவடிக்கைகள் மேற்கொள்ளப்பட்டுள்ளதாக மின் வாரியம் வெளியிட்டுள்ள அறிக்கையில் கூறப்பட்டுள்ளது.
தமிழகம் முழுவதும் மின் தேவையை சமாளித்து, தடையற்ற மின் விநியோகத்தை உறுதி செய்வதற்காக மின் வாரியம் தொடர்ந்து நடவடிக்கைகளை மேற்கொண்டு வருகிறது. தற்போதைய நிலையில் மாநிலம் முழுவதும் மின் பற்றாக்குறை இல்லாமல் சீரான மின் விநியோகம் செய்யப்பட்டு வருவதாக அந்த அறிக்கையில் தெரிவிக்கப்பட்டுள்ளது.
மின் தேவையில் ஏற்படும் மாற்றங்கள் மற்றும் மின் தொகுப்பின் நிலை குறித்து அதிகாரிகள் தொடர்ந்து கண்காணித்து வருகின்றனர். இதற்காக மின் வாரிய தலைமையகத்தில் உயர்மட்ட அலுவலர்கள் அடங்கிய குழு அமைக்கப்பட்டு, 24 மணி நேரமும் கண்காணிப்பு பணிகள் நடைபெற்று வருவதாக கூறப்பட்டுள்ளது.
இதையும் படிங்க: பத்திரப்பதிவுக்கு டோக்கன் வாங்கினீங்களா? இனி 12 மணி வரை காத்திருக்க வேண்டும்? வெளியான அதிர்ச்சி தகவல்!
மாநிலத்தின் பல்வேறு பகுதிகளில் மின் விநியோகத்தில் ஏதேனும் பாதிப்பு ஏற்படுகிறதா, மின் தேவை அதிகரிக்கிறதா என்பது உள்ளிட்ட விவரங்கள் தொடர்ந்து கண்காணிக்கப்படுகின்றன. தேவைக்கு ஏற்ப உடனடியாக நடவடிக்கை எடுக்கவும், சம்பந்தப்பட்ட அதிகாரிகளுக்கு உரிய உத்தரவுகளை வழங்கவும் ஏற்பாடுகள் செய்யப்பட்டுள்ளதாக மின் வாரியம் தெரிவித்துள்ளது.
குறிப்பாக, கூடுதல் மின்சாரத்தை கொள்முதல் செய்வது உள்ளிட்ட உடனடி நடவடிக்கைகள் மூலம் மின் பற்றாக்குறை ஏற்படாமல் சமாளிக்கப்பட்டு வருவதாகவும் மின் வாரியம் விளக்கம் அளித்துள்ளது. இதனால் தற்போது தமிழகம் முழுவதும் சீரான மற்றும் தடையற்ற மின் விநியோகம் வழங்கப்பட்டு வருவதாக தெரிவிக்கப்பட்டுள்ளது.
இதற்கிடையே, பொதுமக்கள் தங்களது பகுதிகளில் மின் விநியோகம் தொடர்பாக ஏதேனும் பிரச்னையை எதிர்கொண்டால், உடனடியாக புகார் தெரிவிக்கலாம் என்றும் மின் வாரியம் அறிவுறுத்தியுள்ளது. இதற்காக 24 மணி நேரமும் செயல்படும் ‘மின்னகம்’ நுகர்வோர் சேவை மையத்தை தொடர்பு கொள்ளலாம்.
மின் வாரியம் வெளியிட்டுள்ள தகவலின்படி, 94987 94987 என்ற எண்ணில் மின்துறை சார்ந்த புகார்களை பதிவு செய்ய முடியும். பொதுமக்களின் மின் தேவையை கருத்தில் கொண்டு, நிலைமையை தொடர்ந்து கண்காணித்து தேவையான நடவடிக்கைகள் எடுக்கப்படும் என்றும் மின் வாரியம் தெரிவித்துள்ளது.
இதையும் படிங்க: தமிழகத்தில் அறிவிக்கப்படாத மின்வெட்டு? திடீரென குறைந்த காற்றாலை மின் உற்பத்தி... பின்னணி என்ன?