தென்காசி மற்றும் தாம்பரம் அரசு மருத்துவமனைகளில் தமிழக வெற்றிக் கழக (த.வெ.க.) நிர்வாகிகள் மேற்கொண்ட ஆய்வுப் பயணம் பெரும் சர்ச்சையை ஏற்படுத்தியுள்ள நிலையில், அக்கட்சியின் பொதுச்செயலாளர் என்.ஆனந்த் முக்கிய அறிவுரையை வழங்கியுள்ளார். அரசு நிர்வாக விவகாரங்களில் கட்சியினர் தலையிடக் கூடாது என்று தெளிவாக வலியுறுத்திய அவர், கட்சித் தோழர்கள் தங்கள் எல்லைகளைப் புரிந்து செயல்பட வேண்டும் எனக் கேட்டுக்கொண்டார்.

சமீபத்தில் தென்காசி மற்றும் தாம்பரம் அரசு மருத்துவமனைகளுக்குச் சென்ற த.வெ.க.வினர், அங்குள்ள மருத்துவ வசதிகள், உள்கட்டமைப்பு மற்றும் சேவைகள் குறித்து ஆய்வு செய்தனர். இந்த நடவடிக்கை அரசு அதிகாரிகள் மற்றும் எதிர்க்கட்சியினரிடையே கடும் விமர்சனத்தைத் தூண்டியது. சிலர் இதை “அதிகாரம் தவறான பயன்பாடு” என்றும், “தேர்ந்தெடுக்கப்படாத நபர்கள் அரசு இயந்திரத்தில் தலையிடுவது” என்றும் குற்றஞ்சாட்டினர். இந்தச் சம்பவம் த.வெ.க.வின் செயல்பாடுகள் குறித்த விவாதத்தை அரசியல் வட்டாரத்தில் தீவிரப்படுத்தியுள்ளது.

இந்நிலையில், கட்சியின் உயர்மட்டத்தில் இருந்து வந்துள்ள அறிவிப்பு முக்கியத்துவம் பெற்றுள்ளது. பொதுச்செயலாளரும், அமைச்சருமான என்.ஆனந்த் வெளியிட்ட அறிக்கையில், “அரசு விவகாரங்களில் த.வெ.க.வினர் தலையிடக் கூடாது. த.வெ.க. தோழர்கள் தங்களுடைய எல்லை என்ன என்பதை அறிந்து செயல்பட வேண்டும்” என்று வலியுறுத்தினார். மேலும், “மக்கள் பிரதிநிதிகள் அல்லாதோர் அரசு சார்ந்த விவகாரங்களில் தலையிடவோ, ஆய்வுகளை மேற்கொள்ளவோ கூடாது. முதலமைச்சரின் நற்பெயருக்கு களங்கம் ஏற்படாத வகையில் நடந்து கொள்வது நம் கடமையாகும்” என்றும் அவர் தெரிவித்தார். 

இதையும் படிங்க: புதிய கூட்டணி அமைச்சரவையில் இணைய விசிக முடிவு - தொல்.திருமாவளவன் அறிவிப்பு!

முதலமைச்சர் விஜய் தலைமையில் ஆட்சி அமைந்துள்ள தற்போதைய சூழலில், கட்சியினரின் பொறுப்பு பல மடங்கு அதிகரித்துள்ளதாகவும், ஒவ்வொரு செயலும் முதலமைச்சரின் பிம்பத்தைப் பாதிக்கும் என்பதை உணர்ந்து செயல்பட வேண்டும் எனவும் அவர் சுட்டிக்காட்டினார். இந்த அறிவுரை த.வெ.க.வுக்குள் கட்சி ஒழுக்கத்தை வலுப்படுத்தும் நோக்கம் கொண்டதாகக் கருதப்படுகிறது. சமீபத்தில் ஆட்சிப் பொறுப்பேற்றுள்ள விஜய் அரசுக்கு எந்தவித எதிர்மறை பிம்பமும் ஏற்படாமல் இருக்க, கட்சியினர் மிகவும் கவனமாக இருக்க வேண்டிய கட்டாயம் ஏற்பட்டுள்ளது. 

அரசியல் நோக்கர்கள் இதை “கட்சியின் முதிர்ச்சியான அணுகுமுறை” என்று வர்ணிக்கின்றனர். இந்த நடவடிக்கை எதிர்காலத்தில் த.வெ.க.வின் செயல்பாடுகளுக்கு தெளிவான வழிகாட்டியாக அமையும் என எதிர்பார்க்கப்படுகிறது. மக்கள் பிரச்சினைகளை அரசுக்கு எடுத்துச் செல்வதற்கான சரியான வழிகளைப் பின்பற்றி, கட்சியினர் செயல்பட வேண்டும் என்ற செய்தியை இந்த அறிவிப்பு வலியுறுத்துகிறது.
 

இதையும் படிங்க: ஆளுநர் மாளிகை நடைமுறை அதுதான்!": தமிழ்த்தாய் வாழ்த்துச் சர்ச்சை குறித்து அமைச்சர் ராஜ்மோகன்  விளக்கம்!