தமிழக வெற்றிக் கழகத்தில் அ.தி.மு.க. உள்ளிட்ட கட்சிகளில் இருந்து புதிதாக இணைந்தவர்களுக்கு முக்கியத்துவம் அளிக்கப்படுவதாகவும், நீண்ட காலமாக விஜய் ரசிகர் மன்றத்தில் இருந்து கட்சிக்காக உழைத்து வரும் தங்களுக்கு உரிய அங்கீகாரம் கிடைக்கவில்லை என்றும் சில த.வெ.க. நிர்வாகிகள் அதிருப்தி தெரிவித்துள்ளனர். அரசு சார்ந்த கவுரவப் பதவிகளிலும் தங்களுக்கு வாய்ப்பு வழங்க வேண்டும் என அவர்கள் வலியுறுத்தியுள்ளனர்.

விஜய் அரசியலுக்கு வர வேண்டும், முதல்வராக வேண்டும் என்ற நோக்கத்தில் அவரது ரசிகர் மன்ற நிர்வாகிகள் பல ஆண்டுகளாக பல்வேறு நலத்திட்ட பணிகளில் ஈடுபட்டு வந்ததாக அவர்கள் கூறுகின்றனர்.

த.வெ.க. கட்சி தொடங்கப்பட்ட பிறகு முதல் தேர்தலிலேயே 234 தொகுதிகளிலும் தனித்து போட்டியிட்டு விஜய் ஆட்சியை அமைத்ததாகவும், அவரை நம்பி களப்பணியாற்றியவர்களுக்கு உரிய முக்கியத்துவம் கிடைக்கும் என எதிர்பார்த்ததாகவும் நிர்வாகிகள் தெரிவித்துள்ளனர்.

இதையும் படிங்க: விஜய்க்கு பயந்துதான் ராகுல் மவுனமா? தமிழக எஸ்.ஐ.ஆர். விவகாரத்தில் திமுக புதிய கேள்வி!

அதே நேரத்தில், அ.தி.மு.க.வைச் சேர்ந்த முன்னாள் அமைச்சர்கள், எம்.எல்.ஏ.க்கள் மற்றும் முக்கிய நிர்வாகிகள் தொடர்ந்து த.வெ.க.வில் இணைந்து வருவது கட்சிக்குள் சிலரிடம் அதிருப்தியை ஏற்படுத்தியுள்ளதாக கூறப்படுகிறது.

குறிப்பாக, அ.தி.மு.க.வில் இருந்து வந்த சிலருக்கு முக்கிய அமைப்பு மற்றும் அரசு சார்ந்த பதவிகள் வழங்கப்பட்டதை அவர்கள் சுட்டிக்காட்டுகின்றனர்.

முன்னாள் அமைச்சர் கு.ப.கிருஷ்ணனுக்கு அமைச்சர் அந்தஸ்திலான தமிழக நகர்ப்புற வாழ்விட மேம்பாட்டு வாரியத் தலைவர் பதவி வழங்கப்பட்டதாகவும், புஷ்பவனம் குப்புசாமி தமிழ்நாடு இயல் இசை நாடக மன்றத் தலைவராக நியமிக்கப்பட்டதாகவும் நிர்வாகிகள் குறிப்பிட்டுள்ளனர். மேலும், சிங்கை ராமச்சந்திரனுக்கு ‘ஸ்டார்ட் அப் தமிழ்நாடு’ தலைவர் பதவி வழங்கப்பட்டதையும் அவர்கள் சுட்டிக்காட்டியுள்ளனர்.

முன்னாள் அமைச்சர்களான சி.விஜயபாஸ்கர், எம்.ஆர்.விஜயபாஸ்கர், இசக்கி சுப்பையா, உடுமலை ராதாகிருஷ்ணன் உள்ளிட்டோருக்கு த.வெ.க.வில் அமைப்புச் செயலாளர் பொறுப்புகள் வழங்கப்பட்டுள்ளதாகவும் அவர்கள் தெரிவித்துள்ளனர்.

விஜய்க்காக நீண்ட காலமாக உழைத்து வரும் அடிமட்ட நிர்வாகிகளையும் அரவணைத்து, அவர்களுக்கும் உரிய அங்கீகாரம் மற்றும் கவுரவமான பொறுப்புகள் வழங்க வேண்டும் என்பதே தங்களது எதிர்பார்ப்பு என அதிருப்தி தெரிவித்த நிர்வாகிகள் கூறியுள்ளனர்.

இதையும் படிங்க: ரூ.2. 23 கோடியில் ஆய்வகத் துணை கட்டிடம்.. மாதவரத்தில் திறந்து வைத்த முதல்வர் விஜய்..!