வரலாற்றுச் சிறப்புமிக்க தருணம்! இந்திய மகளிர் கிரிக்கெட் அணி ஐசிசி மகளிர் ஒருநாள் உலகக் கோப்பையை வென்று இமாலய சாதனை படைத்துள்ளது. நவி மும்பையிலுள்ள டாக்டர் டி.ஒய்.பாட்டீல் விளையாட்டரங்கில் நடைபெற்ற இறுதிப்போட்டியில் தென்னாப்பிரிக்க அணியை 52 ரன்கள் வித்தியாசத்தில் வீழ்த்தி, கேப்டன் ஹர்மன்ப்ரீத் கவுர் தலைமையிலான அணி கோப்பையை கைப்பற்றியது. இந்த வெற்றி இந்திய கிரிக்கெட்டின் 50 ஆண்டு கால தோல்வி வரலாற்றை மாற்றி எழுதியுள்ளது.

போட்டியின் போக்கு விறுவிறுப்பாக அமைந்தது. மழை குறுக்கிட்டதால் தாமதமான ஆட்டத்தில் முதலில் பேட் செய்த இந்திய அணி 50 ஓவர்களில் 298/7 ரன்கள் குவித்தது. ஷபாலி வர்மா 87 ரன்களுடன் அசத்த, ஹர்மன்ப்ரீத் கவுர் 58 ரன்களுடன் பங்களித்தார். பதிலடி கொடுத்த தென்னாப்பிரிக்க அணி 246 ரன்களுக்கு ஆல் அவுட்டானது. தீப்தி ஷர்மா 5 விக்கெட்டுகளுடன் ஆட்டநாயகியாகத் தேர்வு செய்யப்பட்டார். ஷபாலி வர்மா 2 விக்கெட்டுகளும் வீழ்த்தி அசத்தினார். இந்தியாவின் இந்த வெற்றி மகளிர் கிரிக்கெட்டில் புதிய யுகத்தை தொடங்கியுள்ளது.

இதையும் படிங்க: உண்மையான வரலாற்று நாள்..!! சாதனை படைத்த இந்திய மகளிர் கிரிக்கெட் அணிக்கு விஜய் உருக்கமான வாழ்த்து..!!

இந்த அபார வெற்றிக்கு நாடு முழுவதும் வாழ்த்து மழை பொழிந்தது. குடியரசுத் தலைவர் திரவுபதி முர்மு, பிரதமர் நரேந்திர மோடி, உள்துறை அமைச்சர் அமித் ஷா உள்ளிட்டோர் மனமார்ந்த வாழ்த்துகளை தெரிவித்தனர். தமிழக அரசியல் தலைவர்களும் பின்தங்கவில்லை. அதிமுக பொதுச்செயலாளரும், எதிர்க்கட்சித் தலைவருமான எடப்பாடி கே. பழனிசாமி தனது எக்ஸ் பக்கத்தில் உருக்கமாக வாழ்த்து தெரிவித்தார். வாழ்த்துக்கள், இந்திய அணி! உலகக் கோப்பை இறுதிப் போட்டியில் நமது இந்திய மகளிர் கிரிக்கெட் அணியின் வரலாற்றுச் சிறப்புமிக்க வெற்றி! உங்கள் மன உறுதி, உறுதிப்பாடு மற்றும் குழு மனப்பான்மை நமது நாட்டிற்கு மகத்தான பெருமையை கொண்டு வந்துள்ளது. இந்த வெற்றி வெறும் களத்தில் கிடைத்த வெற்றி மட்டுமல்ல - நாடு முழுவதும் உள்ள மில்லியன் கணக்கான இளம் பெண்கள் பெரிய கனவுகளைக் காணவும், நம்பிக்கையுடன் தங்கள் இலக்குகளைத் துரத்தவும் இது ஒரு உத்வேகமாகும். சபாஷ், சாம்பியன்ஸ்! என்று பதிவிட்டார்.

இந்த வெற்றி இந்திய மகளிர் கிரிக்கெட்டின் வளர்ச்சிக்கு மைல்கல்லாக அமைந்துள்ளது. 1983 ஆண்கள் உலகக் கோப்பை வெற்றிக்கு நிகரான இந்த சாதனை, கோடிக்கணக்கான பெண்களின் கனவை நனவாக்கியுள்ளது. பிசிசிஐ அணிக்கு ரூ.51 கோடி பரிசுத்தொகை அறிவித்துள்ள நிலையில், ஐசிசி யின் பரிசுத்தொகை ரூ.39 கோடி.

இந்த வெற்றி மகளிர் விளையாட்டுக்கு புதிய உத்வேகத்தை அளிக்கும் என்பதில் ஐயமில்லை. இந்திய வீராங்கனைகளின் இந்த இமயமலை வெற்றி, ‘பெண்கள் எதுவும் செய்யலாம்’ என்பதை உலகிற்கு உரத்துச் சொல்லியுள்ளது. எடப்பாடி பழனிசாமியின் வாழ்த்து போல, நாடே கொண்டாடும் இந்நாள் என்றென்றும் நினைவுகூரப்படும்..!!

இதையும் படிங்க: கரையான் போல அதிமுகவை அழிக்கிறார் இபிஎஸ்..!! அமைச்சர் சேகர்பாபு அதிரடி..!!