தாராபுரம் இடைத்தேர்தல் வருகின்ற அக்டோபர் 6ஆம் தேதி நடைபெற உள்ளது. இதற்காக தமிழக வெற்றி கழகத்தின் சார்பில் சத்தியபாமா போட்டியிடுகிறார். அவரை ஆதரித்து இன்று தமிழக முதல்வரும், தமிழக வெற்றி கழகத்தின் தலைவருமான விஜய் வந்து பிரச்சாரம் மேற்கொள்ள உள்ளார்.

இந்தப் பிரச்சாரம் நடைபெறும் இடமானது தாராபுரம்-உடுமலை சாலையில் மாருதி நகர் பகுதியில் அமைந்துள்ளது. மாருதி நகர் பகுதியில் பிரம்மாண்டமாக மேடைகள் அமைக்கப்பட்டு, அந்த மேடையில் இன்று முதல்வர் விஜய் பேச உள்ளார். இதற்காக சுமார் 5,000 இருக்கைகள் தற்போது போடப்பட்டுள்ளன.

தொடர்ந்து, இருக்கைகளுக்கு அருகிலேயே ஆண், பெண்களுக்கு என தனித்தனியாக மொபைல் டாய்லெட் வசதியும் செய்யப்பட்டுள்ளது. மேலும், குடிநீருக்காக 10 சின்டெக்ஸ் தொட்டிகள் அமைக்கப்பட்டுள்ளன. கடைசியில் உள்ளவர்களும் முதல்வரை காணும் வகையில் 10-க்கும் மேற்பட்ட எல்இடி திரைகளும் அமைக்கப்பட்டுள்ளன.

இதையும் படிங்க: தாராபுரம், மதுராந்தகம் இடைத்தேர்தல்! சோஷியல் மீடியாவை உன்னிப்பாக கண்காணிக்கும் அதிகாரிகள்!

அதேபோல, முதல்வரின் வருகையானது தாராபுரம் நகர் பகுதியில் இருந்து மாருதி நகர் வரை சாலை மார்க்கமாக இருப்பதால், சாலையின் இருபுறமும் பேரிகார்டுகள் அமைக்கப்பட்டு, தொண்டர்கள் சாலைக்குள் திடீரென வராமல் இருக்க ஏற்பாடுகளும் செய்யப்பட்டுள்ளன.

முதல்வர் கோவையிலிருந்து சாலை மார்க்கமாக வருவதால், அவரது வழித்தடம் தற்போது வெளியிடப்பட்டுள்ளது. கோவையில் இருந்து பல்லடம் வழியாக வரும் முதல்வர், குண்டடம் ஐ.டி. கார்னர், அமராவதி ரவுண்டானா, கூக்கடை கார்னர், அண்ணா சிலை, அங்கிருந்து காவல் நிலையம் மற்றும் அலங்கியம் சிக்னல் வழியாகத் தொடர்ந்து உடுமலை சாலையில் வந்து, பிரச்சாரப் பொதுக்கூட்டம் நடைபெறும் இடத்திற்கு மதியம் 3 மணி அளவில் வருகை புரிய உள்ளார்.

முதல்வர் தாராபுரம் பேருந்து நிலையம் வழியாக வராமல் அண்ணா சிலை வழியாக வருவதால், அண்ணா சிலைக்கு மரியாதை செலுத்த அதிக வாய்ப்புள்ளது. முதல்வரின் வருகையை ஒட்டி தாராபுரம் பகுதி முழுவதுமே சுமார் 3,000-க்கும் மேற்பட்ட போலீசார் பாதுகாப்புப் பணியில் தொடர்ந்து ஈடுபட்டு வருகின்றனர்.

கூட்டம் நடைபெறும் பகுதியில் முதலமைச்சரின் பிரச்சார பேருந்து நிறுத்தி வைக்கப்பட்டுள்ள நிலையில் இந்தக் கூட்டத்தில் 5000 பேருக்கு  மட்டுமே அனுமதி என்று கட்சியின் பொதுச் செயலாளரும் அமைச்சருமான ஆனந்த் தெரிவித்த நிலையில் க்யூ ஆர் கோடு அனுமதி அட்டை வைத்திருப்பவர்களுக்கு மட்டுமே கூட்டத்திற்கு அனுமதிக்கப்பட உள்ளனர். 

முதலமைச்சர் வரக்கூடிய சாலை முழுவதும் சுமார் ஐந்து கிலோமீட்டர் தூரத்திற்கு சாலையின் இருபுறமும் தடுப்பு கம்பிகள் அமைக்கப்பட்டுள்ளது.  கழிவுநீர் கால்வாயில் கழிவு நீர் தேங்கிய பகுதி குப்பைகள் உள்ள பகுதி காலியான மனை கருவேல மரங்கள் உள்ள பகுதி உள்ளிட்ட இடங்களில் பச்சை நிற திரை அமைக்கப்பட்டுள்ளது. 

5000 பேருக்கு மட்டுமே அனுமதி என்று அமைச்சர் ஆனந்த் தெரிவித்த நிலையில் 21,000 நாற்காலிகள் கொண்டுவரப்பட்டு கூட்டம் நடைபெறும் பகுதியில் அமைக்கப்பட்டுள்ள வெட்டிகளுக்குள் 7000 நாற்காலிகளும் வெளியே 6000 நாற்காலிகள் என மொத்தம் 13 ஆயிரம் நாற்காலிகள் போடப்பட்டுள்ளது. 

மேலும் பிரச்சாரத்தில் பங்குபெறும் பொது மக்களுக்கு 50 பிஸ்கட் பாக்கெட் அரை லிட்டர் வாட்டர் பாட்டில் இரண்டு மிட்டாய்கள் முதலமைச்சர் மற்றும் அமைச்சர் ஆனந்த் படத்துடன் கூடிய பைகளில் ஒவ்வொரு இருக்கைக்கும் வைக்கப்பட்டுள்ளது. 

இதையும் படிங்க: சத்தியபாமாவுக்கு வந்த சத்திய சோதனை... தாராபுரம் இடைத்தேர்தல் பிரசாரத்தில் அதிரடி ட்விஸ்ட்...!