கடுமையான சுவாசத் தொற்று மற்றும் மூச்சுத்திணறல் காரணமாகச் சென்னையில் உள்ள தனியார் மருத்துவமனையில் அனுமதிக்கப்பட்டு தீவிர சிகிச்சை பெற்று வரும் கொளத்தூர் தொகுதி தவெக சட்டமன்ற உறுப்பினர் வி.எஸ்.பாபுவை, தமிழ்நாடு முதலமைச்சர் விஜய் நேரில் சென்று சந்தித்து அவரது உடல்நலம் குறித்துக் கேட்டறிந்தார்.

சென்னை கொளத்தூர் சட்டமன்றத் தொகுதியின் தவெக எம்எல்ஏ-வான வி.எஸ்.பாபுவிற்கு கடந்த சில தினங்களாகச் சளி மற்றும் காய்ச்சல் பாதிப்பு இருந்து வந்த நிலையில், திடீரென அவருக்குக் கடுமையான சுவாசப் பிரச்சனை மற்றும் மூச்சுத்திணறல் ஏற்பட்டுள்ளது. இதனையடுத்து, அவரது குடும்பத்தினர் அவரை உடனடியாகச் சென்னை அமைந்தகரையில் அமைந்துள்ள பிரபல தனியார் மருத்துவமனையில் சிகிச்சைக்காக அனுமதித்தனர். அங்கு அவருக்கு மருத்துவர்கள் தீவிர சிகிச்சைப் பிரிவில் வைத்து அவசர மருத்துவ உதவிகளையும், உரிய மருந்து சிகிச்சைகளையும் வழங்கித் தொடர்ந்து தீவிரமாகக் கண்காணித்து வருகின்றனர்.

இந்த விவகாரம் குறித்து அறிந்ததும், முதலமைச்சர் விஜய் இன்று அமைந்தகரையில் உள்ள அந்தத் தனியார் மருத்துவமனைக்கு நேரில் விரைந்தார். அங்கு மருத்துவமனையின் சிறப்பு வார்டில் சிகிச்சை பெற்று வரும் வி.எஸ்.பாபுவைச் சந்தித்து, அவரது தற்போதைய உடல்நிலை குறித்தும், சிகிச்சைகள் குறித்தும் மிகுந்த பரிவோடு விசாரித்து அவருக்குத் தைரியம் கூறினார். மேலும், அவருக்கு அளிக்கப்பட்டு வரும் மருத்துவ முறைகள், பரிசோதனை முடிவுகள் மற்றும் உடல்நிலையில் ஏற்பட்டுள்ள முன்னேற்றம் குறித்து அங்குள்ள தலைமை மருத்துவர்களிடம் முதலமைச்சர் விஜய் விரிவாகக் கேட்டறிந்தார்.

இதையும் படிங்க: முதல்வர் விஜய் பிரச்சார நிகழ்ச்சிக்காக பனைமரங்கள் வெட்டப்பட்டதா? உள்ளூர் மக்கள் அதிர்ச்சி!!

தனது தொகுதிப் பணிகளிலும் மக்கள் நலப் பணிகளிலும் தீவிரமாக இயங்கி வந்த சட்டமன்ற உறுப்பினர் வி.எஸ்.பாபு விரைந்து முழு குணமடைய வேண்டும் என முதலமைச்சர் விஜய் வாழ்த்துத் தெரிவித்தார். ஆளுங்கட்சி எம்எல்ஏ ஒருவரின் உடல்நலம் குறித்து முதலமைச்சர் நேரில் சென்று நலம் விசாரித்த நிகழ்வு, தவெக கட்சித் தொண்டர்கள் மற்றும் கொளத்தூர் தொகுதி மக்களிடையே பெரும் நெகிழ்ச்சியை ஏற்படுத்தியுள்ளது.

இதையும் படிங்க: சி.எம். விஜய்க்கு பேரதிர்ச்சி... ஆய்வு செய்யும் போதே மின்வாரிய ஊழியர்கள் செய்த சம்பவம்...!