தமிழகத்தில் வாக்காளர் பட்டியல் சிறப்பு தீவிர திருத்தப் பணியான எஸ்.ஐ.ஆர். தொடர்பாக அரசியல் கட்சிகளுக்கு இடையே மீண்டும் கருத்து மோதல் உருவாகியுள்ளது. இந்த விவகாரத்தில் தமிழகத்தில் லட்சக்கணக்கான வாக்காளர்களின் பெயர்கள் நீக்கப்பட்டதாக கூறப்படும் நிலையில், இதுகுறித்து காங்கிரஸ் மூத்த தலைவர் ராகுல் காந்தி ஏன் மவுனம் காக்கிறார் என்று தி.மு.க. செய்தித் தொடர்பாளரும் வழக்கறிஞருமான சரவணன் கேள்வி எழுப்பியுள்ளார்.

வாக்காளர் பட்டியல் திருத்தப் பணிகளில் முறைகேடுகள் நடந்ததாக கூறி, தலைமை தேர்தல் கமிஷனர் ஞானேஷ் குமார் பதவி விலக வேண்டும் என வலியுறுத்தி, டெல்லியில் காங்கிரஸ் சார்பில் போராட்டம் நடைபெற்றது. லோக்சபா எதிர்க்கட்சித் தலைவர் ராகுல் காந்தி உள்ளிட்டோர் இதில் பங்கேற்றனர்.

இந்த சூழலில், திமுக செய்தித் தொடர்பாளர் சரவணன் தனது சமூக வலைதளப் பதிவில், தமிழகத்தில் எஸ்.ஐ.ஆர். பணியின் மூலம் லட்சக்கணக்கான வாக்காளர்களின் பெயர்கள் நீக்கப்பட்டதாக குறிப்பிட்டுள்ளார். இதுபற்றி ராகுல் காந்தி ஏன் எந்த கருத்தும் தெரிவிக்கவில்லை என்றும் அவர் கேள்வி எழுப்பியுள்ளார்.

இதையும் படிங்க: ராகுலும், சோனியாவும் வாக்குத் திருட்டால் எம்.பி.க்கள் ஆனார்களா? தேர்தல் கமிஷன் விவகாரம்! பாஜக கேள்வி!

மேலும், எஸ்.ஐ.ஆர். பணிகள் முடிந்த பின்னர் புதிதாக தேர்ந்தெடுக்கப்பட்ட அனைத்து மாநில அரசுகளையும் கலைத்து, மீண்டும் ஓட்டுச்சீட்டு முறையில் தேர்தல் நடத்த வேண்டும் என காங்கிரஸ் தேசிய தலைவர் மல்லிகார்ஜுன கார்கே கூறியதாக சுட்டிக்காட்டிய சரவணன், அந்த கருத்தை ராகுல் காந்தி ஆதரிக்கிறாரா அல்லது எதிர்க்கிறாரா என்பதை முதலில் தெளிவுபடுத்த வேண்டும் என்றும் தெரிவித்துள்ளார்.

தமிழகத்தில் காங்கிரஸ் கூட்டணியில் உள்ள தமிழக வெற்றிக் கழகம் மற்றும் அதன் தலைவர் விஜய் ஆகியோரின் அரசியல் நிலைப்பாடுகள் காரணமாகவே, ராகுல் காந்தி தமிழக எஸ்.ஐ.ஆர். விவகாரம் குறித்து பேச தயங்குகிறாரா என்றும் சரவணன் கேள்வி எழுப்பியுள்ளார்.

இதனால், எஸ்.ஐ.ஆர். விவகாரத்தை மையமாக வைத்து கூட்டணி அரசியலிலும் புதிய விவாதம் உருவாகும் சூழல் ஏற்பட்டுள்ளது. ராகுல் காந்தி இந்த கேள்விகளுக்கு என்ன பதில் அளிக்கப் போகிறார் என்பது அரசியல் வட்டாரத்தில் கவனத்தை ஈர்த்துள்ளது.

இதையும் படிங்க: ராகுல் வருகை... ரூ.60 லட்சம் செலவு!! கல்லா கட்டும் காங்கிரஸ்? எம்.பி., எம்.எல்.ஏ.க்களிடம் வசூல்?