ராமநாதபுரம் அருகே முடுக்குத்தரவை சாலையில் போதைப்பொருள் அமலாக்கப் பிரிவு போலீசார் சோதனையில் ஈடுபட்டிருந்தபோது சந்தேகத்திற்கு இடமாக சுற்றித் திரிந்த ஐந்து பேரை கண்டுபிடித்தனர். குடிசை மாற்று வாரியம் அருகே நின்றிருந்த அவர்கள் போலீசார் வருவதைப் பார்த்ததும் தப்பியோட முயன்றனர். அவர்களைப் பிடித்து விசாரித்தபோது முரணான பதில்கள் அளித்ததால் அவர்கள் வைத்திருந்த பையை சோதனை செய்தனர்.

அதில் ரூ.5 கோடி மதிப்பிலான 38 தங்கக் கட்டிகள், 28 சவரன் தங்க நகைகள் மற்றும் ரூ.12.20 லட்சம் ரொக்கம் இருந்தது. இது சுமார் 3.78 கிலோ எடையுள்ள தங்கக் கட்டிகளாக இருந்தது.விசாரணையில் அவர்கள் ராமநாதபுரம் எம்.ஜி.ஆர். நகரைச் சேர்ந்த குப்புசாமி (45), பரமக்குடி லீலாவதி நகர் செல்வராஜ் (62), தூத்துக்குடி மாவட்டம் ஆத்தூர் சரவணன் (50), மாரிமுத்து (27) மற்றும் வேலாயுதம் (40) ஆகியோர் எனத் தெரியவந்தது.

முதலில் ஐந்து பேரும் தங்களுக்கு எதுவும் தெரியாது என்று கூறினர். பின்னர் எம்.ஜி.ஆர். நகர் அருகே உள்ள குப்பைக்கிடங்கில் ஒரு பையில் தங்கக் கட்டிகள், நகைகள் மற்றும் பணம் கிடைத்ததாகவும், அதைத் தங்களுக்குள் பங்கிடுவதற்காக ஆள் நடமாட்டம் இல்லாத அந்தப் பகுதிக்கு வந்ததாகவும் வாக்குமூலம் அளித்தனர்.குப்பைக்கிடங்கில் கிடைத்த இந்தத் தங்கம் மற்றும் பணத்தைப் பிரித்துக்கொண்டிருந்தபோது போலீசார் பிடித்தனர். இந்தச் சம்பவம் தொடர்பாக வழக்குப் பதிவு செய்யப்பட்டுள்ளது. போலீசார் ஐந்து பேரையும் அழைத்துச் சென்று தீவிர விசாரணை நடத்தி வருகின்றனர். பறிமுதல் செய்யப்பட்ட தங்கக் கட்டிகள், நகைகள் மற்றும் ரொக்கம் அரசு கருவூலத்தில் ஒப்படைக்கப்பட்டுள்ளன.

இதையும் படிங்க: ராமநாதபுரத்தில் இன்று முதல் 144 தடை! பொதுக்கூட்டம், ஊர்வலங்களுக்கு அதிரடி கட்டுப்பாடு!

சமீபகாலமாக ராமநாதபுரம் மாவட்ட கடற்கரைப் பகுதிகளில் இலங்கையிலிருந்து தங்கம் கடத்தி வருவது அதிகரித்துள்ள நிலையில், இந்தத் தங்கம் கடத்தல் தொடர்பானதா அல்லது கொள்ளையடித்த நகைகளை உருக்கி தங்கக் கட்டிகளாக மாற்றியதா என்ற கோணங்களிலும் விசாரணை நடைபெற்று வருகிறது. முழு விசாரணைக்குப் பிறகு தங்கம் எவ்வாறு குப்பைக்கிடங்கில் வந்தது மற்றும் இந்த ஐந்து பேருக்கு எவ்வாறு கிடைத்தது என்பது தெளிவாகும் என போலீசார் தெரிவித்துள்ளனர்.

இதையும் படிங்க: பெருவயல் ரெணபலி முருகன் கோவில் மகா கும்பாபிஷேகம்! பல்லாயிரக்கணக்கான பக்தர்கள் சாமி தரிசனம்!