சரஸ்வதி பூஜை மற்றும் ஆயுத பூஜை தொடர் விடுமுறையை முன்னிட்டுத் தலைநகர் சென்னையில் இருந்து தென் மாவட்டங்களுக்குச் செல்லும் பயணிகளின் வசதிக்காகவும், கூட்ட நெரிசலைத் தவிர்க்கும் வகையிலும் தாம்பரம் – மானாமதுரை மற்றும் சென்னை எழும்பூர் – திருச்சிராப்பள்ளி இடையே 12 பெட்டிகளைக் கொண்ட முன்பதிவில்லா மெமு (Unreserved MEMU) சிறப்பு ரயில்களை இயக்குவதாகத் தெற்கு ரயில்வே அதிகாரப்பூர்வமாக அறிவித்துள்ளது.

பூஜை விடுமுறையை முன்னிட்டு வழக்கமான விரைவு ரயில்களில் காத்திருப்போர் பட்டியல் பல மடங்கு அதிகரித்துள்ள நிலையில், முன்பதிவு செய்யாத ஏழை, எளிய மற்றும் நடுத்தரப் பயணிகள் உடனடியாகப் பயணிக்க ஏதுவாக இந்தச் சிறப்பு ரயில்கள் இயக்கப்படுகின்றன.

தாம்பரம் – மானாமதுரை மெமு சிறப்பு ரயில் (06161 / 06162) வண்டி எண் 06161 கொண்ட தாம்பரம் – மானாமதுரை மெமு சிறப்பு ரயில், அக்டோபர் 16 (வெள்ளிக்கிழமை) மாலை 17:30 மணிக்குத் தாம்பரத்திலிருந்து புறப்பட்டு, மறுநாள் அதிகாலை 03:00 மணிக்கு மானாமதுரை சென்றடையும். மறுமார்க்கத்தில், வண்டி எண் 06162 கொண்ட மானாமதுரை – தாம்பரம் மெமு ரயில், அக்டோபர் 17 (சனிக்கிழமை) காலை 10:45 மணிக்கு மானாமதுரையிலிருந்து புறப்பட்டு, அதே நாள் இரவு 20:30 மணிக்குத் தாம்பரம் வந்தடையும். இந்த ரயில்கள் செங்கல்பட்டு, மேல்மருவத்தூர், விழுப்புரம், விருத்தாசலம், அரியலூர், ஸ்ரீரங்கம், திருச்சி, மணப்பாறை, திண்டுக்கல், சோழவந்தான், மதுரை, திருப்புவனம் ஆகிய நிலையங்களில் நின்று செல்லும்.

இதையும் படிங்க: "சோலி முடிஞ்சது".! ரயில்களில் சத்தமாக பாட்டுக் கேட்டால் ஜெயில்..! தெற்கு ரயில்வே வார்னிங்.!!

தாம்பரம் – மானாமதுரை மெமு சிறப்பு ரயில் (06159 / 06160) வண்டி எண் 06159 கொண்ட ரயில், அக்டோபர் 17 (சனிக்கிழமை) இரவு 23:55 மணிக்குத் தாம்பரத்திலிருந்து புறப்பட்டு, மறுநாள் காலை 11:00 மணிக்கு மானாமதுரை சென்றடையும். மறுமார்க்கத்தில் வண்டி எண் 06160 கொண்ட ரயில், அக்டோபர் 20 (செவ்வாய்க்கிழமை) பிற்பகல் 14:45 மணிக்கு மானாமதுரையிலிருந்து புறப்பட்டு, அதே நாள் இரவு 23:45 மணிக்குத் தாம்பரம் வந்தடையும்.

சென்னை எழும்பூர் – திருச்சி ஒருவழி சிறப்பு ரயில் (06191 / 06192) வண்டி எண் 06191 கொண்ட சிறப்பு ரயில், அக்டோபர் 16 (வெள்ளிக்கிழமை) இரவு 19:00 மணிக்கு சென்னை எழும்பூரிலிருந்து புறப்பட்டு, மறுநாள் அதிகாலை 04:05 மணிக்குத் திருச்சி சென்றடையும். இந்த ரயில் தாம்பரம், செங்கல்பட்டு, மேல்மருவத்தூர், விழுப்புரம், பண்ருட்டி, திருப்பாதிரிப்புலியூர், சிதம்பரம், சீர்காழி, வைத்தீஸ்வரன்கோயில், மயிலாடுதுறை, கும்பகோணம், தஞ்சாவூர் வழியாக இயக்கப்படும். அதேபோல், வண்டி எண் 06192 கொண்ட திருச்சி – சென்னை எழும்பூர் சிறப்பு ரயில், அக்டோபர் 17 (சனிக்கிழமை) அதிகாலை 05:50 மணிக்குத் திருச்சியிலிருந்து புறப்பட்டு, அதே நாள் முற்பகல் 11:45 மணிக்கு சென்னை எழும்பூர் வந்தடையும்.

சென்னை எழும்பூர் – திருச்சி மெமு சிறப்பு ரயில்கள் (06193 / 06194) வண்டி எண் 06193 கொண்ட ரயில், அக்டோபர் 17 (சனிக்கிழமை) இரவு 19:00 மணிக்கு எழும்பூரிலிருந்து புறப்பட்டு, மறுநாள் அதிகாலை 04:45 மணிக்குத் திருச்சி சென்றடையும். மறுமார்க்கத்தில் வண்டி எண் 06194 கொண்ட ரயில், அக்டோபர் 20 (செவ்வாய்க்கிழமை) இரவு 22:45 மணிக்குத் திருச்சியிலிருந்து புறப்பட்டு, மறுநாள் காலை 06:50 மணிக்கு சென்னை எழும்பூர் வந்தடையும்.

இந்தச் சிறப்பு ரயில்கள் அனைத்தும் 12 பெட்டிகளைக் கொண்ட மின்சார மெமு ரயில்களாக இயக்கப்படுவதால், கடைசி நேரப் பயணத் திட்டங்களை வகுக்கும் தென் மாவட்டப் பயணிகளுக்கு இது பெரும் நிம்மதியை அளித்துள்ளது.

இதையும் படிங்க: காந்தி ஜெயந்தி தொடர் விடுமுறை: சொந்த ஊர் செல்வோருக்கு தெற்கு ரயில்வே சிறப்பு ரயில்கள் அறிவிப்பு!