லண்டன்: தமிழக முதலமைச்சர் விஜய், பிரிட்டன் அரசுமுறைப் பயணத்தின் ஒரு பகுதியாக புகழ்பெற்ற சில்வர்ஸ்டோன் பந்தயச் சுற்றுக்கு வருகை தந்தார். சர்வதேச மோட்டார் ஸ்போர்ட்ஸ் அரங்கில் முக்கியத்துவம் பெற்ற சில்வர்ஸ்டோன் சர்க்யூட்டில் நடைபெற்ற ‘மிச்செலின் லே மான்ஸ் கப்’ கார் பந்தயத் தொடரில் அவர் சிறப்பு அழைப்பாளராகக் கலந்து கொண்டார்.

ரேசிங் சூட் அணிந்தபடி பந்தயக் களத்திற்கு வந்த முதலமைச்சர் விஜய், 44 கார் பந்தய வீரர்கள் அணிவகுத்து நின்ற நிகழ்வில் பங்கேற்றதுடன், போட்டியை பச்சைக் கொடியசைத்து முறைப்படி தொடங்கி வைத்தார். சர்வதேச தரத்திலான மோட்டார் ஸ்போர்ட்ஸ் போட்டியை நேரில் பார்வையிட்ட அவர், பந்தய ஏற்பாடுகள், பாதுகாப்பு கட்டமைப்பு உள்ளிட்ட பல்வேறு அம்சங்களையும் கவனித்தார்.

இந்த நிகழ்வில் நடிகர் அஜித்குமாரும் ‘அஜித் குமார் ரேசிங்’ அணியின் சார்பில் பந்தய வீரராகக் களமிறங்கினார். போட்டி நடைபெறும் இடத்தில் அஜித்தை நேரில் சந்தித்த முதலமைச்சர் விஜய், அவரை கட்டித்தழுவி தனது வாழ்த்துகளைத் தெரிவித்தார். இருவரும் ரேசிங் உடையில் சந்தித்துக் கொண்ட காட்சிகள் தற்போது சமூக வலைதளங்களில் வேகமாகப் பரவி வருகின்றன.

இதையும் படிங்க: நாமக்கல் கவிஞர் மாளிகையில் முதல்வர் அலுவலகம்!! ஒப்பந்த நிறுவனம் பணியை தொடங்குவதில் சிக்கல்? பின்னணி என்ன?

தமிழ் திரையுலகில் நீண்ட காலமாக இருவரும் போட்டியாளர்களாக ரசிகர்களால் பார்க்கப்பட்டு வந்த நிலையில், சர்வதேச விளையாட்டு அரங்கில் இருவரும் ஒரே இடத்தில் சந்தித்துக் கொண்ட இந்த தருணம் ரசிகர்களின் கவனத்தை வெகுவாக ஈர்த்துள்ளது. குறிப்பாக, அஜித்தின் மோட்டார் ஸ்போர்ட்ஸ் ஆர்வத்துக்கும், தமிழகத்தின் விளையாட்டு உள்கட்டமைப்பு மேம்பாட்டுக்கும் இடையே இந்த சந்திப்பு முக்கியத்துவம் பெற்றுள்ளது.

தமிழகத்தில் உலகத் தரத்திலான ‘மோட்டார் ஸ்போர்ட்ஸ் நகரம்’ அமைக்கப்படும் என ஏற்கனவே அறிவிக்கப்பட்டுள்ள நிலையில், சில்வர்ஸ்டோன் சர்க்யூட்டிற்கான முதலமைச்சரின் இந்தப் பார்வையும் கவனம் பெற்றுள்ளது. சர்வதேச தரத்தில் பந்தயங்களை நடத்துவதற்குத் தேவையான உள்கட்டமைப்பு, பாதுகாப்பு நடைமுறைகள் மற்றும் போட்டி ஏற்பாடுகளை நேரில் அறிந்து கொள்வதற்கான வாய்ப்பாக இந்தப் பயணம் பார்க்கப்படுகிறது.

இதனிடையே, ரேசிங் சூட்டில் விஜய், பந்தயக் களத்தில் அஜித் என வெளியாகி வரும் புகைப்படங்கள் இணையத்தில் ரசிகர்களிடையே பெரும் வரவேற்பைப் பெற்று வருகின்றன.

இதையும் படிங்க: கொடநாடு வாசல்ல வாட்ச்மேன் மாதிரி நின்னவரு! இன்னைக்கு திமுகவையே எதிர்க்கிறாரு? விஜயை விமர்சித்த அன்பில் மகேஷ்!