சென்னை: கேரளா, கர்நாடகா அதிகாரிகள் விதித்த லட்சக்கணக்கான அபராதம், சாலை வரி பிரச்சினை காரணமாக 18 நாட்களாக நின்று போன தமிழக ஆம்னி பஸ்கள் நேற்று முதல் (நவம்பர் 28, 2025) மீண்டும் வெளிமாநிலங்களுக்கு ஓடத் தொடங்கின. போக்குவரத்து அமைச்சர் எஸ்.எஸ். சிவசங்கருடன் நடந்த நீண்ட பேச்சுவார்த்தைக்குப் பின் உடன்பாடு ஏற்பட்டதால், 230-க்கும் மேற்பட்ட ஆம்னி பஸ்கள் சாலையில் இறங்கின.

கடந்த நவம்பர் 7-ம் தேதி கேரளா சென்ற தமிழக ஆம்னி பஸ்களுக்கு 70 லட்சம் ரூபாய் வரை அபராதம் விதித்ததால் ஆத்திரமடைந்த அனைத்து ஆம்னி பஸ் உரிமையாளர்கள் சங்கம், தமிழகத்தில் இருந்து கேரளா, கர்நாடகா, ஆந்திரா, தெலங்கானா உள்ளிட்ட மாநிலங்களுக்கு செல்லும் அனைத்து பஸ்களையும் நிறுத்தியது. 
இதனால் தினமும் 4 கோடி ரூபாய் இழப்பு ஏற்பட்டது, 18 நாட்களில் மொத்தம் 84 கோடி ரூபாய்க்கு மேல் நஷ்டம் ஏற்பட்டது. சபரிமலை அய்யப்ப பக்தர்கள், சுற்றுலா பயணிகள், தினசரி பயணிகள் என ஆயிரக்கணக்கானோர் கடுமையாக பாதிக்கப்பட்டனர்.

அனைத்து ஆம்னி பஸ் உரிமையாளர்கள் சங்கத் தலைவர் அன்பழகன் கூறுகையில், “மத்திய அரசின் ‘ஆல் இந்தியா டூரிஸ்ட் பர்மிட்’ விதிப்படி எந்த மாநிலமும் சாலை வரி வசூலிக்கக் கூடாது. ஆனால் கேரளா, கர்நாடகா தொடர்ந்து வசூலித்து வருகின்றன. இதை எதிர்த்துத்தான் போராட்டம் நடத்தினோம். 

இதையும் படிங்க: இலங்கையை புரட்டிப்போடும் டிட்வா! ரத்தாகும் விமானங்கள்! கொழும்புவில் சிக்கித்தவிக்கும் 300 இந்தியர்கள்!

அமைச்சர் சிவசங்கரும், போக்குவரத்து ஆணையர் கஜலட்சுமியும் எங்களை அழைத்து பேசினார்கள். எங்கள் கோரிக்கைகளை முதல்வரிடம் எடுத்துச் சென்று நிரந்தரத் தீர்வு காண்பதாக உறுதி அளித்தார்கள். அதை நம்பி, பயணிகள் நலனையும் சபரிமலை பக்தர்கள் நலனையும் கருதி நேற்று முதல் பஸ்களை இயக்கத் தொடங்கினோம்” என்றார்.

தமிழக போக்குவரத்துத் துறை அதிகாரிகள் தரப்பில், “கேரளா, கர்நாடகா மாநிலங்களுடன் பேச்சு நடத்தி, பரஸ்பர ஒப்பந்தம் மூலம் வரி பிரச்சினையைத் தீர்க்க முயற்சி செய்கிறோம். மத்திய அரசுக்கும் இது தொடர்பாக புகார் அளிக்கப்படும்” என்று தெரிவித்தனர். இதனால், சபரிமலை சீசன் தொடங்கியுள்ள நிலையில், பயணிகள் பெரும் நிம்மதி அடைந்துள்ளனர்.

இதையும் படிங்க: ‘வந்தே மாதரம்’ 150! பார்லி.,யில் ஒருநாள் முழுக்க விவாதம்! எதிர்க்கட்சிகளை மடக்க மோடி ‘மாஸ்டர் ஸ்ட்ரோக்’!