தோல்வியை கண்டு தி.மு.க. என்றைக்கு பயந்தது? 2027-ல் மீண்டும் ஸ்டாலின் தான் முதல்வர்" - மணிமாறன் எம்.எல்.ஏ.செயல் வீரர்கள் கூட்டத்தில் பேச்சு.
மதுரை தெற்கு மாவட்ட தி.மு.க. சார்பில் கழக மறு சீரமைப்பு குறித்த ஆலோசனை மற்றும் செயல்வீரர்கள் கூட்டம் திருமங்கலத்தில் உள்ள தனியார் திருமண மண்டபத்தில் நடைபெற்றது.
இக்கூட்டத்திற்கு மதுரை தெற்கு மாவட்ட செயலாளரும், திருமங்கலம் சட்டமன்ற உறுப்பினருமான சேடப்பட்டி மு.மணிமாறன் எம்.எல்.ஏ. தலைமை தாங்கி சிறப்புரையாற்றினார்.
இதையும் படிங்க: மோடியுடன் ஒரே காரில் முதல்வர் விஜய் பயணம்! ஐஐடியில் மலர் தூவி வரவேற்பு! ஜலகண்டேஸ்வரர் கோயிலில் சாமி தரிசனம்!
அப்போது அவர் பேசியதாவது:- நடைபெற்று முடிந்த இடைத்தேர்தலில் நமது தெற்கு மாவட்டத்திற்கு ஒதுக்கப்பட்ட நான்கு பாகங்களில் திராவிட முன்னேற்றக் கழகம் உதயசூரியன் சின்னத்தில் அதிக வாக்குகளை பெற்றுள்ளது. ஒட்டுமொத்தமாக மதுரை, திருப்பரங்குன்றம், திருமங்கலம், உசிலம்பட்டி சட்டமன்ற தொகுதி நிர்வாகிகளுக்கு எனது நெஞ்சம் நிறைந்த நன்றியை தெரிவித்துக் கொள்கிறேன்.
இவ்வளவு இக்கட்டான சூழ்நிலையிலும் நாம் அங்கே ஒரு வெற்றியை பெற்று வந்திருக்கிறோம். இரண்டாவது இடத்திற்கு வந்திருக்கிறோம். தோல்வியை கண்டு என்றைக்கு தி.மு.க. பயந்திருக்கிறது? தோல்வியில் தான் நமக்கு பாடமே இருக்கிறது. தோல்விக்கு பின்பு தான் மிகப்பெரிய வெற்றி இருக்கிறது.
2027 மே மாதத்தில் நடைபெறக்கூடிய சட்டமன்ற தேர்தலில் நிச்சயமாக மக்களுடைய பெரும் ஆதரவோடு நம்முடைய ஒப்பற்ற தலைவர் தளபதி மு.க.ஸ்டாலின் அவர்கள் மீண்டும் முதலமைச்சராக வருவார் என்று உறுதியாக சொல்கிறேன். உங்களை உற்சாகப்படுத்துவதற்காக இதை சொல்லவில்லை.
தி.மு.க. மூன்றாவது இடத்திற்கு போய்விடும், டெபாசிட் காலியாகிவிடும் என்று சொன்னார்கள். ஆனால் நாம் நேர்மையான தேர்தலை சந்தித்து கிட்டத்தட்ட 57 ஆயிரம், 58 ஆயிரம் வாக்குகளை பெற்றிருக்கிறோம். மக்கள் மனதில் நீங்காத இடம் பெற்றிருக்கிறோம்.
நாம் வேலை பார்த்த கன்னிவாடி பேரூராட்சியில் முழுமையாக வெற்றி பெற்று வந்திருக்கிறோம். தேர்தலின்போது எதிர்க்கட்சியினர் அத்துமீறி பணம் கொடுத்தனர். விஜய் தன்னுடைய ஆட்கள் மூலம், அ.தி.மு.க. வாக்காளர்களுக்கு பணம் கொடுத்ததை கையும் களவுமாக பிடித்து வந்தோம். கிட்டத்தட்ட 35 ஆயிரம் அ.தி.மு.க. வாக்காளர்களுக்கு பணம் கொடுத்து அவர்களது வாக்குகளை பெரும்பகுதி வாங்கியிருக்கிறார்கள்.
வரக்கூடிய எந்த தேர்தலாக இருந்தாலும் வெற்றியை நோக்கிதான் உங்கள் பயணம் இருக்கப் போகிறது. யாரும் கவலைப்பட வேண்டாம். தலைவர் சொன்னது போல் நிர்வாகிகள் சுய பரிசோதனை செய்து கொள்ளுங்கள். நமது செயல்பாட்டை எப்படி மாற்றிக் கொள்ள வேண்டும் என்பதை மாற்றிக் கொள்ளுங்கள்.
மக்களிடத்தில் உள்ள குறைகளை திண்ணை பிரச்சாரமாக எடுத்துச் சொல்லுங்கள். அப்போது தான் நமக்கான வெற்றி வாய்ப்பு நிச்சயமாக இருக்கும். வரக்கூடிய தேர்தல் நமக்கும் மக்களுக்குமான கூட்டணி தான். மக்களோடு கூட்டணி சேர்ப்போம், மக்கள் கருத்தை கேட்போம் என்று பேசினார்.
இதையும் படிங்க: பிரதமர் மோடிக்கு முதல்வர் விஜய் கொடுத்த ஸ்பெஷல் பரிசு! மெட்ரோ தொடக்க விழாவில் கவனம் ஈர்த்த தருணம்!