தமிழக அரசியலில் 2026 சட்டமன்றத் தேர்தலுக்குப் பிறகு ஏற்பட்டுள்ள கூட்டணி மற்றும் பெரும்பான்மை நெருக்கடியின் பின்னணியில், அதிமுகவின் முன்னாள் அமைச்சரும் காஞ்சிபுரம் தொகுதியின் முன்னாள் வேட்பாளருமான வி. சோமசுந்தரம் தனது கடுமையான விமர்சனத்தை வெளிப்படுத்தியுள்ளார்.
தமிழக வெற்றி கழகம் தரப்புக்கு ஆதரவாக சென்றதாகக் கூறப்படும் அதிமுகவின் 25 எம்.எல்.ஏ.க்களை நேரடியாகக் குற்றம் சாட்டிய அவர், அவர்களின் முடிவு தமிழக அரசியலை எவ்வாறு பாதித்தது என்பதை விரிவாகத் தெரிவித்தார். சோமசுந்தரம் தனது பேச்சில், “தவெகவிற்கு சென்ற 25 எம்.எல்.ஏ.க்களும் இன்னும் இரண்டு மாதங்கள் அமைதியாக அதிமுகவிலேயே இருந்திருந்தால், தமிழகத்தில் கண்டிப்பாக மீண்டும் தேர்தல் நடந்திருக்கும்” என்று தெரிவித்தார்.
இந்தக் கருத்து அதிமுக தரப்பில் பெரும் அதிர்வலைகளை ஏற்படுத்தியுள்ளது. தேர்தலுக்குப் பிந்தைய சூழலில் அதிமுகவுக்குள் ஏற்பட்ட பிளவு மற்றும் சில எம்.எல்.ஏ.க்களின் மாற்று அணுகுமுறை ஆகியவை கட்சியின் உள்ளார்ந்த பலவீனத்தை வெளிப்படுத்துவதாக அவர் சுட்டிக்காட்டினார்.
இதையும் படிங்க: அதிமுகவில் தவெக குதிரை பேர வியாபாரம் நடத்தியது! எடப்பாடி பழனிசாமி அதிரடி குற்றச்சாட்டு!
மேலும், “8 பேரை நம்ப முடியாமல்தான், பெரும்பான்மைக்காக அதிமுகவின் 25 எம்.எல்.ஏ.க்களை தவெகவினர் விலைபேசி வளைத்து போட்டுள்ளனர்” என்று கூறிய சோமசுந்தரம், இந்த நகர்வை ஒரு திட்டமிட்ட செயல்பாடாக விவரித்தார். அதிமுகவின் உள்ளாட்சி மற்றும் மாவட்ட அளவிலான தலைவர்கள் மத்தியில் இந்த விவகாரம் பெரும் கொந்தளிப்பை ஏற்படுத்தியுள்ளது. பலர் இதை அதிமுகவின் ஒற்றுமையை சீர்குலைக்கும் செயலாகப் பார்க்கின்றனர்.
இதையும் படிங்க: “அவரெல்லாம் ஒரு பொருட்டே இல்லை...” - செம்மலை விலகல் குறித்து ஒரே போட்டாய் போட்ட அக்ரி கிருஷ்ணமூர்த்தி...!