தனியார் பள்ளிகளுக்கு நிரந்தர அங்கீகாரம் வழங்குவதற்காக ரூ.400 கோடி லஞ்சம் பெற்றதாக எழுந்துள்ள புகார் தொடர்பான வழக்கில், முன்னாள் அமைச்சர் அன்பில் மகேஷ் பொய்யாமொழியை 3 நாட்கள் போலீஸ் காவலில் எடுத்து விசாரிக்க ஊழல் தடுப்பு சிறப்பு நீதிமன்றம் அனுமதி அளித்துள்ளது.

தமிழகத்தில் செயல்பட்டு வரும் தனியார் பள்ளிகளுக்கு நிரந்தர அங்கீகாரம் வழங்குவதில் ரூ.400 கோடி லஞ்சம் பெறப்பட்டதாகக் கூறப்படும் புகாரை சென்னை மத்திய குற்றப்பிரிவு போலீசார் விசாரித்து வருகின்றனர். இந்த வழக்கில் திமுக முன்னாள் அமைச்சர் அன்பில் மகேஷ் பொய்யாமொழி கடந்த 26ஆம் தேதி கைது செய்யப்பட்டார்.

இதையடுத்து அவர் நீதிமன்றத்தில் ஆஜர்படுத்தப்பட்டு, வரும் 6ஆம் தேதி வரை நீதிமன்றக் காவலில் சென்னை புழல் சிறையில் அடைக்கப்பட்டுள்ளார். இதற்கிடையே, அன்பில் மகேஷை போலீஸ் காவலில் எடுத்து விசாரிக்க அனுமதி கோரி மத்திய குற்றப்பிரிவு போலீசார் சிறப்பு நீதிமன்றத்தில் மனு தாக்கல் செய்தனர். அவரும் முன்ஜாமீன் கோரி மனு அளித்திருந்தார்.

இதையும் படிங்க: அன்பில் மகேஷ் வழக்கில் திருப்பம்! வங்கிக் கணக்குகளை அலசும் அமலாக்கத்துறை! கிடுக்கிப்பிடி விசாரணை!!

போலீஸ் காவல் கோரும் மனு மீதான விசாரணை முடிவடைந்த நிலையில், தீர்ப்பை இன்று வழங்குவதாக நீதிமன்றம் ஒத்திவைத்திருந்தது. அதன்படி இன்று மீண்டும் விசாரணைக்கு வந்த வழக்கில், அன்பில் மகேஷை இன்று மதியம் 1 மணி முதல் வரும் 4ஆம் தேதி மாலை வரை போலீஸ் காவலில் வைத்து விசாரிக்க நீதிமன்றம் அனுமதி வழங்கியது.

விசாரணையைத் தொடங்குவதற்கு முன்பாக அன்பில் மகேஷுக்கு மருத்துவப் பரிசோதனை நடத்த வேண்டும் என்று நீதிமன்றம் உத்தரவிட்டுள்ளது. மேலும், போலீஸ் விசாரணையின்போது அவருக்கு உடல் ரீதியாகவோ, மன ரீதியாகவோ எந்தவிதமான துன்புறுத்தலும் அளிக்கக் கூடாது என்றும் தெளிவுபடுத்தியுள்ளது.

விசாரணை நடைபெறும் நேரத்தில் வழக்கறிஞர் உடனிருக்கவும் நீதிமன்றம் அனுமதி அளித்துள்ளது. மூன்று நாட்கள் போலீஸ் விசாரணை முடிந்ததும், வரும் 5ஆம் தேதி மாலை 5 மணிக்கு அன்பில் மகேஷை மீண்டும் நீதிமன்றத்தில் ஆஜர்படுத்த வேண்டும் என்றும் உத்தரவிடப்பட்டுள்ளது.

இதையும் படிங்க: ஜாமீன் மனு விசாரணை ஒத்திவைப்பு! புழல் சிறையில் உதயநிதி - அன்பில் மகேஷ் மீண்டும் சந்திப்பு!