பாஜக முன்னாள் மாநிலத் தலைவர் அண்ணாமலை தமிழக சட்டசபைத் தேர்தலில் போட்டியிடவில்லை என உறுதியாகியுள்ளது. இது பாஜக வட்டாரத்தில் பெரும் பரபரப்பை ஏற்படுத்தியுள்ளது.

ஏப்ரல் 3ஆம் தேதி பாஜக தரப்பில் அதிமுக கூட்டணியில் போட்டியிடும் 27 தொகுதிகளுக்கான வேட்பாளர்கள் பட்டியல் வெளியிடப்பட்டது. இதில் மயிலாப்பூரில் தமிழிசை சௌந்தரராஜன், அவினாசி (தனி) எல். முருகன், கோவை வடக்கில் வானதி சீனிவாசன், சாத்தூரில் நயினார் நாகேந்திரன், விளவங்கோடு தொகுதியில் எஸ். விஜயதாரணி உள்ளிட்டோர் இடம்பெற்றுள்ளனர்.

அண்ணாமலை தேர்தலில் போட்டியிட மாட்டார் என முன்பே திட்டவட்டமாகக் கூறிவந்த நிலையில், அவரை போட்டியிட வைக்க தேசிய பாஜக தலைமை கடுமையாக முயற்சி செய்தது. கோவை வடக்கு தொகுதியை அண்ணாமலை கேட்டதாகவும், ஆனால் அந்தத் தொகுதி வானதி சீனிவாசனுக்கு ஒதுக்கப்பட்டதாகவும் தகவல்கள் வெளியானது. வானதி ஏற்கனவே 2021ல் கோவை தெற்கு தொகுதியில் வெற்றி பெற்றவர்.

இதையும் படிங்க: பிரதமர் மோடி வரும் நேரமாச்சு!! பாஜக வேட்பாளர் பட்டியல் எப்போது?! நயினார் நாகேந்திரன் கொடுத்த அப்டேட்!

திருப்பூர் தெற்கு தொகுதியில் தங்கராஜும், மொடக்குறிச்சி தொகுதியில் சரஸ்வதியின் மருமகள் கிருத்திகா சிவகுமாரும் பாஜக சார்பில் போட்டியிடுகின்றனர். அண்ணாமலைக்கு திருப்பூர் தெற்கு அல்லது மொடக்குறிச்சி தொகுதிகளில் ஒன்றை வழங்க பேச்சுவார்த்தை நடந்ததாகக் கூறப்பட்டது.

அண்ணாமலை 2021ல் அரவக்குறிச்சி தொகுதியில் போட்டியிட்டு தி.மு.க.வின் இளங்கோவிடம் சுமார் 25,000 வாக்குகள் வித்தியாசத்தில் தோல்வியடைந்தார். ‘என் மண் என் மக்கள்’ பயணத்தின் மூலம் தமிழகம் முழுவதும் மக்களைச் சந்தித்த அவர், பாஜகவின் வளர்ச்சிக்கு முக்கியப் பங்காற்றியதாகக் கருதப்படுகிறார். 2020ல் ஐபிஎஸ் அதிகாரியாக இருந்தபோது பாஜகவில் இணைந்த அவர், விரைவில் மாநிலத் தலைவராக உயர்ந்தார். 2025 ஏப்ரல் வரை அந்தப் பதவியில் இருந்து விலகினார்.

தற்போது அண்ணாமலை புதுச்சேரிக்குப் பிறகு கேரளாவில் பிரசாரம் செய்து வருகிறார். தேர்தலில் போட்டியிடாமல் ஐந்து மாநிலங்களில் பாஜக மற்றும் கூட்டணி வேட்பாளர்களுக்கு ஆதரவாக பிரசாரம் செய்யத் தயாராக இருப்பதாக அவர் தெரிவித்துள்ளார்.

அண்ணாமலை போட்டியிடாதது அவரது ஆதரவாளர்களிடையே சற்று அதிருப்தியை ஏற்படுத்தியுள்ளது. சென்னையில் பிரதமர் மோடி நடத்தும் முக்கிய ஆலோசனைக் கூட்டத்தில் அண்ணாமலை கட்டாயம் பங்கேற்க வேண்டும் என அவருக்கு அழைப்பு விடுக்கப்பட்டுள்ளதாகத் தகவல்கள் தெரிவிக்கின்றன.

தேர்தலில் போட்டியிடாதது அண்ணாமலைக்கு கட்சியில் பின்னடைவை ஏற்படுத்துமா அல்லது பாஜகவுக்கு பாதிப்பை ஏற்படுத்துமா என்பது வரும் தேர்தல் முடிவுகளில் தெரியவரும் என அரசியல் வட்டாரங்கள் கருதுகின்றன.

இதையும் படிங்க: பாஜகவில் தீவிர உள்ளடி வேலை! ஐடியாவை மாற்றிய அண்ணாமலை! கொதித்துப்போன ஆதரவாளர்கள்!