திருச்சியில் பாஜக சார்பில் நடைபெற்ற "நம்ம ஊரு மோடி பொங்கல்" விழாவில் தமிழக பாஜக முன்னாள் தலைவர் கே. அண்ணாமலை பங்கேற்று உரையாற்றினார். இந்த விழா தமிழர் கலாச்சாரத்தை கொண்டாடும் வகையில் ஏற்பாடு செய்யப்பட்டது. 

அண்ணாமலை தனது உரையில் தமிழக அரசியல் சூழலை சாடியதோடு, திமுகவின் தேர்தல் வாக்குறுதிகளை கிண்டலடித்து பேசினார். இது அரசியல் வட்டாரங்களில் பரபரப்பை ஏற்படுத்தியுள்ளது.

விழாவில் அண்ணாமலை பேசுகையில், "தமிழகத்தில் ஜல்லிக்கட்டு போட்டிகள் மீண்டும் நடைபெற பாஜகவே காரணம். உலக வரலாற்றில் எந்த நாகரிகத்திலும் இல்லாத சிறப்பு நமது பொங்கல் விழாவுக்கு உண்டு. மனித நாகரிகம் மற்றும் கலாச்சாரத்தில் பழையது கழிந்து புதியது வர வேண்டும் என்ற கருத்து உள்ளது. 

இதையும் படிங்க: திருத்தணியில் மற்றொரு வன்முறை சம்பவம்... தொழிலதிபர் மீது தாக்குதல் நடத்திய கும்பல்... அண்ணாமலை கண்டனம்..!

நான்கு நாட்கள் கொண்டாடப்படும் பொங்கல் தமிழர் கலாச்சாரத்தில் மட்டுமே தொடர்கிறது. பாஜக சில ஆண்டுகளாக 'நம்ம ஊரு பொங்கல்' என்ற பெயரில் மக்களுடன் இணைந்து கொண்டாடி வருகிறது" என்று கூறினார்.

தொடர்ந்து திமுகவின் வாக்குறுதிகளை சாடிய அண்ணாமலை, "ஒரு காளை வளர்ப்பவர்களுக்கு அந்த காளையை வளர்ப்பது எவ்வளவு கஷ்டம் என்று தெரியும். திமுக 2021 தேர்தல் வாக்குறுதியில் காளை வளர்ப்பவர்களுக்கு மாதம் ஆயிரம் ரூபாய் கொடுப்போம் என்று சொல்லியிருந்தது. 

நியாயப்படி இப்போது கணக்கு போட்டால், மாதம் ஆயிரம் ரூபாய் வீதம் எனக்கே 48 ஆயிரம் ரூபாய் கொடுக்க வேண்டும். காளை வளர்க்கும் எல்லோருக்கும் கொடுக்க வேண்டும். ஆனால் திமுக ஆட்சிக்கு வந்து 4 ஆண்டுகள் முடிந்து விட்டது. ஆட்சியே முடியப் போகிறது. ஆனால் அந்த வாக்குறுதி நிறைவேற்றப்படவில்லை" என்று கிண்டலடித்தார்.

மேலும், "முதல்வர் ஸ்டாலின் காளை வளர்ப்பவர்களை ஊக்குவிக்க வேண்டும். இந்த அரசு மகளிருக்கு பாதுகாப்பாக இருக்க வேண்டும். ஆனால் இப்போது அரசு பாதுகாப்பாக இல்லை. எல்லா தேர்தல் வாக்குறுதிகளையும் நிறைவேற்ற வேண்டும். இந்த பொங்கல் விழாவில் முதல்வர் ஸ்டாலினுக்கு வேண்டுகோளாக சொல்கிறேன்" என்று அண்ணாமலை தெரிவித்தார். இந்த பேச்சு திமுகவினரிடையே விமர்சனங்களை எழுப்பியுள்ளது.

பாஜகவின் இந்த பொங்கல் விழா தமிழகத்தில் கட்சியின் செல்வாக்கை அதிகரிக்கும் வகையில் அமைந்துள்ளது. அண்ணாமலையின் உரை தமிழர் கலாச்சாரத்தை பாராட்டியதோடு, அரசியல் சாடல்களையும் கொண்டிருந்தது. 2026 சட்டமன்றத் தேர்தல் நெருங்கி வரும் நிலையில், இத்தகைய நிகழ்ச்சிகள் அரசியல் கட்சிகளின் உத்திகளாக பார்க்கப்படுகின்றன.

இதையும் படிங்க: 17 அமைச்சர்கள் மீது ஊழல் குற்றச்சாட்டு... இனிமேதான் எங்க ஆட்டம் இருக்கு... நயினார் உறுதி...!