பகுஜன் சமாஜ் கட்சியின் தமிழக மாநிலத் தலைவராக இருந்த கே. ஆம்ஸ்ட்ராங், 2024 ஆம் ஆண்டு ஜூலை 5 ஆம் தேதி சென்னை பெரம்பூரில் உள்ள தனது வீட்டிற்கு அருகே கொடூரமாக வெட்டிக் கொல்லப்பட்டார். உணவு டெலிவரி செய்வது போல போலி வேடமிட்ட ஒரு கும்பல் அவரைத் தாக்கியது. அந்தத் தாக்குதலில் அவர் படுகாயமடைந்து மருத்துவமனைக்குச் செல்லும் வழியில் உயிரிழந்தார். இந்தச் சம்பவம் தமிழகம் முழுவதும் பெரும் அதிர்ச்சியையும் அதிர்வலையையும் ஏற்படுத்தியது.ஆரம்பத்தில் செம்பியம் காவல்நிலையம் விசாரணையை மேற்கொண்டது. பிரத்யேக விசாரணைக் குழு அமைக்கப்பட்டு பலர் கைது செய்யப்பட்டனர்.

கும்பல் போட்டியும், முன்னாள் குற்றவாளியான ஆற்காடு சுரேஷ் கொலைக்குப் பழிவாங்கும் நோக்கமும் இந்தக் கொலைக்குக் காரணம் எனக் காவல்துறை குற்றப்பத்திரிகையில் குறிப்பிட்டது. நாகேந்திரன் உள்ளிட்டோர் முக்கியக் குற்றவாளிகளாகப் பெயரிடப்பட்டனர். நாகேந்திரன் பின்னர் உடல்நலக்குறைவால் இறந்தார். மற்றொரு குற்றவாளி என்கவுண்டரில் கொல்லப்பட்டார். சிலர் இன்னும் தலைமறைவாகவே உள்ளனர். சுமார் முப்பது பேர் குற்றவாளிகளாகப் பெயரிடப்பட்டு, பலர் கைது செய்யப்பட்டு சிறையில் அடைக்கப்பட்டனர்.

ஆம்ஸ்ட்ராங்கின் குடும்பத்தினர், குறிப்பாக அவரது சகோதரர் இமானுவேல், மாநிலக் காவல்துறை விசாரணை நியாயமாகவும் முழுமையாகவும் நடைபெறவில்லை எனக் குற்றம்சாட்டினர். அரசியல் பின்னணி உள்ளதாகவும், முக்கிய அம்சங்கள் புறக்கணிக்கப்பட்டதாகவும் குற்றச்சாட்டுகள் எழுந்தன. இதையடுத்து சென்னை உயர்நீதிமன்றத்தில் மனு தாக்கல் செய்யப்பட்டது. 2025 ஆம் ஆண்டு செப்டம்பரில் உயர்நீதிமன்றம் மாநிலக் காவல்துறையின் குற்றப்பத்திரிகையை ரத்து செய்து, வழக்கை சிபிஐ விசாரணைக்கு மாற்றி உத்தரவிட்டது. தமிழக அரசு இதை எதிர்த்து உச்சநீதிமன்றத்தில் மேல்முறையீடு செய்தது. உச்சநீதிமன்றம் சில உத்தரவுகளுக்கு இடைக்காலத் தடை விதித்தது. பின்னர் தமிழக அரசு தனது மேல்முறையீட்டைத் திரும்பப் பெற்றதால், 2026 ஆம் ஆண்டு ஜூலை-ஆகஸ்ட் மாதங்களில் சிபிஐ வழக்கை முறையாக ஏற்றுக்கொண்டு மீண்டும் பதிவு செய்தது.

இதையும் படிங்க: ஆம்ஸ்ட்ராங் கொடூர கொலை வழக்கு..! மேலும் 5 பேருக்கு நிபந்தனை ஜாமீன்... ஹைகோர்ட் உத்தரவு..!!

சிபிஐ அதிகாரிகள் கொலை நடந்த இடத்திற்குச் சென்று விசாரணையைத் தொடங்கினர்.இதற்கிடையே குற்றம்சாட்டப்பட்ட பலர் ஜாமினில் வெளியே வந்தனர். சிலருக்கு உயர்நீதிமன்றம் ஜாமினை ரத்து செய்தாலும், உச்சநீதிமன்றம் அதற்கு இடைக்காலத் தடை விதித்தது. சமீபத்தில் மேலும் சிலருக்கு நிபந்தனை ஜாமின் வழங்கப்பட்டது. இப்போது பெரும்பாலான குற்றம்சாட்டப்பட்டோர் ஜாமினில் உள்ளனர்.இந்தச் சூழலில் சிபிஐ உச்சநீதிமன்றத்தில் நிலை அறிக்கை தாக்கல் செய்துள்ளது. நியாயமான மற்றும் சுதந்திரமான விசாரணை நடைபெற வேண்டுமானால், குற்றம்சாட்டப்பட்டோருக்கு வழங்கப்பட்ட ஜாமினை ரத்து செய்து அவர்களை மீண்டும் நீதிமன்றக் காவலுக்கு அனுப்ப வேண்டும் எனக் கோரியுள்ளது. செல்வாக்குள்ள குற்றவாளிகள் சாட்சிகளை அச்சுறுத்தவோ, சாட்சியங்களை அழிக்கவோ வாய்ப்புள்ளதாக சிபிஐ சுட்டிக்காட்டியுள்ளது. விசாரணை முழுமையாக நடைபெற இது தடையாக இருக்கும் என அது வாதிட்டுள்ளது. உச்சநீதிமன்றம் இந்த வழக்கை இன்று விசாரிக்க உள்ளது.

இதையும் படிங்க: #BREAKING ஆம்ஸ்ட்ராங் சகோதர்களிடம் திடீர் விசாரணை... பொற்கொடியிடம் வாக்குமூலம்... அடுத்த கட்டத்திற்கு நகரும் சிபிஐ...!