பகுஜன் சமாஜ் கட்சியின் தமிழ்நாடு மாநிலத் தலைவராக இருந்த கே. ஆம்ஸ்ட்ராங், 2024 ஆம் ஆண்டு ஜூலை 5 ஆம் தேதி சென்னை பெரம்பூரில் தனது வீட்டிற்கு அருகே கொடூரமாக வெட்டிக் கொல்லப்பட்டார். அன்று மாலை அவர் புதிய வீட்டுக் கட்டுமானப் பணியை மேற்பார்வையிட்டுக் கொண்டிருந்தபோது, உணவு விநியோக ஊழியர்கள் போலத் தோன்றிய ஒரு கும்பல் அவரைச் சுற்றி வளைத்து கத்திகளால் தாக்கியது. அவரது தலை, முகம், கை மற்றும் முதுகு உள்ளிட்ட உடல் பாகங்களில் பல காயங்கள் ஏற்பட்டன. உதவிக்கு வந்தவர்களையும் தாக்கிய அந்தக் கும்பல் வேகமாக தப்பிச் சென்றது. இந்தச் சம்பவம் தமிழகம் முழுவதும் பெரும் அதிர்ச்சியை ஏற்படுத்தியது.

செம்பியம் காவல்நிலையத்தில் வழக்குப் பதிவு செய்யப்பட்டு விசாரணை தொடங்கியது. சில மணி நேரங்களிலேயே சிலர் சரணடைந்தனர். அடுத்தடுத்த நாட்களில் பலர் கைது செய்யப்பட்டனர். மொத்தம் சுமார் 27 முதல் 30 பேர் வரை இந்த வழக்கில் குற்றம் சாட்டப்பட்டனர். முக்கிய குற்றவாளியாகக் கருதப்பட்ட நாகேந்திரன் பின்னர் உடல்நலக் குறைவால் உயிரிழந்தார். மற்றொரு குற்றவாளியான திருவேங்கடம் காவல் துறையினரின் என்கவுண்டரில் இறந்தார். கொலையின் பின்னணியில் பழைய பகை மற்றும் பழிவாங்கும் நோக்கம் இருப்பதாக ஆரம்ப விசாரணையில் தெரிவிக்கப்பட்டது.

வழக்கின் விசாரணையில் குறைபாடுகள் இருப்பதாகக் குற்றம் சாட்டப்பட்டதால், சென்னை உயர் நீதிமன்றம் இந்த வழக்கை சிபிஐ விசாரணைக்கு மாற்றி உத்தரவிட்டது. பின்னர் உச்ச நீதிமன்றத்தில் நடந்த சட்டப் போராட்டங்களுக்குப் பிறகு சிபிஐ முறையாக விசாரணையை ஏற்றுக்கொண்டது. இதற்கிடையே பல குற்றம் சாட்டப்பட்டவர்கள் ஜாமீன் கோரி நீதிமன்றங்களை அணுகினர். சிலருக்கு முன்பு நிபந்தனை ஜாமீன் வழங்கப்பட்டது. சிலருக்கு ரத்து செய்யப்பட்டது. மீண்டும் உச்ச நீதிமன்றம் தலையிட்டது. வழக்கு இன்னும் விசாரணை நிலையிலேயே உள்ளது. நீதிமன்ற விசாரணை தொடங்கும் நேரம் தெளிவாகத் தெரியவில்லை.இந்தச் சூழலில் இரண்டு ஆண்டுகளுக்கு மேலாக சிறையில் இருந்த மணிவண்ணன், சந்தோஷ், கோகுல், செல்வராஜ் மற்றும் அருள் ஆகிய ஐந்து பேர் ஜாமீன் கோரி சென்னை முதன்மை அமர்வு நீதிமன்றத்தில் மனுத்தாக்கல் செய்தனர். அவர்கள் தரப்பில், சிபிஐ விசாரணை இன்னும் முடியவில்லை என்றும், விசாரணை எப்போது முடிந்து நீதிமன்ற விசாரணை தொடங்கும் என்பதில் நிச்சயமற்ற தன்மை நிலவுவதால் நீண்ட காலம் சிறையில் வைத்திருப்பது அடிப்படை உரிமையைப் பாதிக்கிறது என்றும் வாதிடப்பட்டது.

இதையும் படிங்க: அவதூறு பதிவிடும் அனைத்து கட்சியினர் மீதும் நடவடிக்கை... உயர்நீதிமன்றம் எச்சரிக்கை.!

நீதிபதி கார்த்திகேயன் இந்த மனுக்களை விசாரித்தார். விரைவாக விசாரணை நடத்தப்படாததால் குற்றம் சாட்டப்பட்டவர்களின் அடிப்படை உரிமை பாதிக்கப்படும்போது, குற்றத்தின் தன்மையை மட்டும் காரணம் காட்டி ஜாமீன் மறுக்க முடியாது என்ற உச்ச நீதிமன்றத் தீர்ப்பை அவர் சுட்டிக்காட்டினார். அதன் அடிப்படையில் இந்த ஐந்து பேருக்கும் நிபந்தனை ஜாமீன் வழங்கி உத்தரவிட்டார்.ஜாமீன் பெற்றவர்கள் தினமும் காலை 10 மணிக்கு விசாரணை அதிகாரியின் முன் ஆஜராகி கையெழுத்திட வேண்டும். சாட்சிகளைத் தாக்கவோ, கலைக்கவோ, தலைமறைவாகவோ முயற்சிக்கக் கூடாது என்ற நிபந்தனைகள் விதிக்கப்பட்டன. இந்த நிபந்தனைகளை மீறினால் ஜாமீன் ரத்து செய்யப்படும் என்றும் தெரிவிக்கப்பட்டது.

இதையும் படிங்க: BY ELECTION நடக்குமா..? நிலுவையில் வழக்குகள்..! இடைத் தேர்தலுக்கு தடை கோரி மனு..!!