சென்னை மாநகராட்சி எல்லைக்குட்பட்ட பகுதிகளில் வசிக்கும் சொத்து உரிமையாளர்களுக்கு இன்று ஒரு முக்கியமான நாள். நடப்பு நிதியாண்டின் முதல் அரையாண்டுக்கான சொத்து வரியை செலுத்துவதற்கான கடைசி நாளாக செப்டம்பர் 30 அறிவிக்கப்பட்டுள்ளது. இதற்குள் வரியை செலுத்தாதவர்களுக்கு அடுத்த நாள் முதல் மாதத்திற்கு ஒரு சதவீதம் வட்டி அபராதமாக விதிக்கப்படும் என்பதால், பொதுமக்கள் உடனடியாக நடவடிக்கை எடுக்க வேண்டும் என மாநகராட்சி அதிகாரிகள் வலியுறுத்தியுள்ளனர்.

மாநகராட்சியின் வருவாய் மற்றும் நிதித்துறை ஆண்டுக்கு இருமுறை சொத்து வரியை வசூலிக்கிறது. முதல் அரையாண்டு ஏப்ரல் முதல் செப்டம்பர் வரை உள்ளது. இந்த காலகட்டத்திற்கான வரியை குறிப்பிட்ட தேதிக்குள் செலுத்தாவிட்டால், நிலுவைத் தொகையின் மீது தனி வட்டி சேர்க்கப்படும். இது சொத்து உரிமையாளர்களுக்கு கூடுதல் சுமையாக மாறும். எனவே கடைசி நேரம் வரை காத்திருக்காமல் இன்றுள்ளேயே வரியை செலுத்தி முடித்துவிட வேண்டும் என அறிவுறுத்தப்பட்டுள்ளது.

வரியை செலுத்துவதற்கு பல எளிய வழிகள் அமைக்கப்பட்டுள்ளன. மாநகராட்சியின் அதிகாரப்பூர்வ இணையதளமான chennaicorporation.gov.in மூலம் வீட்டிலிருந்தே ஆன்லைனில் செலுத்தலாம். கிரெடிட் கார்டு, டெபிட் கார்டு, நெட் பேங்கிங் அல்லது யூபிஐ மூலம் பரிவர்த்தனை செய்ய முடியும். மேலும் மாநகராட்சியின் கைபேசி செயலி மூலமும் எளிதாக செலுத்தலாம். அதிகாரப்பூர்வ வாட்ஸ்அப் எண் 9445061913 ஐ பயன்படுத்தி செய்தி அனுப்பி வரியை செலுத்தும் வசதியும் உள்ளது.

இதையும் படிங்க: மழைக்கால மீட்புப் பணிகள்... தன்னார்வலர்களை இணைக்கும் முயற்சி... சென்னை மாநகராட்சியின் புதிய செயலி அறிமுகம்.!

பிரத்யேக க்யூஆர் குறியீட்டை ஸ்கேன் செய்து உடனடியாக பணம் செலுத்தவும் முடியும்.நேரடியாக செலுத்த விரும்புபவர்கள் அருகிலுள்ள இ-சேவை மையங்கள், மண்டல அலுவலகங்கள் அல்லது வார்டு அலுவலகங்களுக்குச் சென்று செலுத்தலாம். வரி வசூலிப்பாளர்கள் மூலமாகவும் பணம் செலுத்தும் வசதி தொடர்கிறது. 

இதையும் படிங்க: சொத்து வரி வழக்கில் வழக்கறிஞர்கள் ஆஜராகாததால் மாநகராட்சி ஆணையர்களுக்கு ஐகோர்ட் சம்மன்!