நீண்டகாலக் கோரிக்கையான பணி நிரந்தரம், தகுதிக்கேற்ற ஊதிய உயர்வு மற்றும் தூய்மைப் பணிகளைத் தனியார்மயமாக்கும் நடவடிக்கையைக் கைவிட வேண்டும் என்பன உள்ளிட்ட வாழ்வாதாரக் கோரிக்கைகளை வலியுறுத்தி, சென்னை மாநகராட்சி தலைமை அலுவலகமான ரிப்பன் மாளிகையை முற்றுகையிட்டுத் தூய்மைப் பணியாளர்கள் இன்று 7-வது நாளாகத் தங்களது வீரியமிக்கப் போராட்டத்தைத் தொடர்ந்து முன்னெடுத்து வருகின்றனர்.

பெருநகர சென்னை மாநகராட்சியில் பல ஆண்டுகளாக ஒப்பந்த அடிப்படையிலும் தினக்கூலி முறையிலும் பணியாற்றி வரும் ஆயிரக்கணக்கான தூய்மைப் பணியாளர்கள், தங்களின் பணிப் பாதுகாப்பை உறுதி செய்யக் கோரி தொடர் உள்ளிருப்பு மற்றும் முற்றுகைப் போராட்டங்களை நடத்தி வருகின்றனர். மாநகராட்சி தலைமை வளாகத்தின் முன்பாகக் குடும்பத்துடன் திரண்டுள்ள பணியாளர்கள், எங்களின் நியாயமான கோரிக்கைகளைக் கேட்க முதலமைச்சர் சி. ஜோசப் விஜய் மறுப்பது ஏன்?, தூய்மைப் பணியாளர்களை முதலமைச்சர் நேரில் சந்தித்துப் பேச்சுவார்த்தை நடத்த வேண்டும்! போன்ற வாசகங்கள் அடங்கிய பதாகைகளைக் கைகளில் ஏந்தி முழக்கங்களை எழுப்பி வருகின்றனர்.

போராட்டத்தில் ஈடுபட்டுள்ள தூய்மைப் பணியாளர் சங்கப் பிரதிநிதிகள் பேசுகையில், மழை, பெருந்தொற்று, புயல் போன்ற பேரிடர் காலங்களிலும் உயிரைப் பணயம் வைத்து நகரத்தைத் தூய்மையாகப் பராமரிக்கும் எங்களின் உழைப்பை அரசு தொடர்ந்து புறக்கணித்து வருகிறது. பல ஆண்டுகளாக உழைத்தும் பணி நிரந்தரம் செய்யப்படாமல், சொற்ப ஊதியத்தில் கொத்தடிமைகளைப் போலப் பணிபுரியும் நிலைக்குத் தள்ளப்பட்டுள்ளோம்; இதற்கு நடுவே தூய்மைப் பணிகளைத் தனியாரிடம் ஒப்படைக்கும் முயற்சிகளையும் அரசு தீவிரப்படுத்தி வருகிறது. எனவே, அனைத்துத் தற்காலிகப் பணியாளர்களையும் உடனடியாகப் பணி நிரந்தரம் செய்து உரிய காலமுறை ஊதியம் வழங்க வேண்டும் என ஆவேசமாகத் தெரிவித்தனர்.

இதையும் படிங்க: மழை பெய்யும் முன்பே அலர்ட்! சென்னையில் 15 அதிகாரிகளுக்கு ஸ்பெஷல் டியூட்டி..! சென்னை மாநகராட்சி நடவடிக்கை..!!

ஏற்கெனவே துறை அதிகாரிகள் மற்றும் நிர்வாகத் தரப்பில் நடத்தப்பட்ட பேச்சுவார்த்தைகளில் எவ்வித உடன்பாடும் எட்டப்படாத காரணத்தால், முதலமைச்சர் உடனடியாகத் தலையிட்டுத் தங்களது கோரிக்கைகளுக்கு நேரடித் தீர்வு காண வேண்டும் என்றும், கோரிக்கைகள் முழுமையாக நிறைவேற்றப்படும் வரை போராட்டக் களத்தை விட்டு நகரப் போவதில்லை என்றும் பணியாளர்கள் திட்டவட்டமாகத் தெரிவித்துள்ளனர். தூய்மைப் பணியாளர்களின் இந்த 7-வது நாள் தொடர் முற்றுகைப் போராட்டத்தால் ரிப்பன் மாளிகை வளாகத்தில் பலத்த போலீஸ் பாதுகாப்பு போடப்பட்டுப் பெரும் பரபரப்பு நிலவி வருகிறது.

இதையும் படிங்க: சென்னை மக்களுக்கு காலையிலேயே குட்நியூஸ்... சொத்து வரி வசூலிப்பு நிறுத்திவைப்பு... மக்கள் எதிர்ப்புக்கு பணிந்த தவெக...!