சென்னையில் அதி தீவிர கனமழை கொட்டித் தீர்க்கும் என எச்சரித்து விடுக்கப்பட்டிருந்த 'ரெட் அலர்ட்' (Red Alert - சிவப்பு நிற எச்சரிக்கை) உத்தரவை இந்திய வானிலை ஆய்வு மையம் (IMD) அதிகாரப்பூர்வமாகத் திரும்பப் பெற்றுள்ளது; வளிமண்டல மேலடுக்கு சுழற்சி கடற்பகுதியை நோக்கி நகர்ந்ததன் காரணமாக அதி கனமழைக்கான வாய்ப்பு குறைந்துள்ளதால் இந்த அறிவிப்பு வெளியாகியுள்ளது, தலைநகர மக்கள் மத்தியில் பெரும் நிம்மதியை ஏற்படுத்தியுள்ளது.
தென்மேற்கு வங்கக்கடல் மற்றும் தமிழகக் கடலோரப் பகுதிகளில் நிலைகொண்டிருந்த தீவிர வளிமண்டல மேலடுக்கு சுழற்சி காரணமாக, சென்னையில் கடந்த இரு தினங்களாக இடைவிடாது கனமழை வெளுத்து வாங்கியது. குறிப்பாகப் பாரிமுனையில் 36 செ.மீ, கத்திவாக்கத்தில் 34 செ.மீ என 30 ஆண்டுகளில் இல்லாத அளவுக்கு மேகவெடிப்புக்கு இணையான அதி தீவிர மழை பதிவானது.
இதையும் படிங்க: 3 மணி நேரத்தில் 36 செ.மீ மழை: வானிலை மையம் முன்னறிவிப்பு தரவில்லை - அமைச்சர் அருண்ராஜ்!
இதன் தொடர்ச்சியாக, சென்னை மற்றும் அதன் புறநகர்ப் பகுதிகளில் மேலும் 20 சென்டிமீட்டருக்கும் அதிகமான அதி கனமழை பெய்யக்கூடும் எனக் கணித்து வானிலை ஆய்வு மையம் ரெட் அலர்ட் எச்சரிக்கை விடுத்திருந்தது. தமிழ்நாடு மாநில பேரிடர் மேலாண்மை ஆணையமும் பொதுமக்களின் செல்போன்களுக்கு அவசர எச்சரிக்கை ஒலியுடன் கூடிய எஸ்.ஓ.எஸ். குறுஞ்செய்திகளை அனுப்பித் தேவையின்றி வெளியே வர வேண்டாம் என எச்சரித்திருந்தது. இந்நிலையில், வானிலை ஆய்வு மையத்தின் ரேடார் மற்றும் செயற்கைக்கோள் தரவுகளின் அடிப்படையில் மேகக் கூட்டங்களின் நகர்வு தீவிரமாகக் கண்காணிக்கப்பட்டது.
அதில், சென்னை மற்றும் வடதமிழகக் கடலோரப் பகுதியில் நிலைகொண்டிருந்த வளிமண்டல மேலடுக்கு சுழற்சியானது படிப்படியாகக் கிழக்குத் திசையை நோக்கி நகர்ந்து சென்றுவிட்டது கண்டறியப்பட்டது. இதனால் எதிர்பார்க்கப்பட்ட அதி கனமழைக்கான சாத்தியக்கூறுகள் தணிந்துவிட்டதை அடுத்து, சென்னைக்கு விடுக்கப்பட்டிருந்த 'ரெட் அலர்ட்' எச்சரிக்கை முழுமையாக வாபஸ் பெறப்படுவதாக வானிலை ஆய்வு மையம் அறிவித்துள்ளது. அதேவேளையில், ரெட் அலர்ட் திரும்பப் பெறப்பட்டாலும், பருவமழை தீவிரமாக உள்ளதால் நகரின் ஒருசில இடங்களில் மிதமானது முதல் கனமழை பெய்யக்கூடும் என வானிலை அதிகாரிகள் தெரிவித்துள்ளனர்.
ஏற்கனவே தாழ்வான பகுதிகளிலும் சாலைகளிலும் தேங்கியுள்ள மழைநீரை அகற்றும் பணிகளில் மாநகராட்சிப் பணியாளர்களும், அரக்கோணத்திலிருந்து வந்துள்ள தேசிய பேரிடர் மீட்புப் படையினரும் (NDRF) தொடர்ந்து களத்தில் ஈடுபட்டு வருகின்றனர்.
இதையும் படிங்க: சென்னையில் 250 படகுகள் தயார் நிலை: 1.40 லட்சம் பேர் மீட்புப் பணியில் - அமைச்சர் செங்கோட்டையன்!