ஐபிஎல் 2026 கிரிக்கெட் தொடரில் நாளை (ஏப்ரல் 11) சென்னை சூப்பர் கிங்ஸ் (சிஎஸ்கே) அணியும் டெல்லி கேப்பிடல்ஸ் (டிசி) அணியும் மோதும் 18ஆவது லீக் போட்டியை காண வரும் ரசிகர்களின் வசதிக்காக சென்னை மெட்ரோ ரெயில் நிறுவனம் சிறப்பு ஏற்பாடுகளை செய்துள்ளது.

சேப்பாக்கம் எம்.ஏ. சிதம்பரம் மைதானத்தில் இரவு 7.30 மணிக்கு தொடங்கவுள்ள இந்த இரவு போட்டியை முன்னிட்டு, சிஎஸ்கே கிரிக்கெட் லிமிடெட் நிறுவனத்துடன் இணைந்து சென்னை மெட்ரோ ரெயில் லிமிடெட் (சிஎம்ஆர்எல்) ரசிகர்களுக்கு ஸ்பான்சர் செய்யப்பட்ட இலவச மெட்ரோ பயண வசதியை அறிவித்துள்ளது. இந்த சலுகை சென்னையில் நடைபெறும் அனைத்து 7 சிஎஸ்கே ஹோம் மேட்ச்களுக்கும் பொருந்தும்.

போட்டிக்கான டிக்கெட் (டிஜிட்டல் அல்லது பிசிக்கல்) வைத்திருப்பவர்கள், அதில் உள்ள தனித்துவமான QR குறியீட்டை மெட்ரோ நிலையங்களில் உள்ள தானியங்கி நுழைவு இயந்திரத்தில் ஸ்கேன் செய்து பயணிக்கலாம். இந்த சிறப்பு பயணச்சீட்டு ஒரு சுற்றுப் பயணத்திற்கு (அதாவது 2 நுழைவு மற்றும் 2 வெளியேறுதல்) செல்லுபடியாகும். சென்னையில் உள்ள எந்த மெட்ரோ நிலையத்திலிருந்தும் அரசினர் தோட்டம் மெட்ரோ நிலையம் வரை கட்டணமின்றி பயணம் செய்யலாம்.

இதையும் படிங்க: மெட்ரோ ரயிலில் ஒரு பயணம்..!! மக்களுடன் ஒரு உரையாடல்..!! வாக்கு சேகரித்தார் முதல்வர் ஸ்டாலின்..!!

அரசினர் தோட்டம் நிலையம் மைதானத்திற்கு மிக அருகில் உள்ளதால், ரசிகர்கள் போக்குவரத்து நெரிசலைத் தவிர்த்து சிரமமின்றி செல்ல முடியும். மேலும், போட்டிக்குப் பிறகு ரசிகர்கள் பாதுகாப்பாக வீடு திரும்புவதற்காக அரசினர் தோட்டம் மெட்ரோ நிலையத்திலிருந்து நள்ளிரவு 1.00 மணிக்கு கடைசி சிறப்பு மெட்ரோ ரெயில்கள் இயக்கப்படும். இவை விம்கோ நகர் பணிமனை மற்றும் விமான நிலையம் நோக்கி செல்லும். பச்சை வழித்தடம் (வழித்தடம் 2) பயணிகள் புரட்சித்தலைவர் டாக்டர் எம்.ஜி. ராமச்சந்திரன் சென்ட்ரல் மெட்ரோ நிலையத்தில் மட்டுமே வழித்தடம் மாற்றம் செய்து கொள்ள வேண்டும்.

ரசிகர்கள் கடைசி ரெயில் புறப்படுவதற்கு குறைந்தது 10 நிமிடங்களுக்கு முன்பாகவே அரசினர் தோட்டம் மெட்ரோ நிலையத்திற்குள் நுழையுமாறு சென்னை மெட்ரோ நிறுவனம் கேட்டுக் கொண்டுள்ளது. இந்த ஏற்பாடுகள் நகரின் போக்குவரத்தை சீராக்கவும், ரசிகர்களுக்கு தடையற்ற பயண அனுபவத்தை வழங்கவும் உதவும் என்று எதிர்பார்க்கப்படுகிறது. இந்த முயற்சியானது பொது போக்குவரத்தை ஊக்குவிப்பதோடு, மைதானத்தைச் சுற்றியுள்ள பார்க்கிங் பிரச்சினையையும் குறைக்கும். ரசிகர்கள் தங்கள் டிக்கெட்டை பயன்படுத்தி மெட்ரோவில் பயணித்து, உற்சாகமாக போட்டியை ரசிக்குமாறு சென்னை மெட்ரோ நிறுவனம் அழைப்பு விடுத்துள்ளது. 

இதையும் படிங்க: விஜய் அரெஸ்ட் பண்ணுங்க..! ஜனநாயகம் படத்தில் இஸ்லாமிய எதிர்ப்பு காட்சி..? போலீசில் புகார்..!