சென்னை பெசன்ட் நகரில் தலைமைத் தேர்தல் ஆணையர் ஞானேஷ் குமார் பதவி விலக வேண்டும் என வலியுறுத்தி நடைபெற்ற போராட்டத்தில் ஈடுபட்ட முப்பதுக்கும் மேற்பட்ட இளைஞர்கள் காவல்துறையினரால் குழுவாக கைது செய்யப்பட்டனர். இந்தப் போராட்டம் டெல்லியில் சிஜேபி கட்சியினர் நடத்தவுள்ள போராட்டத்திற்கு ஆதரவாக அமைந்திருந்தது.

நாடு முழுவதும் தலைமைத் தேர்தல் ஆணையர் ஞானேஷ் குமாரின் செயல்பாடுகள் குறித்து கடும் விமர்சனங்கள் எழுந்துள்ள நிலையில், சிறப்பு வாக்காளர் பட்டியல் தீவிர திருத்த நடவடிக்கை தொடர்பான முடிவுகளில் அவர் தன்னிச்சையாகச் செயல்பட்டதாக குற்றச்சாட்டுகள் எழுந்துள்ளன. தேர்தல் ஆணையத்திற்குள் மற்ற இரு ஆணையர்களும் பல முறை ஆட்சேபனை தெரிவித்ததாக வெளியான தகவல்கள் இந்தப் போராட்டங்களுக்குத் தூண்டுகோலாக அமைந்தன. ஜனநாயகத்தின் அடிப்படை அம்சமான வாக்குரிமை பாதிக்கப்படுவதாகக் கருதும் பல குழுக்களும் இளைஞர்களும் இதில் ஈடுபட்டு வருகின்றனர்.

இந்தச் சூழலில் சிஜேபி கட்சியினர் டெல்லியில் போராட்டம் நடத்தத் திட்டமிட்டிருந்தனர். அதற்கு ஆதரவு தெரிவிக்கும் வகையில் சென்னை பெசன்ட் நகரில் உள்ளூர் இளைஞர்கள் ஒன்றுகூடி கோஷங்கள் எழுப்பி போராட்டத்தில் ஈடுபட்டனர். அவர்கள் தலைமைத் தேர்தல் ஆணையர் உடனடியாகப் பதவி விலக வேண்டும் என வலியுறுத்தினர். போராட்டம் அமைதியாக நடைபெற்று வந்த நிலையில், காவல்துறையினர் அங்கு வந்து முப்பதுக்கும் மேற்பட்ட இளைஞர்களைக் கைது செய்தனர்.

இதையும் படிங்க: ஹை அலர்ட்டில் டெல்லி... தலைநகரை ஸ்தம்பிக்க வைத்த கரப்பான் பூச்சிகள்... இன்று காத்திருக்கும் அதிரடி சம்பவம்...!

கைது செய்யப்பட்டவர்கள் அனைவரும் இளைஞர்கள் என்பது குறிப்பிடத்தக்கது.இந்தச் சம்பவம் தமிழ்நாட்டில் மட்டும் அல்ல, நாட்டின் பல பகுதிகளிலும் இதே கோரிக்கையுடன் போராட்டங்கள் நடைபெற்று வருவதைப் பிரதிபலிக்கிறது. வாக்காளர் பட்டியலில் பெரிய அளவில் மாற்றங்கள் செய்யப்பட்டதாகவும், பலரின் பெயர்கள் நீக்கப்பட்டதாகவும் குற்றச்சாட்டுகள் எழுந்துள்ளன. இதனால் தேர்தல் ஆணையத்தின் நம்பகத்தன்மை கேள்விக்குள்ளாகியுள்ளது எனப் போராட்டக்காரர்கள் கூறுகின்றனர். 

இதையும் படிங்க: தேர்தல் ஆணையருக்கு எதிராக திரண்ட மக்கள் கூட்டம்! மும்பை சிவாஜி பூங்காவில் CJP போராட்டம்!