சென்னை நந்தம்பாக்கத்தில் உள்ள வர்த்தக மையத்தில் இன்றும் (ஜனவரி 27) நாளையும் இரண்டு நாட்கள் நடைபெறவுள்ள ‘உலக மகளிர் உச்சி மாநாட்டை’ (Global Women's Summit 2026) தமிழ்நாடு முதலமைச்சர் மு.க.ஸ்டாலின் அவர்கள் இன்று காலை தொடங்கி வைக்கிறார்.

தமிழ்நாடு அரசு சிறப்புத் திட்டச் செயலாக்கத் துறை மற்றும் சமூக நலன் - மகளிர் உரிமைத் துறை இணைந்து நடத்தும் இந்த மாநாடு, அனைத்துத் துறைகளிலும் பெண்களின் பங்களிப்பை மேம்படுத்துவதை நோக்கமாகக் கொண்டுள்ளது.  

பெண்களின் திறன் மேம்பாடு, முறையான வேலைவாய்ப்பு மற்றும் பாதுகாப்பை உறுதி செய்யும் ‘தமிழ்நாடு பெண்கள் வேலைவாய்ப்பு மற்றும் பாதுகாப்பு’ (TNWESafe) திட்டத்தின் ஒரு பகுதியாக இந்த மாநாடு அமைகிறது. பெண்கள் வேலைவாய்ப்பு, பாதுகாப்பு மற்றும் பொருளாதார மேம்பாடு உள்ளிட்ட 11 முக்கியக் கருப்பொருள்களில்  விவாதங்கள் நடைபெற உள்ளன.

இதையும் படிங்க: விருதுகள் மற்றும் கலை நிகழ்ச்சிகள்! 77-ஆவது குடியரசு தினத்தை ஆளுநர் மாளிகையில் கொண்டாடிய முக்கியப் பிரமுகர்கள்.

கல்வித்துறை, தொழில் நுட்பத்துறை, ஐ.நா. பெண்கள் அமைப்பு (UN Women), உலக வங்கி மற்றும் பெருநிறுவன சமூகப் பொறுப்பு (CSR) அமைப்புகளைச் சேர்ந்த 500-க்கும் மேற்பட்ட பிரதிநிதிகள் மற்றும் 70-க்கும் மேற்பட்ட ஆளுமைகள் இதில் பேச உள்ளனர். மாநாட்டின் ஒரு பகுதியாக, புற்றுநோய் தடுப்பு நடவடிக்கையாக இளம் பெண்களுக்கு **HPV தடுப்பூசி** போடும் பணியையும் முதலமைச்சர் இன்று தொடங்கி வைக்கிறார். முதற்கட்டமாகத் தர்மபுரி, பெரம்பலூர் உள்ளிட்ட 4 மாவட்டங்களைச் சேர்ந்த சுமார் 3.38 லட்சம் பெண்களுக்கு இந்த இலவசத் தடுப்பூசி வழங்கப்பட உள்ளது.

நாளை (ஜனவரி 28) நடைபெறவுள்ள நிறைவு விழாவில் துணை முதலமைச்சர் உதயநிதி ஸ்டாலின் அவர்கள் பங்கேற்கிறார். அப்போது, பெண்கள் திறன் மேம்பாடு மற்றும் வேலைவாய்ப்பை ஆதரிக்கும் மாநில அளவிலான புதிய பிரச்சாரத்தைத் தொடங்கி வைக்க உள்ளார்.
 

இதையும் படிங்க: “சென்னை மக்கள் பெருமையுடன் வந்து காண வேண்டும்” - வரலாற்றை மீட்டெடுத்தத் திராவிட மாடல் அரசின் சாதனை!