சிதம்பரம்: அகில பாரத வித்யார்த்தி பரிஷத் (ஏபிவிபி) சார்பில் “மாணவர்கள் குரல் : மாற்றத்திற்கான குரல்” என்ற தலைப்பில் 100 சதவீத வாக்குப் பதிவை வலியுறுத்தும் விழிப்புணர்வு பொதுக்கூட்டம் சிதம்பரத்தில் நடைபெற்றது. இந்தக் கூட்டத்தின்போது விடுதலை சிறுத்தைகள் கட்சி (விசிக) தொண்டர்கள் புகுந்து ஏபிவிபி மாணவர்கள் மீது கொலைவெறித் தாக்குதல் நடத்திய சம்பவம் பெரும் பரபரப்பை ஏற்படுத்தியுள்ளது.

மத்திய அமைச்சர் எல்.முருகன் இந்தச் சம்பவத்தைக் கடுமையாகக் கண்டித்துள்ளார். அவர் வெளியிட்ட அறிக்கையில், “ஜனநாயக நாட்டில் மக்களிடம் தங்கள் கருத்துக்களை எடுத்துச் சொல்லும் உரிமை அனைவருக்கும் உண்டு. ஆனால் ஜனநாயகத்தின் மீது துளியும் நம்பிக்கை இல்லாதவர்கள் தான் இப்படிப்பட்ட கோழைத்தனமான தாக்குதலை நடத்துகின்றனர். விசிகவினரின் இந்தச் செயல் வன்மையாகக் கண்டிக்கத்தக்கது” என்று தெரிவித்தார்.

ஏபிவிபி சார்பில் நடைபெற்ற இந்த விழிப்புணர்வு கூட்டத்தில் மாணவர்கள் அமைதியாக பங்கேற்றுக் கொண்டிருந்த நிலையில், விசிகவினர் மது போதையில் புகுந்து நாற்காலிகளை வீசி எறிந்தும், மாணவர்கள் மீது தாக்குதல் நடத்தியும் அராஜகம் செய்ததாகக் கூறப்படுகிறது. 

இதையும் படிங்க: மத்திய அமைச்சர் எல்.முருகன் சட்டசபை தேர்தலில் போட்டி? ராசிபுரமா? தாராபுரமா? பாஜக தீவிர ஆலோசனை!

ஏபிவிபி மாநிலப் பொதுச் செயலாளர் பன்னீர்செல்வம் உள்ளிட்டோர் மற்றும் பல மாணவர்களுக்கு காயம் ஏற்பட்டுள்ளது. ஒரு பெண் நிர்வாகியை தகாத வார்த்தைகளால் அவமதித்ததும் இந்தச் சம்பவத்தில் இடம்பெற்றுள்ளது.

எல்.முருகன் மேலும் கூறுகையில், “இந்தக் கோழைத்தனமான தாக்குதலை நடத்திய விசிகவினரை காவல்துறையினர் உடனடியாக கைது செய்ய வேண்டும். ஜனநாயக முறையில் கருத்துப் பரிமாற்றம் செய்ய முடியாதவர்கள் வன்முறையை நாடுவது வருத்தத்துக்குரியது” என்றார்.

இந்தத் தாக்குதல் சம்பவம் தமிழக அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. மாணவர்கள் அமைப்புகள் மற்றும் அரசியல் கட்சிகள் இந்தச் சம்பவத்தைக் கண்டித்து வருகின்றன. சட்டம் ஒழுங்கு பிரச்சினையாக இது மாறும் அபாயம் உள்ளதாக அரசியல் பார்வையாளர்கள் கருதுகின்றனர். 

காவல்துறை இந்த வழக்கில் உடனடியாக நடவடிக்கை எடுக்க வேண்டும் என்று பலரும் வலியுறுத்தி வருகின்றனர். இந்தச் சம்பவம் தேர்தல் காலத்தில் மாணவர்கள் அமைப்புகளுக்கு இடையே பதற்றத்தை அதிகரித்துள்ளது.

இதையும் படிங்க: திருமாவளவனுக்கு 8 சீட்.. தேமுதிக-வுக்கு 10 சீட்! திமுக-வை சாடிய அன்புமணி ராமதாஸ்!