தமிழ்நாட்டில் அத்தியாவசிய பொருட்களின் தொடர் விலை உயர்வால் பொதுமக்கள் கடும் கவலை அடைந்துள்ளனர். கடந்த சில நாட்களாக அரிசி, பருப்பு மற்றும் முக்கிய மளிகைப் பொருட்களின் விலை தொடர்ந்து உயர்ந்து வருவது இல்லத்தரசிகள் மற்றும் பொதுமக்களிடையே பெரும் அதிர்ச்சியை ஏற்படுத்தியுள்ளது.

சந்தையில் ஒரு மூட்டை அரிசியின் விலை ரூ.260 வரை அதிகரித்துள்ளதுடன், பல்வேறு அரிசி ரகங்களின் சில்லறை விலையும் கிலோவுக்கு ரூ.6 முதல் ரூ.15 வரை உயர்ந்துள்ளது. குறிப்பாக, மண்ணச்சநல்லூர் அரிசி கிலோ ரூ.76-க்கும், கல்யாண பொன்னி அரிசி ரூ.76-க்கும், சீரக சம்பா அரிசி கிலோ ரூ.135-க்கும் விற்பனை செய்யப்படுகிறது.

இதற்கிடையே, பாசிப்பருப்பு கிலோ ரூ.130 ஆகவும், கடுகு கிலோ ரூ.1,200 ஆகவும் உயர்ந்துள்ளது. குறிப்பாக, சீரகத்தின் விலை கிலோவுக்கு ஒரே நேரத்தில் ரூ.50 அதிகரித்து, ரூ.400-க்கு விற்பனை செய்யப்படுகிறது.

இதையும் படிங்க: ஜெம் வீரமணி வழக்கில் அதிர்ச்சி திருப்பம்... சிக்கிய முக்கிய காவலர்கள்... வெளியானது பகீர் பின்னணி...!

பருவமழையால் ஏற்பட்ட பாதிப்பு, விளைச்சல் குறைவு மற்றும் போக்குவரத்துச் செலவு அதிகரிப்பு ஆகியவையே விலை உயர்வுக்குக் காரணம் என வியாபாரிகள் தெரிவிக்கின்றனர்.

இதுகுறித்து வியாபாரி ஒருவர் கூறுகையில், இயற்கைச் சீற்றங்கள் மற்றும் பெட்ரோல் விலை உயர்வு ஆகிய இரண்டு முக்கிய காரணங்களால் அரிசி, பருப்பு உள்ளிட்ட அனைத்து அத்தியாவசிய பொருட்களின் விலையும் அதிகரித்து வருவதாக தெரிவித்தார். மேலும், ராஜபோகம், மண்ணச்சநல்லூர், அச்சயா உள்ளிட்ட அரிசி ரகங்களின் விலை கிலோவுக்கு ரூ.5 முதல் ரூ.10 வரை அதிகரித்துள்ளதாகவும், பழைய விலையைவிட தற்போது மூட்டைக்கு சுமார் ரூ.50 வரை விலை உயர்ந்துள்ளதாகவும் தெரிவித்தார்.

பருப்பு வகைகளின் விலை குறித்துப் பேசிய அவர், துவரம்பருப்பு, பாசிப்பருப்பு உள்ளிட்டவற்றின் விலை தொடர்ந்து மாறி வருவதாகக் கூறினார். பாசிப்பருப்பு ஒரு மூட்டை வாங்கும்போது ரூ.98 முதல் ரூ.108 வரை இருந்த நிலையில், தற்போது அதன் விலை ரூ.1,512 ஆக உயர்ந்துள்ளதாகவும், இதனால் கிலோவுக்கு சுமார் ரூ.10 வரை விலை அதிகரித்துள்ளதாகவும் தெரிவித்தார்.

மேலும், மொத்த விலையில் பொருட்களை வாங்கி சில்லறை விற்பனைக்கு கொண்டு வரும்போது கூலி மற்றும் போக்குவரத்துச் செலவு உள்ளிட்ட கூடுதல் செலவுகளும் ஏற்படுவதாக வியாபாரிகள் தெரிவித்தனர்.

அதே நேரத்தில், சீரகம் போன்ற பொருட்களின் விலை உயர்வுக்கு ஆன்லைனில் நடைபெறும் செயற்கையான வர்த்தக சூதாட்டமே முக்கிய காரணம் என சீரக மொத்த வியாபாரி தாழைக்கணி குற்றம்சாட்டினார்.

இதுகுறித்து அவர் கூறுகையில், சீரகத்தின் விலை தொடர்ந்து அதிகரித்து வருவதாகவும், சந்தையில் தினசரி கிலோவுக்கு ரூ.20 முதல் ரூ.30 வரை விலை உயர்ந்து வருவதாகவும் தெரிவித்தார். விளைச்சல் நன்றாகவே உள்ள நிலையில், ஆன்லைன் வர்த்தகத்தில் விலை உயர்த்தப்படுவதால், தினசரி சந்தையிலும் அதன் தாக்கம் எதிரொலிப்பதாக அவர் கூறினார்.

இதனால் அன்றாடம் விலை அதிகரித்து வருவதால் பொதுமக்கள் கடுமையாக பாதிக்கப்படுவார்கள் என்றும் அவர் தெரிவித்தார். இதற்கு முன்பு கிலோ ரூ.250-க்கு விற்பனை செய்யப்பட்ட சீரகம், தற்போது ரூ.290 முதல் ரூ.300 வரையிலான விலையில் விற்பனை செய்யப்படுவதாகவும், இதனால் பொதுமக்கள் பெரிதும் பாதிக்கப்படுவார்கள் என்றும் அவர் கூறினார்.

அனைத்து அத்தியாவசிய பொருட்களின் விலையும் தாறுமாறாக உயர்ந்து வருவது சாமானிய மக்களின் மாதாந்திர பட்ஜெட்டையும் பெரிதும் பாதித்துள்ளதாக வாடிக்கையாளர்கள் வேதனை தெரிவித்துள்ளனர்.

இதுகுறித்து வாடிக்கையாளர் ஒருவர் கூறுகையில், அனைத்து பொருட்களின் விலையும் அதிகரித்து வருகிறது என்ற மனநிலை மக்களிடையே ஏற்பட்டுள்ளதாக தெரிவித்தார். எங்கு சென்றாலும், எந்தப் பொருளை வாங்கினாலும், பல்வேறு வகைகள் மற்றும் தரங்களில் பொருட்கள் கிடைத்தாலும் அவற்றின் விலை தொடர்ந்து அதிகரித்துக்கொண்டே இருப்பதாகவும், விலை குறைவதற்கான வாய்ப்பு மிகவும் குறைவாக இருப்பதாகவும் வேதனை தெரிவித்தார்.

இதையும் படிங்க: "ராகுல் காந்தி கைதுக்கு தவெக கண்டனம்": கைது செய்யப்பட்ட விதம் ஆட்சேபகரமானது என அறிக்கை!