வங்காள விரிகுடாவில் நிலவிய காற்றழுத்தத் தாழ்வுநிலை ஆழ்ந்த காற்றழுத்தத் தாழ்வு மண்டலமாக தீவிரமடைந்துள்ளது. இது படிப்படியாக புயலாக வலுப்பெற்று வருகிற 28ஆம் தேதி ஆந்திர கடற்கரையை கடக்கும் என்று இந்திய வானிலை ஆய்வு மையம் தெரிவித்துள்ளது.
கிழக்கு மத்திய மற்றும் அதனை ஒட்டிய தென் கிழக்கு வங்காள விரிகுடா பகுதியில் நிலவிய காற்றழுத்தத் தாழ்வுநிலை கடந்த ஆறு மணி நேரத்தில் மணிக்கு ஐந்து கிலோமீட்டர் வேகத்தில் தென் கிழக்கு நோக்கி நகர்ந்துள்ளது.
இன்று காலை 5.30 மணி நிலவரப்படி அதே பகுதியில் மையம் கொண்டிருந்தது. அந்தமான் தீவுகளில் உள்ள விஜயபுரத்திலிருந்து சுமார் 440 கிலோமீட்டர் வட-வடமேற்கிலும், ஆந்திர மாநிலம் விசாகப்பட்டினத்திலிருந்து 880 கிலோமீட்டர் கிழக்கு-தென்கிழக்கிலும் மையம் கொண்டிருந்தது.
இதையும் படிங்க: தமிழகத்தில் இன்று 3 மாவட்டங்களுக்கு ரெட் அலெர்ட்! 20 செ.மீ.க்கு மேல் மழை பெய்ய வாய்ப்பு! சென்னைக்கும் எச்சரிக்கை!
இந்த ஆழ்ந்த காற்றழுத்தத் தாழ்வு மண்டலம் இன்று தெற்கு நோக்கி நகர்ந்து பின்னர் மேற்கு-வடமேற்கு திசையில் வளைந்து செல்லும். நாளை காலைக்குள் புயலாக மாறும். 27ஆம் தேதி கடுமையான புயலாகவும், 28ஆம் தேதி காலையில் மிகக் கடுமையான புயலாக ஆந்திர கடற்கரை அருகே அடையும் என எதிர்பார்க்கப்படுகிறது.
ஆந்திர மாநிலம் பாபட்லா மற்றும் விசாகப்பட்டினத்திற்கு இடையே மிகக் கடுமையான புயலாக கரையை கடக்கும். அப்போது மணிக்கு 115 முதல் 125 கிலோமீட்டர் வேகத்தில் காற்று வீசும். இது மணிக்கு 140 கிலோமீட்டர் வரை அதிகரிக்க வாய்ப்புள்ளது.
ஆந்திராவில் புயல் கரையை கடப்பதால் சென்னைக்கு எந்த பாதிப்பும் இருக்காது என்று வானிலை மைய இயக்குநர் தெரிவித்துள்ளார். பொதுமக்கள் அச்சப்படத் தேவையில்லை என்றும் அவர் விளக்கியுள்ளார்.
தமிழகத்தில் வடகிழக்கு பருவமழை தீவிரமடைந்து பரவலாக பெய்து வருகிறது. சென்னையில் விட்டு விட்டு இரவு நேரங்களில் மழை பெய்து கொண்டே உள்ளது. அடுத்த சில நாட்களுக்கு வடகிழக்கு பருவமழை தீவிரமாகவோ மிகத் தீவிரமாகவோ பொழிய வாய்ப்புள்ளதாக தனியார் வானிலை ஆய்வாளர் ஹேமசந்தர் தெரிவித்துள்ளார்.
வங்கக்கடல் மற்றும் அரபிக்கடலில் உள்ள காற்றழுத்தத் தாழ்வு பகுதிகள் காரணமாக கடலோர மற்றும் உள் மாவட்டங்களில் பலத்த இடியுடன் கூடிய கனமழை முதல் மிகக் கனமழை வரை பெய்ய வாய்ப்பு உள்ளது.
இதையும் படிங்க: சென்னை மக்களே கவனம்! இன்று இரவு மீண்டும் ருத்ர தாண்டவம் ஆட காத்திருக்கும் கனமழை! பிரதீப் ஜான் வார்னிங்!