சென்னை உயர்நீதிமன்றம் திமுக பொதுச் செயலாளர் துரைமுருகனுக்கு அமைச்சர்கள் சி.டி.ஆர். நிர்மல்குமார், ஆதவ் அர்ஜுனா மற்றும் தவெக தகவல் தொழில்நுட்பப் பிரிவுக்கு எதிராக அவதூறு வழக்கு தொடர அனுமதி அளித்துள்ளது. ஜெம் கிரானைட்ஸ் உரிமையாளர் வீரமணி தொடர்பான போக்சோ வழக்கை முந்தைய திமுக அரசு மூடி மறைத்ததாகக் குற்றம்சாட்டிய அவர்களுக்கு எதிராக ரூ.1.1 கோடி மானநஷ்டஈடு கோரி இந்த வழக்கு தொடரப்படுகிறது.ஜெம் வீரமணி சிறுமிகளைப் பாலியல் வன்கொடுமை செய்ததாகக் குற்றம்சாட்டப்பட்டு கைது செய்யப்பட்டார்.

இந்த வழக்கில் 2025 அக்டோபர் 6-ஆம் தேதி புகார் வந்த நிலையில் மறுநாளே வழக்குப் பதிவு செய்யப்பட்டதாக திமுக தரப்பு தெரிவித்துள்ளது. ஆனால் அமைச்சர்கள் நிர்மல்குமார் மற்றும் ஆதவ் அர்ஜுனா ஆகியோர் முந்தைய திமுக ஆட்சியில் உரிய நடவடிக்கை எடுக்கப்படாமல் குற்றவாளிகள் தப்பிக்க விடப்பட்டதாகப் பொதுவெளியில் கருத்து தெரிவித்தனர். தவெக தகவல் தொழில்நுட்பப் பிரிவும் சமூக வலைதளங்களில் இதேபோன்ற குற்றச்சாட்டுகளைப் பரப்பியது. இந்தக் கருத்துகள் திமுகவின் நற்பெயருக்குக் களங்கம் ஏற்படுத்தும் வகையில் இருப்பதாகக் கூறி திமுக பொதுச் செயலாளர் துரைமுருகன் சென்னை உயர்நீதிமன்றத்தில் மனுத் தாக்கல் செய்தார்.

அந்த மனுவில் அமைச்சர்கள் மற்றும் தவெக ஐ.டி. விங் ஆகியோர் தவறான தகவல்களைப் பரப்பி திமுகவை அவதூறு செய்ததாகக் குறிப்பிடப்பட்டது. மேலும் சமூக வலைதள நிறுவனங்களிடமிருந்தும் அத்தகைய பதிவுகளை நீக்கக் கோரப்பட்டது. நீதிபதி கோவிந்தராஜன் திலகவதி முன் இந்த மனு விசாரணைக்கு வந்தது. விசாரணையின் போது நீதிமன்றம் இந்த உணர்வுப்பூர்வமான வழக்கை அரசியலாக்க வேண்டாம் என இருதரப்பினருக்கும் அறிவுறுத்தியது. சிறுமிகளின் வாழ்க்கை தொடர்பான இந்த விவகாரம் மிகவும் முக்கியமானது என்றும் சமூகப் பொறுப்புடன் அணுக வேண்டும் என்றும் நீதிபதி குறிப்பிட்டார்.

இதையும் படிங்க: குறைந்த விலைக்கு துவரம் பருப்பு கொள்முதல்... திமுகவே காரணம்... அடித்துச் சொல்லும் உதயநிதி..!!

அமைச்சர்கள் தரப்பில் முன்னறிவிப்பு இல்லாமல் வழக்குத் தொடர முடியாது என்ற வாதம் முன்வைக்கப்பட்டது. ஆனால் திமுக தரப்பு அமைச்சர்கள் அதிகாரப்பூர்வ பதவியில் இருந்தபோது அல்லாமல் தனிப்பட்ட முறையில் அவதூறு கருத்துகளைத் தெரிவித்ததாக வாதிட்டது. இறுதியில் நீதிமன்றம் திமுகவுக்கு வழக்குத் தொடர அனுமதி அளித்து உத்தரவிட்டது. இதனால் அமைச்சர்கள் நிர்மல்குமார், ஆதவ் அர்ஜுனா மற்றும் தவெக தகவல் தொழில்நுட்பப் பிரிவுக்கு எதிராக அவதூறு வழக்கு தொடர திமுகவுக்கு வழி திறக்கப்பட்டுள்ளது.இந்த உத்தரவு தமிழக அரசியல் வட்டாரங்களில் பெரும் பரபரப்பை ஏற்படுத்தியுள்ளது. 

இதையும் படிங்க: அதளபாதாளத்தில் வருவாய்... படுகுழியில் தள்ளிய விஜய் அரசு... நயினார் குற்றச்சாட்டு..!!