சென்னை பெருநகர காவல் துறை நிலுவையில் உள்ள இ-சலான் அபராதங்கள் குறித்த விவரங்களை பொதுமக்கள் எளிதாக அறிந்துகொள்ளும் வகையில் சிறப்பு அழைப்பு மையங்களை அமைத்துள்ளது. வாகன ஓட்டிகள் பலர் தங்கள் வாகனங்களுக்கு விதிக்கப்பட்டுள்ள அபராதங்களைப் பற்றி தெரிந்துகொள்ளாமல் இருப்பதால் இந்த ஏற்பாடு மேற்கொள்ளப்பட்டுள்ளது. தானியங்கி எண் தகடு அடையாளம் காணும் கேமராக்கள் மற்றும் போக்குவரத்து கண்காணிப்பு மண்டலங்கள் மூலம் கண்டறியப்படும் விதிமீறல்களுக்காக இ-சலான்கள் உருவாக்கப்படுகின்றன.

சிலர் மத்திய சாலை போக்குவரத்து அமைச்சகத்திலிருந்து வரும் இணைப்புகளை மோசடி என சந்தேகித்து திறக்காமல் விடுவதும் இதற்கு ஒரு காரணமாக அமைந்துள்ளது.இந்த நிலையில் வரும் 21ஆம் தேதி முதல் 30ஆம் தேதி வரை காலை ஒன்பது மணி முதல் மாலை ஏழு மணி வரை இந்த அழைப்பு மையங்கள் செயல்படும். மொத்தம் பதினைந்து இடங்களில் இவை அமைக்கப்பட்டுள்ளன. அயனாவரம் ஐசிஎஃப் இணைப்பு காவல் உதவி மையம், ராயப்பேட்டை மியூசிக் அகாடமி காவல் உதவி மையம், அபிராமபுரம் கிரீன்வேஸ் சந்திப்பு காவல் உதவி மையம், அண்ணா சாலை மணிக்கூண்டு சந்திப்பு காவல் உதவி மையம், அண்ணா நகர் ரவுண்டானா, அண்ணா ஆர்ச் போக்குவரத்து காவல் உதவி மையம், மதுரவாயல் போக்குவரத்து காவல் நிலையம், மாதவரம் ரவுண்டானா, யானைக்கோவில் காவல் நிலையம், புது வண்ணாரப்பேட்டை காவல் நிலையம், செம்பியம் காவல் நிலையம், மாம்பலம் காவல் நிலையம், அடையார் காவல் நிலையம், கத்திப்பாரா மேம்பாலம் கீழுள்ள டிராபிக் மவுண்ட் உட்பிரிவு வளாகம் மற்றும் வேப்பேரியில் உள்ள காவல் ஆணையர் அலுவலகத்தில் உள்ள ஐடிஎம்எஸ் தலைமையகம் ஆகியவை இந்த மையங்களாக செயல்படும்.

இந்த மையங்களில் பணியாற்றும் அதிகாரிகள் வாகன உரிமையாளர்களைத் தொலைபேசியில் அழைத்து நிலுவையில் உள்ள அபராத விவரங்களைத் தெரிவிப்பார்கள். அதேபோல் பெருமளவில் குறுஞ்செய்திகளும் அனுப்பப்படும். நேரில் வருபவர்களுக்கும் தொலைபேசியில் விசாரிப்பவர்களுக்கும் அபராதத் தொகை மற்றும் விவரங்கள் குறித்து தகவல் அளிக்கப்படும். இந்த மையங்கள் அபராத வசூல் மையங்களாகவும் செயல்படும் என்பதால் வாகன உரிமையாளர்கள் அங்கு சென்று நிலுவைத் தொகையைச் செலுத்தவும் வாய்ப்புள்ளது.பொதுமக்கள் தாங்களே அதிகாரப்பூர்வ இணையதளங்கள் மூலம் நிலுவை இ-சலான்களைச் சரிபார்க்கலாம். பரிவாகன் இ-சலான் போர்டல் அல்லது நெக்ஸ்ட்ஜென் இ-சலான் மூலம் விவரங்களைப் பார்க்க முடியும்.

இதையும் படிங்க: ரயில் நிலையங்களில் மாற்றுத்திறனாளிகளுக்கு வசதி எங்கே? தெற்கு ரயில்வேக்கு உயர்நீதிமன்றம் உத்தரவு!

அபராதத் தொகையை ஆன்லைனில் நெக்ஸ்ட்ஜென் இ-சலான், பேடிஎம் ஆப், தபால் அலுவலகங்கள் அல்லது தமிழ்நாடு இ-சேவை மையங்கள் வழியாகச் செலுத்தலாம். மது அருந்தி வாகனம் ஓட்டியதற்கான அபராதங்களை நீதிமன்றங்கள் மூலம் செலுத்த வேண்டும்.இந்த சிறப்பு ஏற்பாடு வாகன ஓட்டிகளுக்கு ஒரு வாய்ப்பாக அமைந்துள்ளது. நிலுவையில் உள்ள அபராதங்களைத் தெரிந்துகொண்டு உரிய காலத்தில் செலுத்தி விடுவதன் மூலம் மேலும் சிக்கல்களைத் தவிர்க்கலாம். சென்னை பெருநகர போக்குவரத்து காவல் துறை இந்த முயற்சியின் மூலம் பொதுமக்களுக்கு உதவி வழங்குவதோடு போக்குவரத்து ஒழுங்கை மேம்படுத்தவும் முனைந்துள்ளது. வாகன உரிமையாளர்கள் இந்த வாய்ப்பைப் பயன்படுத்தி தங்கள் நிலுவை அபராதங்களைத் தீர்த்துக்கொள்ள அறிவுறுத்தப்படுகிறார்கள்

இதையும் படிங்க: "சூடித் தந்த சுடர்கொடி"..! ஆண்டாள் சூடிக்கொடுத்த மாலை..! திருப்பதி பிரம்மோற்சவத்திற்கு புறப்பாடு..!