மதுரை அடுத்த திருமங்கலம் மேலக்கோட்டை வாக்குச்சாவடியில் பெண்ணுக்கு கத்தி குத்து நிகழ்ந்துள்ள சம்பவம் அதிர்ச்சியை ஏற்படுத்தி உள்ளது. தமிழகத்தில் ஏப்ரல் 23ஆம் தேதி ஆன இன்று ஒரே கட்டமாக சட்டமன்ற தேர்தலுக்கான வாக்குப்பதிவு நடைபெற்று வருகிறது. இன்று காலை 7 மணிக்கு வாக்குப்பதிவு தொடங்கிய நிலையில் மாலை 6 மணி வரை நடக்க இருக்கிறது. மக்கள் மிகுந்த ஆர்வத்துடன் நீண்ட வரிசையில் காத்திருந்து வாக்களித்து வருகின்றனர்.

அரசியல் பிரபலங்கள், திரைத்துறையினர் என அனைவரும் தங்களது ஜனநாயக கடமையை ஆற்றி வருகின்றனர். வாக்களிப்பது ஜனநாயக கடமை என்பதை உணர்ந்து மக்கள் வாக்கு செலுத்துவதில் மிகுந்த ஆர்வம் காட்டி வருகின்றனர். இந்த நிலையில் மதுரையில் ஒரு அதிர்ச்சி சம்பவம் நிகழ்ந்துள்ளது. வாக்களிக்க வரிசையில் காத்திருந்த பெண்ணுக்கு கத்திக்குத்து விழுந்த சம்பவம் பேரதிர்ச்சியை ஏற்படுத்தி உள்ளது.

மாரிமுத்து என்பவர் தனது வாக்கினை செலுத்துவதற்காக சென்று உள்ளார். வாக்கு சாவடி மையத்தில் வரிசையில் காத்திருந்த அவர் மீது பாலமுருகன் என்பவர் கத்தியை வீசியதாக தெரிகிறது. பாலமுருகன் என்பவர் மாரிமுத்து மீது வீசிய கத்தியானது எதிர்பாராத விதமாக அருகே நின்று கொண்டிருந்த பெண்ணின் மீது பட்டுள்ளது. அதிர்ஷ்டவசமாக அந்த பெண்ணுக்கு பேராபத்து எதுவும் ஏற்படவில்லை. கத்தி அந்தப் பெண்ணின் காலில் பட்டதால் காயம் ஏற்பட்டு இருக்கிறது. காயம் காரணமாக அந்தப் பெண் மருத்துவமனையில் அனுமதிக்கப்பட்டு இருக்கிறார்.

இதையும் படிங்க: சூடுபிடித்த அரசியல் களம்..! நடிகை திரிஷா உள்ளிட்ட திரை பிரபலங்கள் ஆர்வத்துடன் வாக்களிப்பு..!!

மேலும் என்ன நடந்தது என்பதையும் அந்த பெண் விவரித்தார். போலீசார் தொடர்ந்து விசாரணை நடத்தியதில் பாலமுருகன் முன்விரோதம் காரணமாக கத்தியால் தாக்க வந்தது தெரியவந்துள்ளது. வாக்குச்சாவடி மையத்தில் கத்தியை வீசிய பாலமுருகனை போலீசார் கைது செய்தனர். தொடர்ந்து அவரிடம் விசாரணை மேற்கொள்ளப்பட்டு வருகிறது. வாக்குப்பதிவு நேரத்தில் நடந்த இந்த சம்பவம் பெரும் அதிர்ச்சியை ஏற்படுத்தியிருக்கிறது.

இதையும் படிங்க: சிந்தித்து ஓட்டு போடுங்க மக்களே..! வாக்களித்த பின் கனிமொழி எம்.பி பேட்டி..!