வெற்றிக் கழக ஆட்சியில் ஐஏஎஸ் அதிகாரிகள் கூட அரசியல்வாதிகளைப் போலப் பேசத் தொடங்கியுள்ளனர் என்றும், கட்சி ஆரம்பித்தது முதல் ஆட்சிக்கட்டிலில் அமர்ந்தது வரை தமிழகத்தில் எல்லாமே மாற்றமாகவே நடந்து வருகிறது என்றும் கைத்தறி மற்றும் துணிநூல் துறை அமைச்சர் விஜய்பாலாஜி சுவாரசியமாகத் தெரிவித்துள்ளார்.

கோவை அவிநாசி சாலையில் உள்ள தனியார் நட்சத்திர ஹோட்டலில், தொழில்நுட்ப ஜவுளிக்கான இயக்கம் மற்றும் தொழில்நுட்ப ஜவுளி தொடர்பான விழிப்புணர்வு கூட்டம் இன்று நடைபெற்றது. இவ்விழாவில் கைத்தறித்துறை அமைச்சர் விஜய்பாலாஜி சிறப்பு விருந்தினராகப் பங்கேற்றார். நிகழ்ச்சியில் சிங்காநல்லூர் சட்டமன்ற உறுப்பினர் ஸ்ரீகிரி பிரசாத், கோவை மாவட்ட ஆட்சியர் பவன் குமார் மற்றும் ஜவுளித்துறை சங்கப் பிரதிநிதிகள் பலர் கலந்துகொண்டனர். இந்த விழிப்புணர்வு கூட்டத்தின் ஒரு பகுதியாக, ₹123 கோடி மதிப்பீட்டில் 5 முக்கிய ஜவுளி நிறுவனங்களின் புரிந்துணர்வு ஒப்பந்தங்கள் அமைச்சரின் முன்னிலையில் அதிகாரப்பூர்வமாகக் கையெழுத்தாகின.

இவ்விழாவில் கைத்தறி மற்றும் துணிநூல் துறையின் முதன்மைச் செயலாளர் வெங்கடேஷ் ஐஏஎஸ் உரையாற்றும்போது, அடுத்த 5 ஆண்டுகளில் இத்துறையை எவ்வாறு உலகத்தரம் வாய்ந்ததாக முன்னேற்றுவது என்பது குறித்துத் திட்டங்களை விவரித்தார். தொடர்ந்து சிறப்புரையாற்றிய அமைச்சர் விஜய்பாலாஜி, "புதிய அரசாங்கம் பொறுப்பேற்றவுடன், கடந்த எந்தவொரு ஆண்டுகளிலும் இல்லாத அளவிற்கு இம்முறை ஜவுளித்துறையில் அதிக முதலீட்டாளர்கள் வந்துள்ளதாக முதன்மைச் செயலாளர் எங்களிடம் பெருமிதத்துடன் கூறினார். தமிழக வெற்றிக் கழகம் கட்சி ஆரம்பித்தது முதல் தற்போது ஆட்சி அமைத்தது வரை எல்லாமே மாற்றமாகத்தான் உள்ளது. அதற்குச் சான்றாக, இத்துறையின் ஐஏஎஸ் அதிகாரியே தற்பொழுது ஒரு தேர்ந்த அரசியல்வாதியைப் போலத் தொலைநோக்குடன் பேசுகிறார்" என்று நெகிழ்ச்சியுடன் குறிப்பிட்டார்.

இதையும் படிங்க: தமிழகத்தில் மீண்டும் ஐஏஎஸ் அதிகாரிகள் அதிரடி இடமாற்றம்! ஆளுநர் செயலாளராக சஜன் சிங் சவான் நியமனம்!

மேலும் பேசிய அமைச்சர், "கடந்த 20 ஆண்டுகளுக்குப் பிறகு ஜவுளித்தொழில் நிறைந்த இந்த மண்டலத்தைச் சேர்ந்த ஒருவருக்கு, மாண்புமிகு முதலமைச்சர் விஜய் அவர்கள் இத்துறை அமைச்சர் பொறுப்பை வழங்கியுள்ளார். இத்துறையில் எனக்குத் தெரியாத பல நுணுக்கங்களை முதன்மைச் செயலாளரிடம் கேட்டுத் தெரிந்துகொண்டு செயல்படுகிறேன். தற்போது அண்டை நாடான பங்களாதேஷிற்குச் செல்லும் வணிக ஆர்டர்களை மீண்டும் தமிழகிற்கே மீட்டுக்கொண்டு வர அரசு அனைத்து நடவடிக்கைகளையும் எடுக்கும். மனிதனின் கருவறை முதல் கல்லறை வரை இத்துறை நீடித்திருக்கிறது. கடந்த காலத்தைப் பற்றிப் பேசாமல், 'வெற்றிக்கழகம் விஷன் 2026' (TVK Vision 2026) திட்டத்தின் கீழ் ஒருங்கிணைந்த வளர்ச்சியை நோக்கிப் புதிய பயணத்தைத் துவங்குவோம். பொங்கலுக்கு விலையில்லா வேஷ்டி, சேலை வழங்குவதில் அரசு முழு கவனம் செலுத்தி வருகிறது" என்று உறுதியளித்தார்.

மறுபுறம் அஇஅதிமுக உள்கட்டமைப்பில் எடப்பாடி பழனிசாமி இன்று பல்வேறு அதிரடி மாற்றங்களை மேற்கொண்டு புதிய நிர்வாகிகளை நியமித்துள்ள செய்திகள் விவாதிக்கப்பட்டு வரும் இதே வேளையில், கோவை மண்டல ஜவுளித்துறை உள்கட்டமைப்பை வலுப்படுத்தும் வகையில் கையெழுத்தாகியுள்ள இந்த ₹123 கோடி மதிப்பிலான புதிய தொழில் ஒப்பந்தங்கள், தமிழக வர்த்தகத் துறையினர் மத்தியிலும் தொழில் உலகிலும் பெரும் வரவேற்பைப் பெற்றுள்ளன.

இதையும் படிங்க: நாளுக்கு நாள் அதிகரிக்கும் தவெகவினரின் அட்ராசிட்டி... நகராட்சி அலுவலகத்திற்குள் கும்பலாக நுழைந்து செய்த காரியம்...!