தமிழ்நாட்டில் விலைவாசி தொடர்ந்து உயர்ந்து வரும் நிலையில், அதை கட்டுப்படுத்த தவெக அரசு என்ன நடவடிக்கை எடுத்துள்ளது என திமுக எம்பி கனிமொழி கேள்வி எழுப்பியுள்ளார். அதேபோல், தமிழ்நாட்டின் மொத்த ஜிஎஸ்டி வசூல் தொடர்ந்து சரிவை சந்தித்து வருவதாகவும் அவர் தனது எக்ஸ் பக்கத்தில் விமர்சித்துள்ளார்.

தமிழ்நாட்டின் ஜிஎஸ்டி வசூல் கடந்த சில மாதங்களாக ஏற்ற இறக்கத்தை சந்தித்து வருகிறது. குறிப்பாக, செப்டம்பர் மாதத்தில் மாநிலத்தின் மொத்த ஜிஎஸ்டி வசூல் ரூ.10,188 கோடியாக பதிவானது. கடந்த ஆண்டு இதே மாதத்தில் ரூ.10,670 கோடி வசூலான நிலையில், தற்போது சுமார் 5 சதவீதம் குறைந்துள்ளது. ஜூலை மற்றும் ஆகஸ்ட் மாதங்களிலும் மொத்த வசூலில் சரிவு பதிவாகியிருந்தது.

இந்த புள்ளிவிவரங்களை சுட்டிக்காட்டிய கனிமொழி, ஜிஎஸ்டி மூலம் மாநிலங்களுக்கு ஏற்படும் நிதி இழப்பு குறித்து திமுக தொடர்ந்து குரல் கொடுத்து வருவதாக தெரிவித்துள்ளார். தற்போது தமிழ்நாட்டின் ஜிஎஸ்டி வசூல் சரிவுக்கு மக்களின் வாங்கும் சக்தி குறைவு மற்றும் நுகர்வு குறைதல் காரணமாக இருக்கலாம் என அவர் தனது பதிவில் கருத்து தெரிவித்துள்ளார்.

இதையும் படிங்க: போராடும் செவிலியர்கள்... ஒடுக்குவது அநீதி...! அரசு செவி சாய்க்க கனிமொழி எம்பி வலியுறுத்தல்..!!

மேலும், நாடு முழுவதும் சில பொருட்களுக்கு மேற்கொள்ளப்பட்ட ஜிஎஸ்டி வரிக்குறைப்பை தவெக அரசு தனது சாதனையாக கூறுவது பொருத்தமற்றது என்றும் கனிமொழி விமர்சித்துள்ளார். தமிழ்நாட்டில் அன்றாடப் பொருட்களின் விலை தொடர்ந்து உயர்ந்து வரும் நிலையில், அதை கட்டுப்படுத்த அரசு என்ன நடவடிக்கை எடுத்துள்ளது என்பதையும் அவர் கேள்வியாக முன்வைத்துள்ளார்.

இதற்கிடையே, தமிழ்நாடு அரசு தரப்பில் ஜிஎஸ்டி தொடர்பாக வேறுபட்ட விளக்கம் அளிக்கப்பட்டுள்ளது. செப்டம்பர் மாதத்தில் மொத்த வசூல் குறைந்தாலும், மத்திய அரசின் செட்டில்மென்ட்டுக்குப் பிறகு தமிழ்நாடு பெற்ற ஜிஎஸ்டி வருவாய் ரூ.7,320 கோடியாக உயர்ந்துள்ளதாக அதிகாரிகள் தெரிவித்துள்ளனர்.

கடந்த ஆண்டு இதே காலகட்டத்தில் இந்த தொகை ரூ.6,270 கோடியாக இருந்தது. ஏப்ரல் முதல் செப்டம்பர் வரையிலான காலத்திலும் செட்டில்மென்ட்டுக்குப் பிறகு மாநிலத்தின் வருவாய் 16 சதவீதம் உயர்ந்துள்ளதாக அரசு தரப்பு விளக்கம் அளித்துள்ளது.

இந்நிலையில், ஜிஎஸ்டி வசூல், விலைவாசி உயர்வு, மக்களின் வாங்கும் சக்தி ஆகிய விவகாரங்களை முன்வைத்து கனிமொழி எழுப்பியுள்ள கேள்விகள் அரசியல் வட்டாரத்தில் கவனம் பெற்றுள்ளன.

இதையும் படிங்க: தெருத்தெருவாக ரோடு ஷோ... முதல்வருக்கு தோல்வி பயம்... திமுக MP கனிமொழி விமர்சனம்..!