தொடர் விடுமுறை முடிவுற்ற நிலையில் சென்னை மற்றும் அதன் புறநகர் பகுதிகளில் வசிக்கும் தென் மாவட்ட மக்கள் தங்கள் சொந்த ஊர்களுக்குச் சென்று திரும்பி வருவதால் பெருங்களத்தூர் முதல் வண்டலூர் வரையிலான ஜிஎஸ்டி சாலையில் கடும் போக்குவரத்து நெரிசல் ஏற்பட்டுள்ளது. காலாண்டுத் தேர்வுகள் முடிந்ததைத் தொடர்ந்து மாணவர்களுக்கு ஒரு வார விடுமுறை அளிக்கப்பட்டது.

அதனுடன் ஆயுத பூஜை மற்றும் விஜயதசமி பண்டிகைகளும் இணைந்து தொடர் விடுமுறையாக அமைந்ததால் சென்னையில் பணிபுரியும் பலர் சொந்த ஊர்களுக்குச் சென்றிருந்தனர். விடுமுறை முடிந்து பள்ளிகள் மீண்டும் திறக்கப்பட்டதையொட்டி அனைவரும் ஒரே நேரத்தில் சென்னை நோக்கித் திரும்பியதால் சாலையில் வாகனங்களின் எண்ணிக்கை பெருமளவில் அதிகரித்தது.

பெருங்களத்தூர் ஜிஎஸ்டி சாலையில் சுமார் மூன்று கிலோமீட்டர் தூரத்திற்கு வாகனங்கள் அணிவகுத்து நின்றன. கார்கள், இருசக்கர வாகனங்கள், வேன்கள் மற்றும் பேருந்துகள் அனைத்தும் ஆமை வேகத்தில் நகர்ந்தன. வாகன ஓட்டிகள் நீண்ட நேரம் சாலையில் சிக்கித் தவித்தனர். பயண நேரம் வழக்கத்தை விட பல மடங்கு அதிகரித்ததால் அலுவலகங்களுக்குச் செல்வோர் மற்றும் மாணவர்கள் பெரும் சிரமத்திற்கு உள்ளாயினர். சாலையின் குறுகிய பகுதிகளிலும் சந்திப்புகளிலும் நெரிசல் மேலும் தீவிரமடைந்தது.

இதையும் படிங்க: என்றென்றும் இருமொழிக் கொள்கையே..! சமரசம் கிடையாது... அமைச்சர் ஆதவ் திட்டவட்டம்..!!

நெரிசலைக் கட்டுப்படுத்தும் நோக்கில் வண்டலூர் மேம்பாலத்திலிருந்து சென்னை நோக்கிச் செல்லும் கனரக வாகனங்கள் மற்றும் சரக்கு வாகனங்களுக்குத் தற்காலிகத் தடை விதிக்கப்பட்டது. இதனால் சாதாரண வாகனங்களின் இயக்கத்திற்கு சற்று நிவாரணம் கிடைத்தாலும் ஒட்டுமொத்த நெரிசல் முழுமையாகக் குறையவில்லை. போக்குவரத்து காவலர்கள் பல இடங்களில் நின்று வாகனங்களைச் சீராக நகர்த்த முயன்ற போதிலும் ஒரே நேரத்தில் வந்த மிகுதியான வாகனங்களால் நிலைமை கட்டுப்படுத்த முடியாத அளவிற்குச் சென்றது.

இதையும் படிங்க: "விளக்கமாத்துக்கு பட்டு குஞ்சம்"..! எல்லாத்துக்கும் வெற்றி-ன்னு ஸ்டிக்கர்..! ஸ்டாலின் தாக்கு.!!