கொரோனா கட்டுப்பாடுகளை மீறிப் பொதுமக்களைத் திரட்டி ஆர்ப்பாட்டத்தில் ஈடுபட்டதாக அதிமுக பொதுச்செயலாளரும் முன்னாள் முதலமைச்சருமான எடப்பாடி பழனிசாமிக்கு எதிராகச் சேலம் காவல்துறை பதிவு செய்திருந்த இரண்டு வழக்குகளையும் சென்னை உயர்நீதிமன்றம் அதிரடியாக ரத்து செய்து உத்தரவிட்டுள்ளதுடன், அரசியல்வாதிகளுக்குப் போராட்டம் நடத்த ஜனநாயக ரீதியில் உரிமை உண்டு எனவும் திட்டவட்டமாகத் தெரிவித்துள்ளது.

கடந்த 2021 மற்றும் 2022-ஆம் ஆண்டுகளில் கொரோனா பெருந்தொற்றுப் பரவல் தடுப்பு விதிகள் மற்றும் ஊரடங்கு கட்டுப்பாடுகள் அமலில் இருந்த காலகட்டத்தில், தடையை மீறிப் பொதுமக்களை ஒன்றுதிரட்டி கண்டன ஆர்ப்பாட்டங்களில் ஈடுபட்டதாகக் கூறி முன்னாள் முதலமைச்சர் எடப்பாடி பழனிசாமி உள்ளிட்ட அதிமுக நிர்வாகிகள் மீது சேலம் டவுன் காவல்துறையினர் சட்டவிரோதமாகக் கூடுதல், அரசு உத்தரவை மீறுதல் உள்ளிட்ட பல்வேறு பிரிவுகளின் கீழ் 2 வழக்குகளைப் பதிவு செய்திருந்தனர். தன் மீதான இந்த இரு வழக்குகளையும் ரத்து செய்யக் கோரி எடப்பாடி பழனிசாமி தரப்பில் சென்னை உயர்நீதிமன்றத்தில் மனுக்கள் தாக்கல் செய்யப்பட்டன.

இந்த மனுக்கள் சென்னை உயர்நீதிமன்ற நீதிபதி வி.லட்சுமி நாராயணன் அமர்வில் இன்று தீவிர விசாரணைக்கு வந்தன. வழக்கை விசாரித்த நீதிபதி, மக்களாட்சித் தத்துவத்தின் கீழ் அரசியல்வாதிகளுக்கும் பொதுவாழ்வில் இருப்பவர்களுக்கும் மக்கள் நலன் சார்ந்து தங்களது கருத்துகளை வெளிப்படுத்தவும், ஜனநாயக வழியில் போராட்டங்களை முன்னெடுக்கவும் முழு உரிமை உண்டு எனக் குறிப்பிட்டதோடு, எடப்பாடி பழனிசாமிக்கு எதிராகச் சேலம் டவுன் போலீசாரால் பதிவு செய்யப்பட்ட 2 வழக்குகளையும் ஒட்டுமொத்தமாக ரத்து செய்து தீர்ப்பளித்தார்.

இதையும் படிங்க: கல்லட்டி மலைப்பாதையில் சுற்றுலா வாகனங்களுக்கு புதிய கட்டுப்பாடு! சென்னை உயர்நீதிமன்றம்  உத்தரவு!

இதேபோன்று, சட்டமன்றத் தேர்தல் விதிமீறல் தொடர்பாக அதிமுக முன்னாள் அமைச்சர் கடம்பூர் ராஜூ மீது காவல்துறையினரால் பதிவு செய்யப்பட்டு நிலுவையில் இருந்த வழக்கையும் நீதிபதி வி.லட்சுமி நாராயணன் அதிரடியாக ரத்து செய்து உத்தரவிட்டார். முன்னாள் முதலமைச்சர் மற்றும் முன்னாள் அமைச்சர் மீதான வழக்குகள் அடுத்தடுத்து ரத்து செய்யப்பட்டுள்ளது அதிமுக வட்டாரத்தில் பெரும் வரவேற்பைப் பெற்றுள்ளது.

இதையும் படிங்க: எம்ஜிஆர், ஜெயலலிதாவுடன் இணைந்து கலக்கியவர்! சௌகார் ஜானகி மறைவுக்கு இபிஎஸ் ஆழ்ந்த இரங்கல்!