மதுரை மாவட்ட பள்ளிகளுக்கு இன்று விடுமுறை இல்லை என அறிவிக்கப்பட்டிருந்த நிலையில், தற்போது பள்ளிகளுக்கு மட்டும் விடுமுறை அறிவிக்கப்பட்டுள்ளது.

வங்கக்கடலில் நிலை கொண்டுள்ள ஆழ்ந்த காற்றழுத்தத் தாழ்வுப் பகுதி புதன்கிழமையன்று புயலாக மாற வாய்ப்புள்ளதாக வானிலை ஆய்வு மையம் தெரிவித்துள்ளது.

தெற்கு அந்தமான் கடல் பகுதியில் நேற்று உருவான குறைந்த காற்றழுத்த தாழ்வுப் பகுதி ஆழ்ந்த காற்றழுத்தத் தாழ்வுப் பகுதியாக வலுவடைந்து அதே பகுதியில் நிலவி வருவதாக வானிலை மையம் கூறியுள்ளது.

இதையும் படிங்க: விடாமல் வெளுத்து வாங்கும் கனமழை: புதுச்சேரி, காரைக்காலில் இன்று பள்ளி,கல்லூரிகளுக்கு விடுமுறை...!

இது, மேற்கு-வடமேற்கு திசையில் நகர்ந்து நாளை தென்கிழக்கு வங்கக்கடலில் காற்றழுத்த தாழ்வு மண்டலமாக வலுப்பெறும் என்றும், அதற்கடுத்த 48 மணி நேரத்தில் புயலாக வலுவடையலாம் என்றும் கணிக்கப்பட்டுள்ளது.

தென் மாவட்டங்களில் நேற்று பிற்பகலில் தொடங்கிய கனமழை இரவிலும் நீடித்ததது. குறிப்பாக தாமிரபரணி ஆற்றின் நீர்பிடிப்புப் பகுதிகளான திருநெல்வேலி மற்றும் தென்காசி மாவட்டங்களில் தொடர்ந்து மழை பெய்து வருகிறது.

இதனால் இரு மாவட்டங்களிலும் பள்ளி, கல்லூரிகளுக்கு விடுமுறை அறிவித்து அந்தந்த மாவட்ட ஆட்சியர்கள் அறிவித்துள்ளனர். இதேபோல் நேற்று தூத்துக்குடி மாவட்ட பள்ளிகளுக்கும் விடுமுறை அறிவிக்கப்பட்டது. 

இதன் தொடர்ச்சியாக மதுரை மாவட்டத்திற்கும் விடுமுறை தொடர்பான அறிவிப்பு வெளியாகும் என எதிர்பார்க்கப்பட்ட நிலையில், விடுமுறை இல்லை என ஆட்சியர் பிரவீன் குமார் அறிவித்தார்.

தற்போது தொடர் கனமழை காரணமாக ராமநாதபுரம், கள்ளக்குறிச்சி, திருவாரூர், புதுக்கோட்டை, திருச்சி, மயிலாடுதுறை, விருதுநகர், தஞ்சாவூர், சிவகங்கை, கரூர், நாகை, அரியலூர் என 14 மாவட்டங்களில் உள்ள பள்ளிகளுக்கு விடுமுறை அளித்து அந்தந்த மாவட்ட ஆட்சியர்கள் உத்தரவிட்டுள்ளனர்.

மதுரையிலும் தொடர்ந்து மழை பெய்து வரும் நிலையில் இன்று விடுமுறை அறிவிக்கப்படுமா? என மாணவர்கள் ஆவலுடன் காத்திருந்தனர். அதற்கு ஏற்ப, மதுரை மாவட்டத்தில் உள்ள பள்ளிகளுக்கு மட்டும் இன்று ஒரு நாள் விடுமுறை அளிப்பதாக மாவட்ட ஆட்சியர் பிரவீன்குமார்  அறிவித்துள்ளார்.

இதையும் படிங்க: #BREAKING தொடரும் கனமழை; தமிழகத்தில் இன்று 15 மாவட்டங்களில் பள்ளிகளுக்கு விடுமுறை... எங்கெல்லாம் கல்லூரிகளுக்கு லீவு?