தமிழகத்தில் சட்டம் ஒழுங்கைப் பாதுகாக்கும் தூண்களாக விளங்கும் காவலர்கள் ஒருநாள் மட்டும் தங்களது பணியில் இல்லை என்றால் இந்தச் சமூகத்தில் என்ன நடக்கும் என்று நினைத்துப் பார்த்தீர்களா? அவர்கள் இல்லாமல் உங்களால் எப்படிப் போக்குவரத்து நெரிசல் இன்றிச் சாலைகளில் வர முடியும்?" என்று சென்னை உயர்நீதிமன்ற மதுரை அமர்வு நீதிபதிகள் கேள்வி எழுப்பியுள்ளனர்.

தமிழகக் காவல்துறையினரின் பணிப் சுமையைக் குறைக்கும் நோக்கில், அவர்களுக்குத் தினசரி 8 மணி நேர வேலை முறையைத் துல்லியமாக அமல்படுத்த வேண்டும் என்றும், காவல் நிலையங்களில் பயோமெட்ரிக் வருகைப் பதிவேடு (Biometric Attendance) முறையைக் கொண்டு வர வேண்டும் என்றும் வலியுறுத்தி உயர்நீதிமன்ற மதுரை அமர்வில் பொதுநல வழக்கு ஒன்று தாக்கல் செய்யப்பட்டிருந்தது. இந்த முக்கிய மனு இன்று நீதிபதிகள் அமர்வு முன்னிலையில் விசாரணைக்கு வந்தது.

மனுவை விரிவாக விசாரித்த நீதிபதிகள், காவல்துறையினரின் தொடர்ச்சியான இரவு பகல் பாராத கடின உழைப்பைச் சுட்டிக்காட்டி உணர்ச்சிப்பூர்வமாகக் கருத்துத் தெரிவித்தனர். அப்போது, பொதுமக்கள் தங்களது அன்றாடப் பணிகளை எவ்வித பயமும் இன்றி மேற்கொள்வதற்குக் காவலர்களின் தியாகமே முதன்மைக் காரணம். போக்குவரத்து நெரிசலைச் சீரமைப்பது முதல் குற்றங்களைத் தடுப்பது வரை அவர்களின் பங்கு அளப்பரியது. அப்படிப்பட்ட காவலர்களுக்கு 8 மணி நேர வேலை மற்றும் முறையான வருகைப்பதிவு போன்ற உள்கட்டமைப்பு வசதிகளை ஏற்படுத்துவது குறித்து அரசு தீவிரமாகப் பரிசீலிக்க வேண்டும் என்று குறிப்பிட்டனர். 

இதையும் படிங்க: டாஸ்மாக் பார் உரிமையாளர்கள் வாழ்வாதார பிரச்சனை! உயர் நீதிமன்றம் பிறப்பித்த முக்கிய உத்தரவு!

மேலும், இந்த விவகாரம் தொடர்பாகத் தமிழக அரசின் தலைமைச் செயலாளர், உள்துறைச் செயலாளர் மற்றும் மாநிலக் காவல்துறை இயக்குநர் (DGP) ஆகியோர் அடுத்த சில வாரங்களுக்குள் விரிவான தகுந்த விளக்க அறிக்கையைத் தாக்கல் செய்ய வேண்டும் என்று நீதிபதிகள் அதிரடியாக உத்தரவிட்டு வழக்கை ஒத்திவைத்தனர். காவல்துறையினரின் பணிப் பாதுகாப்பு மற்றும் உரிமைகள் குறித்து நீதிமன்றம் எழுப்பியுள்ள இந்தத் தார்மீகக் கேள்வி ஒட்டுமொத்த காக்கிச் சட்டை வட்டாரத்திலும் தற்பொழுது பெரும் வரவேற்பைப் பெற்றுள்ளது.

இதையும் படிங்க: தமிழகத்தில் குட்கா, பான் மசாலா தடை..!! மேலும் ஒரு ஆண்டுக்கு நீட்டிப்பு..!!