தமிழகத்தில் ஆட்சியமைப்பை சுற்றிய அரசியல் பரபரப்பு தொடர்ந்து அதிகரித்து வரும் நிலையில், தமிழக வெற்றிக் கழக தலைவர் விஜயை ஆட்சி அமைக்க அழைப்பதில் ஆளுநர் தாமதம் செய்கிறார் என்று காங்கிரஸ் எம்.பி மாணிக்கம் தாகூர் கடுமையாக விமர்சித்துள்ளார். அவரது கருத்துகள் தற்போது தமிழக அரசியலில் புதிய விவாதத்தை கிளப்பியுள்ளது.

தமிழக ஆளுநரை விஜய் சந்தித்தது குறித்து செய்தியாளர்களிடம் பேசிய மாணிக்கம் தாகூர், “தமிழக மக்கள் இந்த தேர்தலில் மாற்றத்திற்காக வாக்களித்துள்ளனர். புதிய தலைமையை மக்கள் தேர்ந்தெடுத்துள்ளனர். தமிழக வெற்றிக் கழகம் 108 உறுப்பினர்களுடன் உருவெடுத்துள்ளது. காங்கிரஸ் கட்சியின் 5 உறுப்பினர்களின் ஆதரவுடன் அந்த எண்ணிக்கை 113 ஆக உயர்கிறது. பெரும்பான்மைக்கு 118 எம்எல்ஏக்கள் தேவைப்படுகிறது” என்று தெரிவித்தார்.

மேலும், “முன்னாள் பாஜக நிர்வாகியாக இருந்த ஆளுநர் தற்போது பல்வேறு அழுத்தங்களின் கீழ் செயல்படுகிறார். விஜய் முதலமைச்சராக வரக்கூடாது என்பதே டெல்லியின் மனநிலை. விஜய் ஆட்சி அமைப்பதை பாஜக விரும்பவில்லை என்பது அனைவருக்கும் தெரியும். அதனால் தான் ஆளுநர் முடிவெடுக்க தாமதிக்கிறார்” என்று குற்றம்சாட்டினார்.

இதையும் படிங்க: 118 எங்கே? எண்ணிக்கையை நிரூபித்த பின்னரே பதவியேற்க முடியும்!! கறார் காட்டும் கவர்னர்!

“ஆளுநர் தனிப்பட்ட முறையில் நல்லவர் என்றாலும், அரசியல் அழுத்தம் அதிகமாக உள்ளது. தமிழகத்தில் பாஜகவுக்கு ஒரு எம்எல்ஏ மட்டுமே இருந்தாலும், அந்த ஒரு உறுப்பினரையே வைத்து அரசியல் செய்ய அவர்கள் தயாராக உள்ளனர். இது ஜனநாயகத்திற்கு நல்லதல்ல” என்றும் அவர் கூறினார்.

மாணிக்கம் தாகூர் மேலும் பேசுகையில், “மாற்றத்திற்காகவும் நம்பிக்கைக்காகவும் மக்கள் வாக்களித்த அரசை தடுக்க முயற்சிப்பது மிகப்பெரிய தவறு. விஜயை உடனடியாக ஆட்சி அமைக்க அழைக்க வேண்டும். அதன் பிறகு சட்டசபையில் பெரும்பான்மையை நிரூபிக்க வாய்ப்பு அளிக்க வேண்டும். அதுவே இயற்கை நீதிக்கும் ஜனநாயக நடைமுறைக்கும் பொருத்தமானது” என்று வலியுறுத்தினார்.

விஜய்க்கு ஆதரவாக காங்கிரஸ் உள்ளிட்ட பல்வேறு கட்சிகள் தொடர்ந்து கருத்து தெரிவித்து வரும் நிலையில், ஆளுநரின் அடுத்த முடிவு என்னவாக இருக்கும் என்பதே தற்போது தமிழக அரசியலில் மிகப்பெரிய எதிர்பார்ப்பாக மாறியுள்ளது.

இதையும் படிங்க: எதற்காக விஜய்க்கு ஆதரவு..? விமர்சனங்களை உடைத்த காங்கிரஸ் MLA ராஜேஷ்..!!