முதலமைச்சர் விஜய்யின் 52-வது பிறந்தநாளை முன்னிட்டு மதுரை மாவட்டம் மேலூரில் நடைபெற்ற விழாவில், உயர்கல்வித்துறை அமைச்சர் விஸ்வநாதனின் நடன நிகழ்ச்சி அரசியல் வட்டாரங்களிலும் சமூக வலைதளங்களிலும் பரபரப்பை ஏற்படுத்தியுள்ளது.

மேலூர் அரசு ஆண்கள் மேல்நிலைப்பள்ளி வளாகத்தில் நடைபெற்ற பிறந்தநாள் கொண்டாட்டத்தின் ஒரு பகுதியாக மாபெரும் மாரத்தான் போட்டி நடத்தப்பட்டது. பள்ளி வளாகத்தில் இருந்து தொடங்கிய இந்த போட்டி சுமார் 4 கிலோமீட்டர் தூரம் நடைபெற்றது. இதில் 10 வயது சிறுவர்கள் முதல் இளைஞர்கள், பொதுமக்கள் என 1,500-க்கும் மேற்பட்டோர் ஆர்வமுடன் பங்கேற்றனர்.

இந்த நிகழ்ச்சியை தொடங்கி வைக்க மேலூர் தொகுதி சட்டமன்ற உறுப்பினரும், உயர்கல்வித்துறை அமைச்சருமான விஸ்வநாதன் கலந்து கொண்டார். நிகழ்ச்சிக்காக அமைக்கப்பட்டிருந்த மேடையில், விஜய் நடித்த திரைப்பட பாடல்கள் ஒலிபரப்பப்பட்டன. அப்போது அமைச்சர் விஸ்வநாதன், கட்சியின் பெண் நிர்வாகி ஒருவருடன் இணைந்து பாடல்களுக்கு உற்சாகமாக நடனமாடினார்.

இதையும் படிங்க: முதல்வராக விஜய்க்கு முதல் பிறந்தநாள்! நாளை வெளியாகிறது முக்கிய அறிவிப்பு! ப்ளாஸ்ட்டு ப்ளாஸ்டு!

அமைச்சரின் இந்த நடன நிகழ்வு அங்கிருந்த கட்சி நிர்வாகிகள் மற்றும் தொண்டர்களிடையே உற்சாகத்தை ஏற்படுத்திய நிலையில், மாணவர்கள் மற்றும் இளைஞர்களும் இசைக்கு ஏற்ப நடனமாடி மகிழ்ந்தனர். நிகழ்ச்சியில் பங்கேற்ற பலரும் கைதட்டி வரவேற்றனர்.

அதே நேரத்தில், அரசு பள்ளி வளாகத்தில் நடைபெற்ற பொதுநிகழ்வின் போது அமைச்சர் இவ்வாறு மேடையில் நடனமாடியது குறித்து சில தரப்பினரிடையே விமர்சனங்களும் எழுந்துள்ளன. குறிப்பாக பள்ளி மாணவர்கள் மற்றும் பெற்றோர்கள் முன்னிலையில் நடைபெற்ற நிகழ்ச்சியில் அமைச்சரின் செயல்பாடு குறித்து சமூக வலைதளங்களில் பல்வேறு கருத்துகள் பகிரப்பட்டு வருகின்றன.

இதனால், இந்த சம்பவம் அரசியல் ரீதியாகவும் கவனத்தை ஈர்த்துள்ளது. ஆதரவாளர்கள் இதை ஒரு பிறந்தநாள் விழாவின் உற்சாகமான தருணமாகக் கருதினாலும், எதிர்க்கட்சியினர் மற்றும் சில சமூக ஆர்வலர்கள் அரசு நிகழ்வுகளில் பொறுப்பான அணுகுமுறை அவசியம் என கருத்து தெரிவித்து வருகின்றனர்.

மதுரையில் நடைபெற்ற இந்த நிகழ்வு தற்போது சமூக வலைதளங்களில் வைரலாக பரவி வரும் நிலையில், அமைச்சர் விஸ்வநாதனின் நடன காட்சிகள் அரசியல் அரங்கில் புதிய விவாதத்தை உருவாக்கியுள்ளன.

இதையும் படிங்க: அரசு பள்ளியில் முதல்வர் விஜய் போட்டோவுடன் ரீல்ஸ்! தவெக நிர்வாகி நீக்கம்! அதிரடி உத்தரவு!