பிரதமர் நரேந்திர மோடியின் தமிழக வருகை தொடர்பாக ஒரு முக்கிய மாற்றம் ஏற்பட்டுள்ளது. சென்னையில் நாளை தமிழக பா.ஜ. மாவட்ட தலைவர்களுடன் நடைபெற இருந்த கலந்துரையாடல் நிகழ்ச்சி ரத்து செய்யப்பட்டுள்ளது.

பிரதமர் மோடி இன்று மாலை 3:20 மணிக்கு சென்னை வருகிறார். புதுச்சேரியில் தேர்தல் பிரசாரம் செய்வதற்காக ஹெலிகாப்டரில் அங்கு சென்று, பிரசாரத்தை முடித்துவிட்டு மாலை 6:40 மணிக்கு சென்னை திரும்புகிறார். இரவு கிண்டியில் உள்ள நட்சத்திர ஹோட்டலில் தங்கும் அவர், பா.ஜ. மூத்த நிர்வாகிகளை சந்தித்து பேச உள்ளார்.

நாளை காலை 11 மணி முதல் 12 மணி வரை தமிழகத்தில் உள்ள 66 மாவட்ட தலைவர்களுடன் தேர்தல் பணிகள் குறித்து ஆலோசனை நடத்த திட்டமிடப்பட்டிருந்தது. மாவட்ட தலைவர்களுக்கும் அழைப்பு அனுப்பப்பட்டிருந்தது. ஆனால் இந்த சந்திப்பு ரத்து செய்யப்பட்டுள்ளது.

இதையும் படிங்க: விஜய்க்கு அழைப்பு விடுத்த பாஜக நிர்வாகி!! பதவியை பறித்த தலைமை!! ஆக்‌ஷனில் இறங்கிய நயினார் நாகேந்திரன்!

பிரதமர் மோடி, “தேர்தலுக்கு இன்னும் மூன்று வாரங்கள் கூட இல்லை. பிரசாரத்தில் ஈடுபட்டுள்ள நிர்வாகிகளை சென்னைக்கு அழைத்து சிரமப்படுத்தக் கூடாது. ஒரு நிமிடம் கூட வீணாக்காமல் புதிய வாக்காளர்களை சந்தித்து ஓட்டு சேகரிக்க வேண்டும்” எனக் கூறியதாகத் தெரிகிறது. அதனால் மாவட்ட தலைவர்களுடனான நேரடி சந்திப்புக்கு பதிலாக வீடியோ கான்பரன்ஸ் மூலம் பேச முடிவு செய்துள்ளார்.

இந்த முடிவு தமிழக பா.ஜ.வினரிடையே ஆச்சரியத்தை ஏற்படுத்தியுள்ளது. தேர்தல் பணிகளில் தீவிரமாக ஈடுபட்டுள்ள நிர்வாகிகளின் நேரத்தை மதித்து எடுக்கப்பட்ட முடிவு இது என பா.ஜ. வட்டாரங்கள் தெரிவிக்கின்றன. 

எனினும் பிரதமர் மோடி சென்னையில் தங்கும் இரவில் மூத்த நிர்வாகிகளுடன் தனியாக சந்தித்து தேர்தல் பணிகள் குறித்து ஆலோசனை நடத்தி, அவர்களுக்கு அறிவுரைகள் வழங்க உள்ளார். தமிழகத்தில் பா.ஜ.வின் தேர்தல் உத்திகளை வலுப்படுத்தும் வகையில் இந்த ஆலோசனை முக்கியத்துவம் வாய்ந்ததாகக் கருதப்படுகிறது.

தேர்தல் நெருங்கும் நேரத்தில் பிரதமரின் இந்த முடிவு, கட்சி நிர்வாகிகளின் பணியை முன்னிறுத்தும் அவரது அணுகுமுறையை வெளிப்படுத்துவதாக அரசியல் விமர்சகர்கள் கூறுகின்றனர். மாவட்ட தலைவர்களுடனான வீடியோ கான்பரன்ஸ் எப்போது நடைபெறும் என்பது விரைவில் அறிவிக்கப்படும் என எதிர்பார்க்கப்படுகிறது.

இதையும் படிங்க: ஆம்ஸ்ட்ராங் கொலை வழக்கில் டிரான்ஸ்பர்?! யார் இந்த சந்தீப் ராய் ரத்தோர்! இரவோடு இரவாக பொறுப்பேற்பு!