உதயநிதி ஸ்டாலின் மீது நடவடிக்கை எடுக்க தேசிய மகளிர் ஆணையம் பரிந்துரை!

தஞ்சாவூரில் நடைபெற்ற ஆர்ப்பாட்டக் கூட்டத்தில் பெண்கள் மற்றும் நடிகை குறித்து அவதூறாகப் பேசியதாக எழுந்த விவகாரத்தில், எதிர்க்கட்சித் தலைவரும் திமுக முக்கியத் தலைவருமான உதயநிதி ஸ்டாலின் மீது உரிய சட்டப்படியான நடவடிக்கை எடுக்க வேண்டும் என்று தமிழ்நாடு மாநில மகளிர் ஆணையத்திற்குத் தேசிய மகளிர் ஆணையம் அதிகாரப்பூர்வமாகப் பரிந்துரை செய்துள்ளது.

தஞ்சாவூரில் அண்மையில் நடைபெற்ற கண்டன ஆர்ப்பாட்டக் கூட்டத்தில் கலந்துகொண்டு உரையாற்றிய உதயநிதி ஸ்டாலின், பெண்களை இழிவுபடுத்தும் வகையிலும் நடிகை த்ரிஷாவின் கண்ணியத்தைக் குறைக்கும் வகையிலும் அவதூறான கருத்துகளைப் பேசியதாக அரசியல் வட்டாரங்களில் சர்ச்சை வெடித்தது. இதற்கு எதிர்ப்பு தெரிவித்து தமிழக வெற்றிக் கழகத்தின் வழக்கறிஞர் ஆதித்ய சோழன், கடந்த ஆகஸ்ட் 4-ஆம் தேதி புதுடெல்லியில் உள்ள தேசிய மகளிர் ஆணையத்தில் உதயநிதி ஸ்டாலினுக்கு எதிராக விரிவான புகார் மனு ஒன்றை நேரில் தாக்கல் செய்திருந்தார்.

அப்புகார் மனுவில், பொதுவெளியில் ஒரு பொறுப்புமிக்க எதிர்க்கட்சித் தலைவராக இருக்கும் உதயநிதி ஸ்டாலின், மேடையில் பெண்களைக் கொச்சைப்படுத்தும் வகையில் பேசியுள்ளது வன்மையாகக் கண்டிக்கத்தக்கது. அவரது தனிப்பட்ட மற்றும் வரம்புமீறிய பேச்சினால் நடிகை த்ரிஷா மன உளைச்சலுக்கும் சமூக ரீதியான பாதிப்புகளுக்கும் ஆளாகியுள்ளார்; எனவே பெண்கள் வன்கொடுமைத் தடுப்புச் சட்டங்களின் கீழ் உதயநிதி ஸ்டாலின் மீது கடுமையான சட்ட நடவடிக்கை எடுக்க வேண்டும் என வலியுறுத்தப்பட்டிருந்தது.

இதையும் படிங்க: தைரியமிருந்தால் 3 பைல்களை திறங்கள்! முதல்வர் விஜய்க்கு உதயநிதி ஸ்டாலின் சவால்!

இப்புகாரைப் பரிசீலித்த தேசிய மகளிர் ஆணையம், இச்சம்பவம் தொடர்பாக விரிவான கள விசாரணை நடத்தி, சம்பந்தப்பட்ட நபரின் மீது உரிய சட்ட விதிகள் மற்றும் நெறிமுறைகளின்படி தகுந்த நடவடிக்கைகளை உடனடியாக மேற்கொள்ள வேண்டும் எனத் தமிழ்நாடு மாநில மகளிர் ஆணையத்திற்கு உத்தரவிட்டுப் பரிந்துரைக் கடிதம் அனுப்பியுள்ளது. இச்சம்பவம் தமிழக அரசியல் மற்றும் திரைத்துறை வட்டாரத்தில் பெரும் பரபரப்பையும் காரசாரமான விவாதங்களையும் கிளப்பியுள்ளது.

இதையும் படிங்க:  தேர்தல் வழக்கை நிராகரிக்கக் கோரி உதயநிதி ஸ்டாலின் மனு: மிலானி பதிலளிக்க ஐகோர்ட் உத்தரவு!