தமிழகத்தில் மது பாட்டில்களுக்கு ரூ.10 கூடுதலாக நிர்ணயிக்கப்பட்டுள்ளது புதிய விலை உயர்வு அல்ல என்றும், கடந்த காலங்களில் பாட்டில்களைத் திரும்பப் பெறும் திட்டத்தில் தனிநபர்களுக்குச் சென்ற தொகையை அரசு கஜானாவிற்குக் கொண்டு வரவும் முறைகேடுகளைத் தடுக்கவுமே இந்த நடவடிக்கை எடுக்கப்பட்டுள்ளது என்றும் மதுவிலக்கு மற்றும் ஆயத்தீர்வைத் துறை அமைச்சர் விக்னேஷ் விளக்கமளித்துள்ளார்.

சென்னையில் இன்று செய்தியாளர்களைச் சந்தித்த அமைச்சர் விக்னேஷ், மது பாட்டில்களுக்கு ரூ.10 விலை உயர்த்தப்பட்டுவிட்டதாகத் தவறான தகவல்கள் பரப்பப்பட்டு வருகின்றன. மாற்றுக்கட்சியில் நான் மதிக்கும் சிலர் கூட இந்த நடைமுறையைச் சரியாகப் புரிந்து கொள்ளாமல் பேசி வருகின்றனர். கடந்த ஆட்சிக் காலத்தில், ஒரு பாட்டிலுக்கு கூடுதலாக ரூ.10 வசூலித்து, காலி பாட்டில்களைத் திரும்ப ஒப்படைக்கும் போது அத்தொகை திரும்ப வழங்கப்படும் என அறிவிக்கப்பட்டது. 

அவ்வாறு வசூலிக்கப்பட்ட தொகை அரசுக்கு வராமல் தனிநபர்களுக்குச் செல்லக் கூடாது என்பதற்காகவே, தற்போது அந்த ரூ.10 தொகையை அதிகாரப்பூர்வமாக அதிகபட்ச சில்லறை விற்பனை விலையிலேயே (MRP) சேர்த்துள்ளோம். ஏற்கனவே வாங்கப்பட்டு வந்த பணம்தான் இனியும் வாங்கப்படுகிறதே தவிர, இது புதிய கட்டண உயர்வு அல்ல.

இதையும் படிங்க: “பாட்டிலுக்கு 10 ரூபாய் எக்ஸ்ட்ரா...” - நவம்பர் 1 முதல் குடிமகன்களுக்கு ‘டபுள் ட்விஸ்ட்’ கொடுத்த தமிழ்நாடு அரசு...!

கடந்த காலத்தில் பாட்டிலுக்கு ரூ.10 என ஆண்டுக்குச் சுமார் ரூ.3,600 கோடி வரை வசூலிக்கப்பட்டது. அதில் 3 இடங்களில் ஆய்வு செய்ததில், 55 முதல் 60 சதவீதம் பேர் மட்டுமே காலி பாட்டில்களைத் திரும்பக் கொடுத்து ரூ.10-ஐப் பெற்றுள்ளனர். எஞ்சிய 40 சதவீத பாட்டில்களுக்கான சுமார் ரூ.120 முதல் ரூ.140 கோடி வரை எங்கு சென்றது என்ற கணக்கே இல்லாமல் இருந்தது. 

அவ்வாறு கணக்கில் வராமல் தனிநபர்களுக்குச் சென்ற பணம், இனி முறைப்படி அரசின் கஜானாவிற்கு நேரடியாக வந்து சேரும். அந்த நிதி சுற்றுச்சூழல் மேம்பாட்டுப் பணிகளுக்காகப் பயன்படுத்தப்படும். பொதுமக்கள் எந்த டாஸ்மாக் கடையில் வேண்டுமானாலும் காலி பாட்டில்களைத் திருப்பிக் கொடுத்து ரூ.10-ஐப் பெற்றுக் கொள்ளலாம்.

காலி மது பாட்டில்களைப் பாதுகாப்பாக வாங்கி வைப்பதற்காக ஒவ்வொரு கடைக்கும் கூடுதலாக ரூ.1,000 வழங்கப்படும். அந்த நிதியைப் பயன்படுத்தி கூடுதல் பணியாளர்களை கடைகளில் அமர்த்திக் கொள்ளலாம். மதுவிலக்குத் துறையில் புதிய பணியிடங்களை உருவாக்கும் எண்ணம் அரசுக்கு இல்லை. மேலும், எஃப்எல்-2 (FL-2) உள்ளிட்ட அனைத்து பார்களுக்கும் இந்த ரூ.10 கூடுதல் தொகை எம்ஆர்பி-யில் சேர்க்கப்பட உள்ளது.

என் பெயரைப் பயன்படுத்தி டாஸ்மாக் கடைகளில் யாரும் பணம் வசூலிக்க வந்தால் அவர்களை யாரும் நம்ப வேண்டாம். பணம் கொடுத்தால் கடைகளுக்கு ஆதாயம் கிடைக்கும் எனக் கூறி யாராவது வசூலில் ஈடுபட்டால், பணம் வாங்கியவர்கள் மீது மட்டுமல்லாமல் லஞ்சம் கொடுத்தவர்கள் மீதும் கடுமையான சட்ட நடவடிக்கை பாயும்" என்று அவர் எச்சரித்தார்.

இதையும் படிங்க: டாஸ்மாக் கடைகளில் நவம்பர் 1 முதல் புதிய ரூல்ஸ்..! கேஷ் கொடுக்க முடியாதா.? முக்கிய அறிவிப்பு..!!