வடகிழக்கு பருவமழை தொடங்கவுள்ள நிலையில் தமிழக முதலமைச்சர் விஜய் சென்னை நகரின் வெள்ளத்தடுப்பு முன்னேற்பாடுகளை நேரில் ஆய்வு செய்யும் பணியில் ஈடுபட்டுள்ளார். குறிப்பாக வடசென்னை பகுதிகளில் மழைநீர் தேங்காமல் சுமூகமாக வெளியேற வழிவகுக்கும் வடிகால் அமைப்புகளை மேம்படுத்தும் பணிகள் குறித்து அவர் தனிக்கவனம் செலுத்தி வருகிறார்.பெரம்பூர் தொகுதிக்கு உட்பட்ட முல்லை நகர் பகுதியில் அமைந்துள்ள கால்வாய் மற்றும் பேசின் பாலம் கால்வாய் ஆகியவற்றை முதலமைச்சர் நேரில் பார்வையிட்டார்.

இந்த இடங்கள் கடந்த ஆண்டுகளில் மழைக்காலத்தில் வெள்ள அபாயத்துக்கு உள்ளான பகுதிகளாக இருந்ததால், இங்கு மேற்கொள்ளப்பட்டு வரும் வடிகால் பணிகளின் முன்னேற்றத்தை அவர் நேரடியாகக் கண்டார். அதிகாரிகள் அளித்த விளக்கங்களைக் கேட்டறிந்த அவர், பணிகள் விரைந்து முடிக்கப்பட வேண்டும் எனவும், மழை தொடங்குவதற்கு முன்பே அனைத்து ஏற்பாடுகளும் தயார்நிலையில் இருக்க வேண்டும் எனவும் அறிவுறுத்தினார்.

எம்கேபி நகரில் உள்ள முல்லை நகர் கால்வாய் மற்றும் பேசின் பிரிட்ஜ் பகுதிகளிலும் ஆய்வு தொடர்ந்தது. நேப்பியர் பாலத்தின் மீது நின்று அங்கிருந்து கால்வாயின் போக்கையும், சுற்றுப்புற வடிகால் அமைப்புகளையும் முதலமைச்சர் கவனித்தார். மழைநீர் தடையின்றி கடலை நோக்கிச் செல்லும் வகையில் கால்வாய்கள் தூர்வாரப்பட்டு, அகலப்படுத்தப்பட்டு வருவதை அவர் பாராட்டினார்.

இதையும் படிங்க: வடகிழக்கு பருவ மழை எப்போது..? எல் நினோ தாக்கம்... இந்திய வானிலை ஆய்வு மையம் அப்டேட்..!!

அதேநேரம், எந்தவித தடையும் இல்லாமல் நீர் ஓட்டம் இருக்க வேண்டும் என்பதில் உறுதியாக இருந்தார்.வடசென்னை போன்ற அடர்த்தியான குடியிருப்புப் பகுதிகளில் மழைக்கால வெள்ளம் மக்களின் அன்றாட வாழ்க்கையை பெரிதும் பாதிக்கும் என்பதால், முன்னெச்சரிக்கை நடவடிக்கைகள் மிக முக்கியமானவை என்பதை முதலமைச்சர் வலியுறுத்தினார். 

இதையும் படிங்க: சென்னையில் சிங்கப்பூர் முதலீடு! அதிநவீன டேட்டா சென்டரை திறந்து வைத்த CM விஜய்..!