நாம் தமிழர் கட்சியின் தாராபுரம் இடைத்தேர்தல் வேட்பாளர் மு. கார்த்திகா உள்ளிட்ட கட்சியின் முக்கிய நிர்வாகிகள் மீது பொய் வழக்குத் தொடுத்து சிறையில் அடைத்த தமிழக வெற்றிக் கழக அரசின் அடக்குமுறை நடவடிக்கையைக் கண்டித்து, வரும் அக்டோபர் 24-ஆம் தேதி (சனிக்கிழமை) தமிழ்நாடு முழுவதும் உள்ள அனைத்து மாவட்டத் தலைநகரங்களிலும் மாபெரும் கண்டன ஆர்ப்பாட்டம் நடைபெறும் என்று நாம் தமிழர் கட்சியின் தலைமை ஒருங்கிணைப்பாளர் செந்தமிழன் சீமான் அறிவித்துள்ளார்.

திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தலில் நாம் தமிழர் கட்சி சார்பாகப் போட்டியிட்ட வேட்பாளரும், மகளிர் பாசறையின் மாநில ஒருங்கிணைப்பாளருமான மு. கார்த்திகா, அவரது கணவரும் தகவல் தொழில்நுட்பப் பாசறையின் மாநில ஒருங்கிணைப்பாளருமான முருக. சந்திரகுமார் மற்றும் மாநில ஒருங்கிணைப்பாளர் இசை. மதிவாணன் உள்ளிட்ட நாம் தமிழர் கட்சி நிர்வாகிகளை அரசியல் பழிவாங்கும் நோக்குடன் தவெக அரசு பொய் வழக்குகளில் கைது செய்து சிறைப்படுத்தியுள்ளது.

ஜனநாயக மாண்புகளுக்கு விரோதமாக மாற்றுக் கட்சியினரை ஒடுக்கும் நோக்கில் அதிகாரத்தைத் தவறாகப் பயன்படுத்திச் செயல்படும் தவெக அரசின் இந்த பாசிச அடக்குமுறையைக் கண்டித்து, தலைமை ஒருங்கிணைப்பாளர் செந்தமிழன் சீமான் அவர்களின் அறிவுறுத்தலின் பேரில், வரும் ஐப்பசி 07, 2026 (24-10-2026) சனிக்கிழமை காலை 10 மணியளவில் அனைத்து மாவட்டத் தலைநகரங்களிலும் மாநில ஒருங்கிணைப்பாளர்கள் முன்னிலையில் கண்டன ஆர்ப்பாட்டங்கள் முன்னெடுக்கப்பட உள்ளன.

இதையும் படிங்க: “கோமாளி விஜய் ஆட்சி ஒழிக...” - சிறைக்குச் செல்லும் முன்பு எரிமலையாய் குமுறிய கார்த்திகா... அதிகாலை 3 மணிக்கு நடந்த அவலம்...!

இப்போராட்டத்தில் அனைத்து சட்டமன்றத் தொகுதிகளைச் சேர்ந்த கட்சியின் மாநில, மண்டல, மாவட்ட, ஒன்றிய, நகர மற்றும் கிளைப் பொறுப்பாளர்களும், தகவல் தொழில்நுட்பப் பாசறை, மகளிர் பாசறை உள்ளிட்ட அனைத்துப் பாசறைகளின் நிர்வாகிகளும், நாம் தமிழர் உறவுகளும் பெருந்திரளாகப் பங்கேற்குமாறு அந்த அறிக்கையில் கேட்டுக்கொள்ளப்பட்டுள்ளது.

இதையும் படிங்க: நாதக கார்த்திகாவுக்கு ரிமாண்ட்.! அதிகாலை கைதும்... 15 நாள் சிறையும்..! பரபரக்கும் தாராபுரம்..!