ஓ. பன்னீர்செல்வம், அதிமுக தொண்டர்கள் உரிமை மீட்புக் குழுவின் ஒருங்கிணைப்பாளராக இருந்து, பாஜக தலைமையிலான தேசிய ஜனநாயகக் கூட்டணியில் இணைந்து செயல்பட்டு வந்தார். ஆனால், இந்தக் கூட்டணியில் இருந்து விலகுவது என ஓபிஎஸ் தரப்பு முடிவு செய்தது. இந்த முடிவு எடுக்கப்பட்டதற்கு முன்னர், ஓபிஎஸ் பிரதமர் மோடியை சந்திக்க விரும்பியதாகவும், அதற்காக நயினார் நாகேந்திரனைத் தொடர்பு கொள்ள முயற்சித்ததாகவும் கூறப்படுகிறது.

இதற்கு ஆதாரமாக, ஓபிஎஸ் தனது கைபேசி மூலம் நயினார் நாகேந்திரனுக்கு குறுஞ்செய்தி அனுப்பியதாகவும், ஆறு முறை அவரை அழைத்தும் பதில் இல்லை எனவும் தெரிவித்தார்.

 இந்தக் குறுஞ்செய்தி மற்றும் அழைப்பு முயற்சிகளை சுட்டிக்காட்டி, நயினார் நாகேந்திரன் தன்னை தவிர்த்துவிட்டதாக ஓபிஎஸ் குற்றம் சாட்டினார். இதற்கு மறுப்பு தெரிவித்த நயினார் நாகேந்திரன், ஓபிஎஸ்-ன் குற்றச்சாட்டுகளில் உண்மையில்லை என்றும், தான் பிரதமரைச் சந்திக்க ஏற்பாடு செய்யத் தயாராக இருந்ததாகவும் கூறினார்.

இதையும் படிங்க: NDA கூட்டணியில் இருந்து ஓபிஎஸ் வெளியேறியதால் வருத்தம்... டிடிவி தினகரன் பேட்டி

மேலும், ஓபிஎஸ் குறிப்பிட்ட குறுஞ்செய்தி அல்லது கடிதம் தனக்கு இன்னும் வரவில்லை என்றும், அவை வந்தால் அதை உரிய முறையில் காட்டுவதாகவும் அவர் தெரிவித்தார். ஓபிஎஸ்-ன் முடிவுக்கு வேறு தனிப்பட்ட காரணங்கள் இருக்கலாம் என்று குறிப்பிட்டு, அவர் உண்மையை மறைப்பதாகவும் நயினார் குற்றம் சாட்டினார். 

இந்த மோதல், இரு தரப்பினருக்கும் இடையேயான தொடர்பு முறிவு மற்றும் அரசியல் உறவில் ஏற்பட்ட பிளவை வெளிப்படுத்துகிறது. ஓபிஎஸ்-ன் தரப்பு, தனது கூட்டணி முடிவு சுயமரியாதை மற்றும் தொண்டர்களின் நலனுக்காக எடுக்கப்பட்டது என்று வாதிடுகிறது. அதே நேரத்தில், நயினார் நாகேந்திரன், தான் எந்தத் தவறும் செய்யவில்லை என்றும், பாஜக தரப்பு ஓபிஎஸ்-ஐ சமாதானப்படுத்த முயற்சித்ததாகவும் கூறுகிறார்.

இந்த விவகாரம், தமிழக அரசியலில் கூட்டணி உறவுகளின் நிலையற்ற தன்மையையும், தலைவர்களிடையேயான நம்பிக்கையின்மையையும் தெளிவாகக் காட்டுகிறது.

இந்த நிலையில், நயினார் நாகேந்திரனுக்கு தான் அனுப்பிய குறுஞ்செய்தியை ஆதாரமாக, வெளிப்படையாக காட்டி ஓபிஎஸ் தனது தரப்பு வாதத்தை நிரூபித்தார். இரண்டு குறுஞ்செய்திகள் நைனார் நாகேந்திரனுக்கு அவர் அனுப்பியதையும் ஊடகங்களுக்கு காட்டினார்.

இதையும் படிங்க: அம்புட்டும் உருட்டு… 6 முறை போன் பண்ணியும் நயினார் எடுக்கல! OPS ஓபன் டாக்.