தமிழகச் சட்டமன்றத் தேர்தலுக்கான பகிரங்கப் பிரச்சாரம் இன்று மாலை 6 மணியுடன் நிறைவடைந்த நிலையில், பாமக தலைவர் அன்புமணி ராமதாஸ் தரப்புக்குச் சென்னை சிட்டி சிவில் நீதிமன்றம் மிகப்பெரிய அதிர்ச்சியை அளித்துள்ளது. பாமக நிறுவனர் மருத்துவர் ராமதாஸின் பெயர் மற்றும் புகைப்படத்தைத் தேர்தல் பரப்புரைகளில் பயன்படுத்த அன்புமணி தரப்புக்குத் தடை விதித்து நீதிமன்றம் அதிரடி உத்தரவு பிறப்பித்துள்ளது.

தருமபுரி தொகுதியில் வேட்பாளர் சௌமியா அன்புமணிக்காக நடைபெறும் பிரச்சாரங்களில் ராமதாஸின் உருவப்படம் பயன்படுத்தப்படுவது குறித்துத் தொடரப்பட்ட வழக்கில் இன்று தீர்ப்பு வழங்கப்பட்டது. தேர்தல் பரப்புரைகள், போஸ்டர்கள், விளம்பரங்கள் என எதிலும் மருத்துவர் ராமதாஸின் பெயரையோ அல்லது அவரது புகைப்படத்தையோ அன்புமணி தரப்பு பயன்படுத்தக் கூடாது என நீதிபதி உத்தரவிட்டார். இந்த உத்தரவு தற்போதைய தேர்தலுக்கு மட்டுமல்லாது, வருங்காலத்திலும் (Future) பொருந்தும் என நீதிமன்றம் தனது தீர்ப்பில் திட்டவட்டமாகக் குறிப்பிட்டுள்ளது.

இந்த வழக்கின் அடுத்தகட்ட விசாரணையை வரும் ஜூன் 4-ஆம் தேதிக்கு நீதிமன்றம் ஒத்திவைத்துள்ளது. அன்றுதான் தமிழகச் சட்டமன்றத் தேர்தல் முடிவுகளும் வெளியாகவுள்ள நிலையில், இந்தத் தேதி முக்கியத்துவம் வாய்ந்ததாகப் பார்க்கப்படுகிறது.

இதையும் படிங்க: பெண்கள் இடஒதுக்கீட்டை திமுக தடுத்து வருகிறது! சாத்தூரில் சந்திரபாபு நாயுடு அனல் பறக்கும் பேச்சு!

நேற்றைய தினம் மருத்துவர் ராமதாஸ் வெளியிட்ட வீடியோவில், தருமபுரி தொகுதியில் சௌமியா அன்புமணியைத் தோற்கடிக்க வேண்டும் என்றும், அன்புமணி தரப்பு துரோகம் செய்துவிட்டதாகவும் பகிரங்கமாகக் குற்றம் சாட்டியிருந்தார். தனது அனுமதி இன்றித் தனது செல்வாக்கைப் பிரச்சாரத்திற்குப் பயன்படுத்துவதைத் தடுக்கவே இந்தச் சட்டப்பூர்வ நடவடிக்கை எடுக்கப்பட்டதாக அரசியல் நோக்கர்கள் கருதுகின்றனர்.

பிரச்சாரம் ஓய்ந்துள்ள நிலையில், நாளை மறுதினம் வாக்குப்பதிவு நடைபெறவுள்ளது. கடைசி நேரத்தில் கிடைத்துள்ள இந்த நீதிமன்றத் தடை, தருமபுரி உள்ளிட்ட பாமகவின் கோட்டை எனக் கருதப்படும் தொகுதிகளில் அன்புமணி தரப்புக்குத் தார்மீக ரீதியாகவும், அரசியல் ரீதியாகவும் பெரும் பின்னடைவாகக் கருதப்படுகிறது.

ராமதாஸின் புகைப்படம் இன்றி அன்புமணி தரப்பு மக்களைச் சந்திப்பது இதுவே முதல்முறை என்பதால், இது தேர்தல் முடிவுகளில் எந்த மாதிரியான மாற்றத்தை ஏற்படுத்தும் என்பது பெரும் எதிர்பார்ப்பை ஏற்படுத்தியுள்ளது.

இதையும் படிங்க: ஓய்ந்தது அனல் பறக்கும் பிரச்சாரம்! அமைதிக்குத் திரும்பியது தமிழ்நாடு... நாளை மறுநாள் வாக்குப்பதிவு!