புனேயில் காங்கிரஸ் மூத்த தலைவர் ராகுல் காந்தி பங்கேற்க உள்ள நிகழ்ச்சியை சமூக வலைதளங்களில் பிரபலப்படுத்த, இன்புளூயன்சர்களுக்கு தலா ரூ.25 ஆயிரம் வழங்க காங்கிரஸ் தரப்பில் முன்வந்ததாக பாஜ., குற்றம்சாட்டியுள்ளது. இதுதொடர்பாக வெளியிடப்பட்டதாக கூறப்படும் தொலைபேசி உரையாடலும் அரசியல் வட்டாரத்தில் பரபரப்பை ஏற்படுத்தியுள்ளது.
புனேயில் உள்ள கல்லூரி மைதானத்தில் இன்று ஆகஸ்ட் 22-ம் தேதி ராகுல் காந்தி பங்கேற்கும் ‘சத்ரோன் கி கஞ்ச்’ என்ற பெயரிலான நிகழ்ச்சி நடைபெறுகிறது. மாணவர்களின் குரல் என்ற பொருளில் நடத்தப்படும் இந்த நிகழ்ச்சிக்கு போலீசார் 30 நிபந்தனைகளுடன் அனுமதி வழங்கியுள்ளதாக கூறப்படுகிறது.
இந்நிலையில், நிகழ்ச்சியை சமூக வலைதளங்களில் அதிக அளவில் கொண்டு செல்லும் நோக்கில் யூடியூபர்கள் உள்ளிட்ட சமூக ஊடக இன்புளூயன்சர்களை அணுகி, அவர்களுக்கு ரூ.25 ஆயிரம் வழங்க காங்கிரஸ் தரப்பில் பேசப்பட்டதாக பாஜ., குற்றம்சாட்டியுள்ளது.
இதையும் படிங்க: எஃப்ஐஆர் பதிவு செய்யுங்கள்! போலீசாருடன் மோதல்!! காவல் நிலைய வாசலில் ராகுல் காந்தி தர்ணா!
இதற்கு ஆதாரமாக தொலைபேசி உரையாடல் ஒன்றை பாஜ., தனது அதிகாரப்பூர்வ எக்ஸ் தளத்தில் வெளியிட்டுள்ளது. அந்த உரையாடலில், சமூக வலைதளத்தில் பிரபலமான ஒருவரை தொடர்புகொள்ளும் நபர், ராகுல் காந்தியின் நிகழ்ச்சியை சமூக ஊடகங்களில் முன்னிலைப்படுத்துமாறு கேட்பதாகவும், பயணச் செலவுகளுக்காக ரூ.25 ஆயிரம் வழங்கப்படும் என தெரிவிப்பதாகவும் பாஜ., கூறியுள்ளது.
இந்த ஆடியோவின் உண்மைத்தன்மை குறித்து தனிப்பட்ட முறையில் உறுதி செய்யப்படாத நிலையில், அதை முன்வைத்து காங்கிரஸ் மீது பாஜ., கடுமையான விமர்சனங்களை முன்வைத்துள்ளது. மக்கள் ஆதரவைப் பெறுவதற்குக்கூட பணம் வழங்க வேண்டிய நிலைக்கு ராகுல் காந்தியின் தலைமை வந்துவிட்டதாக பாஜ., விமர்சித்துள்ளது.
மேலும், தேர்தல் தோல்விகளுக்குப் பிறகு மின்னணு வாக்குப்பதிவு இயந்திரங்கள் குறித்து ராகுல் காந்தி கேள்வி எழுப்புவதாகவும் பாஜ., சாடியுள்ளது. இதனால் புனே நிகழ்ச்சி அரசியல் ரீதியாகவும் கவனம் பெற்றுள்ளது.
இதையும் படிங்க: 35 வருஷமாச்சு! எனக்கும் பிரியங்கா காந்திக்கும் மட்டுமே தெரியும் அது! சோனியா குறித்து ராகுல்காந்தி பதிவு!